Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te pororaa na te hiti i te rio Xingu

Te pororaa na te hiti i te rio Xingu

I te omuaraa o Tiurai 2013, ua faarue e 28 Ite no Iehova no Beresilia i te oire no São Félix do Xingu no te haere i te tuhaa fenua o te feia Initia Cayapo e Yuruna. Na nia i te hoê poti 15 metera i te roa, ua haapaiuma ratou i te anavai rio Xingu. E 2 092 kilometera te roa o tera anavai o te tahe i te pae apatoerau i roto i te Amazone.

Ua faanaho teie pǔpǔ i tera tere no te poro i te Basileia o te Atua i te feia e ora ra i roto i te mau oire iti i te hiti i te anavai. I te toruraa o te mahana, ua naea i te pǔpǔ te oire iti o Kokraimoro. Ua farii-maitai-hia ratou e te feia mata ataata. Ua farerei ratou i te hoê vahine e apǎ ra i te rima. Ua faataa te taata aratai no ǒ eaha ta ’na e parau ra, oia hoi: “A haere mai outou atoa. Te hinaaro nei matou e ite o vai outou paatoa!”

Ua paraparau te mau Ite no Iehova i te mau taata atoa, vetahi na roto i te reo Potiti e te tahi atu ma te apǎ i te rima. Ua tauturu rahi atu te mau hoho‘a nehenehe mau i roto i te mau papai Bibilia ta ratou i rave ia ratou ra. Mea rahi te taata tei farii i te papai, i te buka rairai iho â râ Faaroo i te Atua.

Ua haamana‘o o Gerson, te hoê pionie taa ê i São Félix do Xingu, eaha te huru o te hoê taata no ǒ a fana‘o ai oia i te buka Ta ’u Buka Aamu Bibilia: “Ua hi‘o oia i te buka e ua tapea maitai i roto i to ’na na rima. Aita oia i hinaaro e tuu i te reira noa ’tu e no te hoê noa taime.”

Ua vaiiho te mau Ite no Iehova tau 500 buka, vea e buka rairai na te taata oaoa o te mau oire iti na te hiti i te anavai. I Kawatire, ua faaroo maite te mau taata i te parau tǎpǔ Bibilia o te hoê paradaiso i te fenua. Ua parau o Tonjaikwa, taata Initia Cayapo farii maitai: “I roto i te paradaiso, e ora te taata mai ia matou.”

E rave rahi o te oire no São Félix do Xingu o tei faarooroo i te parau o tera tere. Ua na ô o Simone, o tei apiti atoa i tera tere, e ua mana‘o te tahi mau taata o to ’na oire e eita paha oia e to ’na mau hoa e fariihia i roto i te mau oire iti. Aita râ ratou i fifihia. Ua parau o Simone: “Ua farii-popou-hia matou e ua poro matou i te taatoaraa.”