Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

E faanahoraa apî i Manhattan

E faanahoraa apî i Manhattan

I Novema 2011, i Manhattan, ua haamata te hoê pǔpǔ a te mau Ite no Iehova i te tahi faanahoraa apî no te faaite i te poroi Bibilia i te mau taata: ua faaohipa ratou i te mau iri e vairaa vea afaifai au mau. E tupu te reira i te pae apatoa o Manhattan, te tuhaa oire taata roa ’‘e e tahito roa ’‘e no New York.

Ua tatuhaa ratou i taua oire ra na roto e maha tuhaa. I roto i te tuhaa taitahi, te vai ra te mau iri e vairaa vea afaifai faanaho-maitai-hia, î i te mau papai Bibilia. E nehenehe te mau taata e tapea i reira e e tauaparau i te hoê Ite o te tavini i te taime taatoa. E itehia te rahiraa o tera mau faanahoraa i roto aore ra i pihai iho i te mau ravea faautaraa taata, i reira e mau ahuru tausani taata e haere nei i te mahana taitahi.

I taua mau vahi ra, e haapii te taata i te mau pahonoraa o te Bibilia i e rave rahi mau uiraa. No te mau taata râ aita e taime no te tauaparau, e rave noa ratou i te hoê papai ta ratou e taio i te tahi atu taime.

E mau papai na roto e rave rau reo. Aita ana‘e te papai na roto i te reo hinaarohia i nia i te iri aore ra vairaa vea afaifai, e nehenehe e ani i te reira. Tau mahana noa i muri a‘e to te taata e haere mai e tii i taua papai ra.

Ua au roa te mau taata e te mau mana faatere i tera faanahoraa. Ua parau te tahi mutoi e: “No te aha outou e tiai maoro roa ’i? Tei ia outou ra ta te taata e hinaaro.

Ua tapea taue-noa-hia te tahi atu taata i to ’na iteraa i te buka Eaha ta te Bibilia e haapii mau ra? E vai ra hoi e rave rahi mau taata i te vahi tapearaa pereoo na raro i te fenua o te taio ra i tera buka. E hinaaro oia e ite ihea e noaa ’i tera papai. Ua ite oia i teie nei.

Ua haere te hoê taurearea i te ohipa ma te taahi i mua i te hoê iri i te mau mahana atoa e ono hebedoma i te maoro. I te pae hopea, ua tapea o ’na e ua parau e: “Te hinaaro nei au i te tauturu.” Ua oaoa roa te mau Ite i te tauturu ia ’na ma te horoa atu i te hoê Bibilia e ma te faataa e nafea ia faufaahia i te reira.

Mea rahi te anaanatae i te tauaparau no nia i te mau tumu parau pae varua. I te hoê noa ava‘e, ua pûpûhia e 3 797 vea e e 7 986 buka maoti tera faanahoraa apî i Manhattan.