Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Hoê opereraa na te ao nei o te haafaufaa ra i te JW.ORG

Hoê opereraa na te ao nei o te haafaufaa ra i te JW.ORG

I Atete 2014, ua opere te mau Ite no Iehova i te hoê api parau no te haafaufaa i te jw.org. Maoti te reira, e rave rahi taata tei haere i nia i teie reni Internet i tera ava‘e. Fatata 65 mirioni taime i haere ai tera mau taata i nia jw.org. Ua maraa ïa tera numera, oia hoi hau atu i te 20 i nia i te hanere ia faaauhia i te ava‘e i mairi. Maoti teie reni Internet, fatata 10 000 taata tei ani ia haere mai te hoê Ite no Iehova i ǒ ratou no te haapii i te Bibilia ma te tamoni ore: ua hau atu i te 67 i nia i te hanere ia faaauhia i te ava‘e i mairi! Ua tauturuhia te mau taata i te mau vahi atoa maoti teie opereraa.

Tauturu no te feia e imi ra i te mau pahonoraa i te mau uiraa faufaa roa o te oraraa

I Kanada, ua farerei te hoê Ite no Iehova ia Madeline i roto i te hoê piha utaraa taata. Ua faaite oia ia ’na te api parau Ihea e ite ai i te pahonoraa i te mau uiraa faufaa roa o te oraraa? Ua parau Madeline e i te po na mua ’‘e, ua pure o ’na ma te aau rotahi mai te taupee mai o to ’na fare. Ua ani o ’na i te Atua ia tauturu mai ia ite i te mau pahonoraa i te mau uiraa itehia i nia i teie api parau. Ua haere a‘ena oia i e rave rahi fare pureraa no te ani i te hoê haapiiraa Bibilia, aita râ te tahi noa ’‘e i pahono mai. I muri iho, ua haamata Madeline i te haapii i te Bibilia e te mau Ite no Iehova.

Tauturu no te feia o te ore e ite i te Bibilia

I Philipino, ua paraparau Rowena i te tahi taata Tinito i mua i te hoê vahi amuraa maa oti noa. Ua horoa oia ia ’na i te hoê api parau. Ua faataa Rowena ia ’na e te hinaaro ra te mau Ite no Iehova e tauturu ia vetahi ê ia faufaahia i te hoê haapiiraa Bibilia tamoni ore.

Ua faaite te taata e aita roa ’tu oia i ite i te tahi noa ’‘e Bibilia. A tupu ai te aparauraa, ua faaitoitohia oia ia haere i te hoê tairururaa a te mau Ite no Iehova. I muri iho, ua parau taua taata ra e ua hinaaro oia e ite atu â no nia i te Bibilia. Ua faaoti oia i te haere i nia i ta tatou reni Internet no te rave mai i te hoê Bibilia.

Tauturu no te feia tari‘a turi

I Paniora, ua farerei Guillermo, te hoê Ite no Iehova tari‘a turi, ia Jorge, te tahi hoa haapiiraa tahito e tari‘a turi atoa oia. Ua faaite Jorge e e rave rahi uiraa e feaaraa ta ’na no te mea no pohe noa ’tura to ’na mama. Ua horoa ïa Guillermo i te api parau ia ’na a faataa ’tu ai e nafea ia ite i te pahonoraa i ta ’na mau uiraa i nia jw.org na roto i te reo aparaa rima. Ua titau manihini Guillermo ia Jorge ia haere i te mau putuputuraa i te Piha a te Basileia. Ua haere iho â o ’na e mai reira mai, aita o ’na i mairi hoê noa ’‘e putuputuraa noa ’tu e tei 60 kilometera te Piha a te Basileia mai to ’na fare.

Tauturu no te feia tei te vahi atea

I Groenland, ua tere e piti Ite no Iehova e ta raua vahine e ono hora na nia i te hoê pahi nainai no te haere i te hoê oire iti e 280 taata, noa ’tu te haamâu‘araa rahi o tera tere. Ua poro ratou i tera vahi e ua opere ratou i te mau api parau a faaite atu ai i te hoê video na roto i te reo Groenland. Ua haamata atoa ratou i te hoê haapiiraa Bibilia e te tahi taata e ta ’na vahine. I teie nei, te faatere nei ratou i tera haapiiraa Bibilia e piti taime i te hebedoma maoti te niuniu paraparau.

Aita tera mau tutavaraa i rave-noa-hia i te pae Apatoerau. I Nicaragua, ua faanaho te mau Ite no Iehova e opere i te api parau i te taata e paraparau ra i te reo Mayangna i roto i te uru raau i Antilles. Ua tere ratou e 20 hora na nia iho i te hoê pereoo utaraa taata ino roa e na nia i te hoê purumu e rave rahi apoo. I muri a‘e, ua pata avae ratou e 11 hora no te tapae i te oire iti e i te tahi taime ua haere ratou na te vahi vari roa. I tera oire iti, ua opere te mau Ite no Iehova i te mau api parau e ua faaite atu ratou i te mau video na roto i te reo Mayangna. Ua maere roa te mau taata e ua oaoa atoa.

I te hoê oire iti, i roto i te ururaau haumi no Amazonie i Beresilia, ua pûpû Estela i te api parau i te tahi taata. Ua farii oia i te api parau, aita râ tera taata i anaanatae roa a tuu atu ai i te reira i roto i to ’na pute ahu. A ho‘i ai oia i to ’na fare, ino atura te matini o to ’na poti e vai noa a‘era o ’na i nia i te anavai. A tiai ai te taata i te tauturu, ua taio oia i te api parau. Maoti ta ’na niuniu afaifai, ua haere oia i nia jw.org e ua taio oia e rave rahi tumu parau. Ua rave atoa mai oia i te tahi mau video. Tau mahana i muri a‘e, ua farerei taua taata ra i ta Estela tane e ua ani ia ’na ia haamauruuru i ta ’na vahine no te api parau. Ua na ô oia: “Ua tamǎrû te mau tumu parau ta ’u i taio ia ’u a tiai ai i te tauturu i roto i to ’u poti i nia i te anavai. Mea au roa na ta ’u mau tamarii te mau video no nia ia Kaleba. E tamau vau i te haere i nia jw.org.”

No te ite atu â

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?