Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Hitu ahuru matahiti to te Haapiiraa no Gileada

Hitu ahuru matahiti to te Haapiiraa no Gileada

I te 1 no Fepuare 1943, ua haamauhia te piha haapiiraa matamua taa ê mau i te pae apatoerau o New York. Ua hau atu i te 8 000 tane e vahine no te mau tuhaa atoa o te ao nei tei fana‘o i te hoê faaineineraa taa ê matauhia i teie mahana mai te Haapiiraa Bibilia no Gileada a te Watchtower.

I nia: Te tomoraa o te Haapiiraa no Gileada, i South Lansing, i New York. I raro: Taeae haapii no Gileada e paraparau ra i te mau piahi o te 31raa o te piha Haapiiraa no Gileada

Te parau ra o Jonathan o tei faatuitehia i te Haapiiraa no Gileada aita i maoro a‘enei: “Ua niuhia te faaineineraa ta matou i fana‘o i nia i te Parau a te Atua. E tauturu mai ïa te reira ia matou ia aravihi atu â i roto i te mau tuhaa fenua aore ra ta‘ere atoa.” Ua na ô ta ’na vahine o Marnie te i‘oa: “Hau roa ’tu â i teie nei, te hinaaro nei au e tauturu i te taata ia ite e aita ’tu oraraa maitai a‘e i ta to tatou Atua poiete i opua no tatou. Ua papu ia ’u e e maitai mai te oraraa o te taata ia tauturu atu tatou ia ite o vai Iehova.”

Te horoa ra te Haapiiraa no Gileada i te hoê haapiiraa tamoni ore e pae ava‘e. Ua niuhia te reira na mua roa i nia i te Bibilia e te faufaaraa o te ohipa pororaa. Te fa o te faaineineraa, oia hoi e haapii i te mau piahi ia faaitoito i te nunaa o te Atua ia vai aueue ore noa te reira e e tauturu ia ratou ia faatupu i te mau huru maitatai pae varua hinaarohia no te faaruru i te mau fifi. I te piha haapiiraa, e faataa te mau piahi i te taime rahi no te tauaparau i nia i te mau faaueraa Bibilia o te tauturu ia ratou ia haapuai i to ratou taairaa e to ratou Atua ra o Iehova.

I nia: 1958, Albert Schroeder e haapii ra i te mau piahi no Gileada ma te faaohipa i te hoê hoho‘a o te sekene. I raro: 1968, Ulysses Glass e haapii ra i te 46raa o te piha Haapiiraa no Gileada

E tavini taime taatoa ana‘e te feia faaipoipo o te apiti i te Haapiiraa no Gileada. Ia horoahia ta ratou parau tuite, e ho‘i ratou i to ratou fenua aore ra e tonohia ratou i te tahi atu fenua. E tonohia vetahi i roto hoê o na 90 tiahapa amaa a te mau Ite no Iehova. No te rahiraa râ, e tonohia ïa i roto i te mau tuhaa fenua mea rahi te taata. E faaohipa-maitai-hia ïa ratou i ǒ i roto i te pororaa.

Ua faatupuhia na mua te Haapiiraa no Gileada i te Faaapu a te Basileia, parauhia Ferme du Royaume, i South Lansing i New York. I 1961, ua afaihia te haapiiraa i te pu rahi a te mau Ite no Iehova i Brooklyn, i New York. Mai 1988 e tae atu i 1995, tei te Vahi faaapuraa a te taiete Watchtower i Wallkill te haapiiraa e tupu ai. E mai 1995 mai â, e faatupuhia te haapiiraa i te Pu haapiiraa a te taiete Watchtower i Patterson, New York. I Mati 2013, ua horoahia te parau tuite i te 134raa o te piha haapiiraa.

I nia: 2003, te mau piahi o te 116raa o te piha Haapiiraa no Gileada. I raro: 2011, te mau piahi e haapii ra i roto i te piha vairaa buka no Gileada

A 70 matahiti to te mau piahi o te Haapiiraa Bibilia no Gileada raveraa i ta ratou hopoia ei Ite no Iehova ma te taiva ore. Mea faahiahia mau te hi‘oraa ta ratou i vaiiho mai.