Eaha to roto?

Te tamâ atoa ra te mau Ite no Iehova i te uru raau i pihai iho ia Lviv

Te tamâ atoa ra te mau Ite no Iehova i te uru raau i pihai iho ia Lviv

I te 6 no Me 2017, ua apiti fatata 130 Ite no Iehova i roto i te tamâraa i te uru raau Bryukhovychi i pihai iho ia Lviv, i Ukraine. Ua ora e ua ohipa te mau rima tauturu i te Betela a te mau Ite no Iehova i Ukraine, i pihai iho i taua uru raau ra. E 22 tae atu i te 80 matahiti to te feia rima tauturu. Ua tamâ ratou i te hoê vahi e 50 tâ e ua haaputu mai ratou 600 kilo pehu i roto noa e toru hora i te maoro.

No Mykhailo Splavinskyi, te hoê taata îite o te hoê pu e haapao ra i te mau uru raau i Lviv, “o te mau Ite no Iehova te mau taata matamua tei turu i te tamâraa uru raau i te matahiti taitahi e ua na reira ratou mai 2014 mai â.”

No te aha e titauhia ’i ia tamâ i te uru raau

Ua faataa mai o Splavinskyi: “E piti tumu e itehia ’i te mau pehu i roto i te uru raau. A tahi, aita vetahi taata i ohi i ta ratou iho mau pehu. Te piti, e faautahia te pehu o te tahi ohipa paturaa aore ra te tahi atu mau pehu i roto i te mau pereoo rarahi e e faaruehia te reira i roto i te uru raau.”

Mea ino mau te faarueraa pehu no te uru raau. Ua parau o Splavinskyi: “E titauhia te hoê area taime rahi ia ore roa ’tu te pehu.” I muri iho, “e ino mai te pape i raro i te fenua, a fifi atu ai te natura.” Ia faaruehia mai te mau hi‘o, e rahi mai te puai o te mahana e e nehenehe te reira e faatupu i te auahi i roto i te uru raau. Mea atâta roa te mau hu‘ahu‘a hi‘o e te mau patia faaruehia, no te mau tamarii iho â râ. Ua na ô oia: “Eita teie mau fifi e tupu ahiri aita te pehu i faaruehia i roto i te uru raau.”

E ere i te mea ohie ia tamâ i te uru raau e 3 300 tâ. Ua faataa o Splavinskyi: “E pae noa taata haapao i te uru raau ta matou. Aita ïa matou e nehenehe e tamâ i teie vahi rarahi. Tera râ, hoê taime i te matahiti, e ani matou ia apiti te taatoaraa i roto i te tamâraa i te uru raau.”

Haaputu, faataa e faarue

Ua faaohipa te mau Ite no Iehova rima tauturu i te mau rimarima, puohu urina e te mau para‘u. Ua haaputu mai ratou i te mau mohina, huira pereoo, hi‘o, metara, papie, urina e te mau patia faaohipa-a‘ena-hia. Ei faahopearaa, ua parau o Ihor Fedak, taata rave ohipa i te uru raau i taua vahi ra: “Mea mâ maitai te vahi ta te mau Ite no Iehova i haapao.”

Noa ’tu aita te ture e faahepo ra, ua faataa te mau rima tauturu i te mau pehu na roto e toru tuhaa: te hi‘o, te papie e te urina. Mea ohie ïa te faaapî-faahou-raa i te mau pehu. I muri iho, e ohi mai te hoê taiete i te mau pehu haaputuhia. Mai 2016 mai â, ua faaoti te mau Ite no Iehova i te aufau i te hoê taiete ia ohihia te mau pehu ta ratou i haaputu mai. Te na ô ra o Fedak: “Te haamauruuru nei au i te mau Ite no Iehova no te mea te tauturu rahi nei ratou ia matou.”

“E ere te tamâraa i te ohipa faufaa ore no ’u”

Mea oaoa na te mau Ite no Iehova ia apiti i roto i te tamâraa i te uru raau i te matahiti taitahi. Mea au na ratou ia ohipa no te maitai o vetahi ê e ia vai mâ te uru raau. Ua tu to Volker mana‘o i to ratou, a parau ai: “E ere te tamâraa i te ohipa faufaa ore no ’u. Mea oaoa e mea faahiahia ia ohipa no vetahi ê.”

Te parau atoa ra o Anzhelika: “Te mea faufaa roa no ’u, o te iteraa ïa eaha ta ’u e nehenehe e rave no te tamâ i te vahi, eiaha te iteraa o vai tei faarue i te mau pehu.” Ua apiti atoa o Lois, e 78 matahiti to ’na, i roto i tera ohipa tamâraa. Te na ô ra oia: “E riri vetahi no te mau pehu ta ratou i ite a ori haere ai ratou. Mea au a‘e râ ia ohi i te pehu e ia faarue i te reira i te farii pehu.”

Te parau ra o Wieslaw: “Pinepine te taata i te iteraa ia matou e te tamau arapoa aore ra te ahu tano no te poro. Te hinaaro atoa nei râ matou e ohipa i roto i te tamâraa i te uru raau aore ra e rave i te tahi atu mau ohipa ia faufaahia te taatoaraa.”