Eaha to roto?

Nafea to outou oire e faufaahia ’i ia patuhia te hoê Piha a te Basileia?

Nafea to outou oire e faufaahia ’i ia patuhia te hoê Piha a te Basileia?

Hau atu i te 100 matahiti i te maoro, ua patu te mau Ite no Iehova i ta ratou iho mau vahi putuputuraa. Ua patuhia anei hoê vahi putuputuraa a te mau Ite no Iehova, parauhia Piha a te Basileia, i roto i ta outou tuhaa fenua? Eaha te mau haamaitairaa ia patuhia te hoê Piha a te Basileia i roto i to outou oire?

Hoê Piha a te Basileia i Flowery Branch, Géorgie, Marite

“E nehenehe atu â te oire”

Ua patu-maitai-hia te mau Piha a te Basileia, e faanehenehe ïa taua mau paturaa ra i te aroâ i patuhia ’i te reira. Ua na ô o Jason, o te ohipa ra i roto i te tuhaa paturaa o te mau Piha a te Basileia i te fenua Marite: “Ta tatou fa, ia riro te Piha a te Basileia taitahi ei hoê o te mau fare nehenehe roa ’‘e i roto i te tuhaa fenua.” Ua parau te hoê taata papai hoho‘a fare, e Ite no Iehova oia: “Te hinaaro nei matou ia nehenehe atu â te oire maoti te Piha a te Basileia. E haafaufaahia ïa te mau paturaa i pihai iho.”

Te ohipa ra te feia patu Ite no Iehova ei rima tauturu no te patu i te mau Piha a te Basileia paari mau. E tapao-pinepine-hia ta ratou ohipa e vetahi ê. Ei hi‘oraa, i Texas, i te fenua Marite, ua parau te hoê taata hi‘opoa i te pae o te paturaa e mea maitai roa ’‘e te huru hamaniraa o te tapo‘i fare o tera Piha a te Basileia. I te motu no Jamaïque, ua haere te hoê taata hi‘opoa i te pae o te paturaa e te tahi atu, mea apî ratou i roto i tera ohipa, e hi‘o i te hoê paturaa o te tahi Piha a te Basileia. Ua na ô oia ia ratou: “Aita e peapea. Te pee maite noa ra te mau Ite no Iehova i te hoho‘a paturaa. Te rave ra ratou hau atu i tei titauhia.” Ua parau te tahi atu taata hi‘opoa i te pae o te paturaa i Floride, i Marite: “Ua hi‘opoa vau i te mau fare ma‘i e te mau paturaa rarahi a te hau faatere. Tera râ, aita hoê a‘e mai te paturaa a te mau Ite no Iehova, mea faanaho-maitai-hia hoi te reira. Mea maitai roa ta outou ohipa.”

Hoê Piha a te Basileia i Concession, Zimbabwe

E faufaahia te aroâ

E putuputu mai te mau Ite no Iehova i te Piha a te Basileia. E faufaahia te feia i roto i tera mau amuiraa i taua mau putuputuraa ra. Ua tauturuhia ratou ia riro ei metua tane, metua vahine aore ra ei tamarii maitai a‘e. Ua faataa o Rod, te ohipa ra oia i roto i te hoê pǔpǔ papai hoho‘a: “E pû haapiiraa te Piha a te Basileia taitahi o te paturu ra i te mau ture aveia e maoti te reira e faufaahia ïa te mau oire atoa. I te Piha a te Basileia e fana‘o ai outou i te tauturu no te faaruru i te mau ati. E fariihia outou e te mau taata e huru aau mahanahana e auhoa to ratou. E faufaahia outou i te fana‘o i te tamahanahanaraa e te tauturu i te pae varua.”

Te tauâ ra te feia e putuputu ra i te mau Piha a te Basileia i to ratou mau taata tupu. Te haa oioi ra ratou no te tauturu atu a tupu ai te ati. Ei hi‘oraa, i 2016, ua tupu te mata‘i rorofai Matthew i te mau motu Bahamas. I muri a‘e, ua tataî te mau Ite no Iehova i e 254 fare. I te tahi oire, ua î roa te fare o te hoê vahine, o Violet to ’na i‘oa, i te pape. E 80 matahiti to ’na. Ua ani oia i te tauturu a te hoê pǔpǔ Ite no Iehova tei ohipa no te tauturu i tei roohia i te ati natura. Ua parau atu oia e nehenehe oia e aufau ia ratou. Aita râ ratou i farii i te moni. Ua tauturu ratou ia ’na ma te tataî i to ’na tapo‘i fare, aita ïa te pape e tahe faahou ra i roto. I muri a‘e, ua tataî ratou i te aroaro o to ’na fare. Ua tauahi o Violet ia ratou paatoa e ua haamauruuru oia ia ratou e rave rahi taime a na ô ai: “E nunaa iho â outou no te Atua!”

Hoê Piha a te Basileia i Bad Oeynhausen, Rhénanie-du-Nord-Westphalie, Heremani

‘Mea au na matou ia patuhia te Piha a te Basileia i to matou oire’

No te atuatu maitai i te mau Piha a te Basileia, te faaineine ra te mau Ite no Iehova i te feia o tera mau amuiraa. E faahopearaa maitai roa tei itehia. Ei hi‘oraa, i te hoê oire iti i Arizona, ua titau-manihini-hia te hoê vahine i te hoê putuputuraa i te Piha a te Basileia. Ua faatia oia e mea atuatu-maitai-hia te Piha a te Basileia e ua maere roa oia i te faaroo e ua fana‘o te mau taeae i te hoê faaineineraa no te haamaitai i taua paturaa ra. No ’na, aita hoi i titauhia te mau haamaitairaa atu â. Ua ohipa tera vahine ei taata papai vea no te hoê taiete. I muri a‘e, ua pia taua taiete ra i te hoê tumu parau no nia i te Piha a te Basileia tei atuatu-maitai-hia. Ua faaoti te tumu parau ma te na ô: “Mea au na matou . . . ia patuhia te Piha a te Basileia i to matou oire.”

E Piha a te Basileia na te ao nei. Te titau-manihini-hia ra outou ia haere atu i te hoê putuputuraa. Papu maitai, e fariihia outou ma te mahanahana.