Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

JW.ORG—Ua maitaihia to ratou oraraa

JW.ORG—Ua maitaihia to ratou oraraa

E rave rahi taata no te mau nunaa atoa tei faufaahia i te reni Internet jw.org. Teie te tahi o te mau tapao haamauruururaa i faataehia ’tu i te pu rahi a te mau Ite no Iehova mai te ava‘e Me 2014.

Tauturu no te mau tamarii

“Na mua ’‘e ra ia ho‘i ana‘e mai ta ’u tamaiti iti i te fare na te haapiiraa mai, e peni tara ta ’na e faaho‘i mai, e tao‘a hauti, aore ra e titia mata e ere hoi na ’na, na to ’na râ mau hoa haapiiraa. Ua tutava noa na maua ta ’u vahine i te tauturu i ta maua tamaiti ia taa e, a na reira ’i oia, te riro ra oia ei eiâ, e e mea ino hoi ia eiâ. Aita iho â râ! E tae roa i te mahana i mataitai ai matou i te video Mea ino ia eiâ tei ravehia mai i nia i te reni Internet jw.org. E mauhaa puai mau te reira, e tera iho â tei tano maitai no ta ’u tamaiti. I muri a‘e i to ’na mataitairaa i te reira, ua hinaaro oia e faaho‘i atu i te mau tao‘a atoa ta ’na i rave mai, ua papu hoi ia ’na i teie nei e mea ino te eiâ no te Atua. Ua riro mau teie reni Internet ei tauturu rahi no matou!”—D. N., Afirika.

‘E mauhaa puai mau te video Mea ino ia eiâ, e tera iho â tei tano maitai no ta ’u tamaiti’

“Mea au roa na ta ’u mau tamarii teie reni Internet. E mataitai ratou i te mau video no te mau tamarii ta ratou i rave mai i nia jw.org. Ua tauturu te reira ia ratou ia haapao maitai atu â i te mau ture aveia a te Bibilia no nia i te haavare aore ra te eiâ. Ua haapii atoa ratou e nafea ia faatupu i te tahi atu mau huru maitatai i te roaraa o to ratou oraraa, a riro atu ai ei taata au maitai.”—O. W., Antilles.

Tauturu no te feia haere haapiiraa

“Na mua ’‘e ra, ua mana‘o vau e faarue i te haapiiraa no te mea ua fiu roa vau. I te hoê râ mahana, ua taio vau i te hoê tumu parau i nia jw.org ‘E faarue anei au i te haapiiraa?’. Ua tauturu mai te reira ia ’u ia haafaufaa i te haapiiraa. E ravea hoi te reira no te faaineine ia ’u ia riro ei taata feruriraa paari.”—N. F., Afirika.

“I nia i teie reni Internet, mea rahi te mau a‘oraa no te mau taurearea. Ua haapii au e nafea ia tapea i te mau ture aveia morare maitai i te fare haapiiraa”

“I nia i teie reni Internet, mea rahi te mau a‘oraa no te mau taurearea. Ua haapii au e nafea ia tapea i te mau ture aveia morare maitai i te fare haapiiraa. Oia atoa e nafea ia haapao na mua i te haapiiraa, eiaha râ i te faaanaanataeraa.”—G., Afirika.

“Ua faatia mai te hoê hoa ohipa i to ’na hepohepo no ta ’na tamahine e rave-ino-hia ra i te fare haapiiraa, e te tahi tamahine iho â râ. Ua taiâ oia e aita oia i haere i te haapiiraa tau mahana. Ua faatia ’tu vau i to ’u hoa ohipa i te tahi o te mau ravea ta ’u i ite i roto i te video Faaruru i te hamani-ino-raa i te fare haapiiraa i nia jw.org. Ua au o ’na i te a‘oraa ia faaohipa i te parau hauti no te tamaru i te iria. Ua haapii oia i ta ’na tamahine e nafea ia patoi atu i te mau rave-ino-raa. I muri iho, ua haere te tamahine i te haapiiraa ma te ore e taiâ. E i muri a‘e, ua riro atoa te tamahine tei rave ino na ia ’na ei hoa no ’na.”—V. K., Europa hitia o te râ.

Tauturu no te mau taurearea

“Mauruuru no te tumu parau ‘No te aha te otioti nei au ia ’u iho?’ Mea maoro to ’u faarururaa i teie fifi ma te ore e faatia i te reira ia vetahi ê. Ua mana‘o hoi au e eita ratou e taa mai e o vau ana‘e i mua i tera fifi. Ua tauturu mai te mau faatiaraa ta ’u i taio i roto i teie tumu parau. Ua ite au i teie nei e te vai ra hoê o te taa ra ia ’u!”—Te hoê vahine apî no Auteralia.

“Ua tauturu mai te mau faatiaraa ta ’u i taio i roto i teie tumu parau. Ua ite au i teie nei e te vai ra hoê o te taa ra ia ’u!”

“Maoti jw.org, mea ohie a‘e ia ite e nafea ia faaruru i te mau fifi ta te mau taurearea e ora nei. Ua tauturu mai te tumu parau no nia i te faaheporaa e taati ia ite eaha te reira e ia taa e ua na reirahia vau. Ua ite atoa vau eaha te tia ia rave ia tupu tera fifi.”—T. W., Antilles.

Tauturu no te mau metua

“Mea peepee roa ta ’u tamaiti taurearea. Mea pinepine vau i te tâhiti i to ’na huru, te tahi mahana mea maitai o ’na, te tahi aita. Mea fifi ïa no mâua ia tauaparau. I te hoê mahana, ua haere au i nia jw.org i te tuhaa faataahia no te feia faaipoipo e te mau metua. I reira to ’u iteraa e rave rahi tumu parau e tatara ra hoê â tupuraa i to ’u. Ua haapii au e nafea ia tauaparau e ta ’u tamaiti. Ua faufaa-atoa-hia oia i teie reni Internet. I teie nei, mea paraparau roa mâua e e faatia mai o ’na i ta ’na mau oaoaraa e haapeapearaa.”—C. B., Afirika.

“Mea pinepine e piahia te tahi tumu parau i nia jw.org no nia i te hoê fifi ta ta ’u mau tamarii e faaruru nei”

“E horoa te jw.org i te mau metua i te ravea no te haapii i ta ratou mau tamarii ma te hauti. Ei hi‘oraa, te video e faataa ra nafea ia ite i te hoê hoa maitai. Ua tauturu mai te reira i ta mâua tamarii ia taa eaha mau te auhoaraa maitai e ia maiti i te mau hoa maitai. Mea pinepine e piahia te tahi tumu parau i nia jw.org no nia i te hoê fifi ta ta ’u mau tamarii e faaruru nei. Mea rahi a‘oraa e vai ra i nia i teie reni Internet.”—E. L., Europa.

Tauturu no te feia faaipoipo

“Ua faaipoipohia mâua ta ’u vahine a ono matahiti i teie nei. Mea taa ê roa mâua i nia anei i te huru paraparau, te huru oraraa e te huru feruriraa. Ua faatupu te reira i te tahi mau peapea i roto i to mâua oraraa. Ua haru maitai to ’u mata i te tumu parau i nia jw.org ‘Nafea ia horoa ’tu i te tari‘a faaroo?’ Ua taio vau i te reira e o ta ’u i haapii mai, o ta ’u atoa ïa i faatia ’tu i ta ’u vahine. Ua tutava mâua i te faaohipa i teie mau a‘oraa faufaa mau.”—B. B., Antilles.

“Ua ora mai to ’u faaipoiporaa maoti teie reni Internet”

“Hoê matahiti i teie nei to ’u amuimui-noa-raa i te tahi mau Ite no Iehova e te hinaaro nei au e faaite i to ’u mauruuru no te jw.org. Mea rahi ta ’u i haapii i nia i teie reni. Ei hi‘oraa, e nafea ia tamǎrû ia ’u e ia riro ei hoa faaipoipo e ei metua tane maitai. Ua ora mai to ’u faaipoiporaa maoti teie reni Internet.”—L. G., Antilles.

Tauturu no te feia tari‘a turi

“Maoti te jw.org, e au ra e te ora faahou ra vau. Maoti te mau video, ua rahi atu â to ’u ite i te reo apǎraa rima Marite. Na mua ’‘e ra, mai te huru ra e aita ta ’u e fa i roto i to ’u oraraa. I to ’u râ mataitairaa i te video Te Parau a te Atua i roto i to ’u iho reo, ua mahanahana roa to ’u aau e ua faaoti au e tiatonu i te mau mea maitai o te oraraa.”—J. N., Afirika.

“Maoti te jw.org, e au ra e te ora faahou ra vau”

“E faufaa iti rahi to teie reni Internet. Te tauturu nei au i te feia tari‘a turi, te feia apî iho â râ. Maoti te rahiraa video e vai ra i nia i teie reni, ua aravihi atu â vau i te pae o te apǎraa rima. E nehenehe atoa vau e tauturu i te feia e hinaaro e haamaitai i to ratou oraraa utuafare aore ra auhoaraa.”—K. J., Antilles.

Tauturu no te matapo

“E matapo vau e ua faufaahia vau i te reni jw.org. Na mua ’‘e ra, i tiai na vau tau avae ia tae mai ta ’u mau papai i roto i te afata rata. I teie nei râ, maoti te reni Internet, e tae mai ta ’u mau papai i te hoê â taime i ta te feia e ite ra. Ua faufaahia ïa to ’u oraraa utuafare e e nehenehe ta ’u e tauturu i te tahi atu.”—C. A., Marite Apatoa.

“Maoti te reni Internet . . . ua faufaahia . . . to ’u oraraa utuafare e e nehenehe ta ’u e tauturu i te tahi atu”

“No te matapo aita i ite i te taio i te Braille aore ra aita e moni no te hoo mai i te tahi mau buka Braille, e tao‘a faufaa mau te jw.org. Maoti te mau haruharuraa, e nehenehe ta te taata matapo e fana‘o i te mau parau rii apî i nia e rave rahi tumu parau. Ua faanahohia teie reni Internet no te mau huru taata atoa, aita e faataa-ê-raa. E faaturahia e e haapao-atoa-hia te feia matapo maoti teie reni.”—R. D., Afirika.

Tauturu no te feia e hinaaro ra e ite o vai te Atua

“Mea taa ê mau ta outou reni Internet i te tahi atu. Aita hoi te reira e faaohipa ra i te mau ta‘o fifi ia taa, o te mau peresibutero ana‘e te nehenehe e taa. Eita oe e painu, mea ohie hoi ia taa i ta outou reni Internet e e ite tia ’tu oe i te pahonoraa. Aita te reira i î i te parau philosophia. Aita atoa e faaite ra i te faaroo mai te hoê mea fifi mau. Mai te hoê râ mea ta te taata atoa e nehenehe e faatupu.”—A. G., Asia.

‘Mea ohie ia taa i ta outou reni Internet e e ite tia ’tu oe i te pahonoraa. Te faaite ra te reira i te faaroo mai te hoê mea ta te taata atoa e nehenehe e faatupu’

“Ahiri aita o jw.org, mea haapaoraa ore to ’u oraraa. I roto i te hoê ao poiri i te pae varua, ua riro teie reni Internet mai te hoê mori ta ’u e nehenehe e tuama. I reira iho â, e nehenehe ta ’u e taio aore ra e faaroo i te tahi mau parau o te faataa ra i te mana‘o o te Atua i nia i tera e tera tumu parau. E ite-atoa-hia te pahonoraa o te tahi mau uiraa faufaa o te oraraa.”—J. C., Antilles.

“Mea au mau na ’u te tauturu pae varua ta ’u e fana‘o ra i ǒ ’u nei, i te vahi mo‘emo‘e roa ’‘e i Marite Apatoa. Ahiri aita teie reni Internet, e mo‘emo‘e roa vau.”—M. F., Marite Apatoa.

No te ite atu â

Eaha to nia i ta matou reni Internet?

E ite oe o vai mau â te mau Ite no Iehova e eaha ta matou mau tiaturiraa. E noaa atoa te pahonoraa Bibilia i ta oe mau uiraa.

E nehenehe anei e maramarama i te Bibilia?

E hinaaro Iehova ia ite oe i te parau mau. Na ’na e tauturu atu ia taa i te mau Papai.