Eaha to roto?

Ua ite te mau orometua haapii i te faufaaraa o te JW.ORG

Ua ite te mau orometua haapii i te faufaaraa o te JW.ORG

I 2016, e haamaitairaa rahi ta te mau Ite no Iehova i fana‘o no to ratou faaiteraa i te faufaaraa o te mau video e papai i nia te reni natirara jw.org i te hoê pǔpǔ orometua haapii i Zamboanga del Norte i Philipino. Ua haere na mua te mau Ite e hi‘o i te Pu no te haapiiraa i te oire i Dipolog. Ua faahiahia roa te mau faatere i ta ratou i ite i nia ia jw.org. Ua titau manihini ratou i te mau Ite ia horoa i te hoê faaiteraa e 30 minuti noa i na toru rururaa tataitahi a te mau orometua haapii na te mau mataeinaa e rave rahi i Zamboanga del Norte.

Mea nafea ratou i te faaiteraa i te reira?

Ua faaite te mau Ite e rave rahi video e papai i nia i te reni natirara jw.org i na 300 orometua tei haere mai i na rururaa e toru. Ua anaanatae roa te taata i te tumu parau, “Nafea ia faaruru i te fifi i te pae moni.” Ua parau te mau orometua e tauturu mau teie faaiteiteraa i te mau piahi e ia ratou atoa. Ua farii ratou i te rave i te api parau Ihea e ite ai i te pahonoraa i te mau uiraa faufaa roa o te oraraa? o te faataa maitai eaha te tahi haamaramaramaraa e itehia i nia ia jw.org. Ua rave atoa mai ratou i te mau video i nia i te reni natirara.

I te mea ra e ua anaanatae roa te taata i te reira, ua faaoti te Pu o te haapiiraa ia faanaho faahou te mau Ite te tahi mau faaiteiteraa i na 600 feia a‘o i te pae haapiiraa e te tahi atu orometua haapii. Ua haamauruuru faahou mai ratou ma te aau tae ia matou.

“E tauturu rahi mau iho â te reni natirara”

Ua faataa te taata i tae atu i te rururaa, e ua tauturu te faaiteiteraa i nia i te reni natirara ia ratou. Ua na ô te hoê orometua: “Te hinaaro atu nei au e faaite i to ’u mauruuru rahi, ua tauturu mau te reira ia ’u no te haapii i ta ’u mau piahi.” Ua na ô te tahi atu: “Mea rahi ta ’u e nehenehe e haapii, no nia iho â ra i te hepohepo. Ua tauturu mau te reni natirara ia ’u, eiaha noa no te feia apî, no te mau taata paari atoa râ.”

Ua hau i te 350 orometua haapii tei ani mai te tahi atu haamaramaramaraa. Ua horoa te mau Ite i te tahi atu mau papai e ua tauaparau no nia i te mau aratairaa faufaa ta te Bibilia e horoa ra.

Ua oaoa te mau Ite no Iehova i te iteraa e ua hau i te 1 000 orometua tei haere mai i te faaiteiteraa no nia i te reni natiraa jw.org i Zamboanga del Norte. Ua ite atoa ratou nafea ia faaohipa i te reni no ta ratou ohipa haapiiraa. Mea faufaa te reira no te mau orometua atoa na te ao nei, e ite ratou te mau a‘oraa e mana‘o tauturu maitai i te pae morare e varua. *

^ par. 9 E hopoia rahi ta te mau fare haapiiraa i Philipino i te horoa i te ite i ta ratou mau piahi, e i “te haapuai i to ratou hinaaro i te pae morare e varua e no te haamaitai i te huru o te taata e no te a‘o atu.”—Te Pǎpǎ ture no 1987 a te Repupirita no Philipino, irava XIV, tuhaa 3.2.