I Tiunu 2013, ua maraa roa mai te mau anavai i Europa no Ropu no te ûa puai i topa mai! I Honegeria, aita i itehia a‘enei te anavai Danube i te maraaraa mai mai tera.

I te mea e e ohipa atâta mau te reira e te ru, ua ani te tahi piha ohipa a te faatereraa hau Honegeria i te tauturu a te amaa a te mau Ite no Iehova no Honegeria hou te ati a tupu mai ai. Ua farii te amaa e ua ani i te mau amuiraa atoa na te hiti o te anavai Danube ia apiti i te ohipa faanahohia e te hau no te arai i teie ati.

Mea faahiahia roa tei tupu. I to muri iho mau mahana, ua hau atu i te 900 Ite no Iehova no e 72 amuiraa tei apiti atu i te ohipa no te haapaariraa i te mau aua paruru o te anavai. Ua anihia ratou taitahi ia pine i nia ia ratou i ta ratou tareta papaihia “Ite no Iehova,” oia atoa i to ratou i‘oa e to ratou oire.

I te hoê oire, ua faatae te tahi tia o te Croix-Rouge no ǒ i te hoê amuiraa i teie poroi: “Mea tano ia haamauruuruhia e ia faaturahia outou. Mea varavara hoi ia ite i teie auhoêraa e i teie aau tae no te tauturu ia vetahi ê. Hau atu â, mea atea outou e faaea ’i! E oaoa roa vau i te faahiti i to outou parau i roto i to tatou oire!”

Ua fana‘o atoa te amaa a te mau Ite no Iehova i te hoê rata haamauruururaa no ǒ mai i te peretiteni o te hoê faanahonahoraa tauturu i te tau ati. E melo atoa o ’na o te apooraa iriti ture no Honegeria.