Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Ua tauturuhia te taata i opua e haapohe ia ’na i te Sky Tower

Ua tauturuhia te taata i opua e haapohe ia ’na i te Sky Tower

E 80 matahiti to Graham Browne. Ua tauturu teie Ite no Iehova i te tahi taata tei fifi i te pae o te roro ia ore ia ou‘a, tei nia hoi oia i te fare tahua Sky Tower i Auckland i Niu Zelani, 328 metera te teitei. Ua parau Graham, “ua hinaaro tera taata e paraparau i te tahi Ite no Iehova. Ua niuniu mai te mau mutoi no te ani e farii anei au i te tauturu atu.”

“Maoti te feia rave ohipa o te Sky Tower, ua oomo vau i te tahi ravea parururaa e ua taamu i ta ’u Bibilia maoti te hoê taura roa. Ua aratai te mau mutoi ia ’u i te tahi tahua mataitairaa, 192 metera te teitei. Haaati a‘e i tera fare tahua, mea paaina te mata‘i e te toetoe atoa. Aita te taata e hinaaro ra e ou‘a i atea roa ia ’u, te parahi ra oia i te vahi ǒaǒa o te tahi e‘a turu e tei roto i te aore to ’na nau avae.”

“Ma te tuô, ua faaite au e Ite no Iehova vau e te hinaaro ra e tauturu ia ’na. Ua pure au i roto ia ’u e muri iho, ua rave i ta ’u Bibilia e ua haamata i te paraparau.”

“Ua faataa vau i te faufaaraa o te ora, tera hoi te mana‘o tumu o te oreroraa parau ta ’u i vauvau aita i maoro a‘enei i ta matou Piha a te Basileia.”

“Ua na ô atu vau: ‘Mea faufaa oe no te Atua e ua horoa ’tu oia i te tahi ô faahiahia, te ora. No te aha e ore ai e faaite ia ’na te haafaufaa ra oe i tera ô? Ee, a haere mai na i te vahi papu.’ ”

“Ua taio atoa vau e rave rau irava Bibilia mai te Ioane 3:16 o te na ô ra: ‘I aroha mai te Atua i to te ao, e ua tae roa i te horoa mai i ta ’na Tamaiti fanau tahi, ia ore ia pohe te faaroo ia ’na ra, ia roaa râ te ora mure ore.’ ”

“Ua na ô atu vau: ‘Te here ra ïa te Atua ia oe e te hinaaro ra ia ora oe.’ ”

“I te haamataraa, e au e aita oia i tâu‘a noa ’‘e i ta ’u i parau. Ua pure au ia Iehova ia tauturu ia ’u ia haaputapû i to ’na aau. I te pae hopea, ua tia mǎrû noa oia e ua tapiri mai. Ua ahoaho roa ino oia.”

“Ua na ô mai oia: ‘Aita i maoro a‘enei, ua haere mai te mau Ite no Iehova i to ’u fare, ua tiahi râ vau ia ratou. Ua peapea roa vau no ta ’u i rave. E faaore anei oe i ta ’u hara?’ ”

“Ua parau atu vau: ‘Mai tera atoa vetahi o matou na mua ’‘e a riro ai ei Ite no Iehova. Mea papu, e faaore Iehova i ta oe hara.’ ”

“Ua pahono mai oia: ‘Mauruuru, ua haapeapea mau te reira ia ’u.’ ”

“Ua na ô faahou atu vau: ‘Ite oe, aita vau e hinaaro ia mauiui oe. E ravea parururaa to nia ia ’u, o oe râ, ia hee noa ’tu oe, e ere roa oe i te ora faufaa mau. E peapea roa Iehova ia tupu te reira. Ee, a haere mai na i te vahi papu.’ ”

“Ua taui to ’na huru. Na ô mai nei: ‘Na reira. E haere atu vau.’ ”

“Ua haere mai nei oia i nia i te tahua mataitairaa e oioi noa te mau mutoi i te aratai ia ’na i te vahi papu. Hoê hora to mâua paraparauraa.”

Te tâu‘a mau ra te mau Ite no Iehova i te taata, i te feia iho â râ e hepohepo ra. Na te ao nei, e faaohipa ratou i te mau Papai no te horoa i te tamahanahanaraa e te tiaturiraa. E haapapu ratou e te tâu‘a mau ra te Atua i te taata.