Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Ua faaora i te taata noa ’tu e mahana faaearaa ohipa ta ’na

Ua faaora i te taata noa ’tu e mahana faaearaa ohipa ta ’na

I te Tapati 5 no Tenuare 2014, tei roto Serge Gerardin i te pereoo mataeinaa no te haere i te tahi tairururaa a te mau Ite no Iehova piri atu ia Paris i Farani. Ite atura oia i te tahi ati purumu, ua faatia oia: “Ua û te pereoo i nia i te paruru tima o te purumu, ua pee e ua tano i nia i te tahi e‘aturu, ura ’tura e ua tahuri.”

E taata tupohe auahi Serge a 40 matahiti i teie nei. Ei raatira no te tahi pǔpǔ feia tupohe auahi, hinaaro oioi atura oia e haere e hi‘o. Ua na ô oia: “Noa ’tu tei te tahi pae matou e tei nia hoi i te purumu rahi, ua ani au i te faahoro pereoo mataeinaa ia tapea e ua horo e hi‘o i te pereoo e ura ra.” Ua faaroo Serge i te taata i te tuôraa. Ua faataa oia: “E ahu faanehenehe hoi to ’u e aita e mauhaa no te tauturu atu. To ’u râ faarooraa i te taata ia tuô, ua taa ia ’u e titauhia ia faaora ia ratou!”

Ua haaati Serge i te pereoo e ite atura i te tahi taata i aueue roa e afai a‘era ia ’na i te vahi papu. Ua faataa Serge: “Ua parau mai oia e piti taata te toe ra i roto i te pereoo. I tera taime, e rave rahi pereoo tei tapea mai. No te ahu râ e te auahi, eita e nehenehe e tapiri atu.”

Ua tapea mai vetahi taata faahoro pereoo rarahi e ua haere mai e ta ratou mohina tupohe auahi. Ma te aratairaa a Serge, ua haapau roa ratou i te reira e ua faaea te auahi maa taime. Ua mau râ te taata faahoro i raro a‘e i te pereoo. Amo atura Serge i te pereoo e te tahi atu mau taata e ua huti mai ia ’na.

Ua na ô Serge: “I tera taime, ura faahou atura te auahi!” Te toe ra hoê i roto i te pereoo eita râ ta ’na e nehenehe e tatara i to ’na hatua. Tae atura te tahi atu taata tupohe auahi e e ahu mai to te feia faahoro moto to ’na. Ua faataa ’tu Serge fatata te pereoo i te paaina, faaoti atura raua i te huti i tera taata na to ’na rima. Aita maoro, paaina a‘era te pereoo.

I te taeraa ’tu te pǔpǔ tupohe auahi e te pereoo utuutu ma‘i, ua rapaau ratou i te feia pepe e ua tupohe i te auahi. Ua rapaau-atoa-hia Serge i te mea ua mutumutu e ua paapaa to ’na rima. A paiuma ’i i nia i te pereoo mataeinaa no te haere i te tairururaa, e rave rahi tei tapapa ’tu no te haamauruuru ia ’na.

Ua oaoa roa Serge to reira o ’na no te tauturu atu. Teie ta ’na i parau: “No ’u, e au e hopoia na ’u te faaoraraa i te taata i mua i to ’u Atua ra o Iehova. Ua oaoa roa vau i te tauturu i tera mau taata.”

No te ite atu â

Ia tupu te hoê ati natura, e turai te here ia tauturu

I roto ahuru tiahapa fenua, te tauturu nei te mau Ite no Iehova i tei atihia.