Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te Buka Aamu Bibilia i te fare haapiiraa

Te Buka Aamu Bibilia i te fare haapiiraa

I 2012, ua matara mai te huriraa na roto i te reo Pangasinan o Ta ’u Buka Aamu Bibilia. Te tauturu ra teie buka i te mau tamarii i Philipino e paraparau ra i tera reo. Ua tano maitai no te mea ua matara mai teie buka i te taime i faaue ai te Faatereraa hau o te haapiiraa i Philipino ia faaohipa i te reo tumu o te tamarii i te mau fare haapiiraa tuatahi.

Ua hau roa ’tu i te 100 reo te paraparauhia ra i Philipino. Eaha ïa te reo e faaohipa i roto i te mau piha i te fare haapiiraa? O te uiraa ïa i tauaparau-noa-hia mea maoro i teie nei. I 2012, ua faaite te hoê parau faataa a te Faatereraa hau o te haapiiraa e “e haapii maitai a‘e e vitiviti a‘e te tamarii ia faaohipahia te reo e paraparauhia ra i te fare.” Ei faahopearaa, ua haamauhia te porotarama parauhia “Haapiiraa reo rau niuhia i nia i te reo tumu.”

O te Pangasinan hoê o te mau reo o tei maitihia. Te vai ra râ te fifi: ia au i te faatere o te hoê fare haapiiraa, mea iti roa te papai no te taio na roto i tera reo. Ua tano maitai iho â ïa te matararaa mai Ta ’u Buka Aamu Bibilia na roto i te reo Pangasinan i te tairururaa mataeinaa a te mau Ite no Iehova i Novema 2012.

Ua neneihia e ua operehia 10 000 a‘e buka i te tairururaa. Ua oaoa roa te mau tamarii e to ratou mau metua i te fana‘o i te hoê buka i roto i to ratou reo tumu. Ua parau na hoa faaipoipo: “Ua au mau ta mâua mau tamarii i te reira, te taa maitai ra hoi ia ratou.”

I muri noa ’‘e i te tairururaa mataeinaa, ua afai te tahi mau Ite no Iehova i ta ratou Buka Aamu Bibilia i te fare haapiiraa i te oire no Dagupan. Mai te aha te huru o te mau orometua, tei fifihia hoi i te ite mai i te mau papai na roto i te reo Pangasinan? Ua au roa ratou i tera buka. E ua operehia hau atu i te 340 buka. Ua haamata oioi te mau orometua i te faaohipa i te reira no te haapii i te tamarii ia taio na roto i to ratou iho reo.

Te oaoa nei te mau Ite no Iehova e e faaohipahia teie buka no te haapii i te tamarii. Ua parau te hoê taata huri o Ta ’u Buka Aamu Bibilia: “Mea maoro matou i te iteraa i te faufaaraa ia pia i te mau papai na roto i te reo tumu o te taata ia putapû to ratou aau. No reira te mau Ite no Iehova e faaitoito ai i te huri i te Bibilia e i te mau papai Bibilia na roto e hanere reo.”

No te ite atu â

Te mau Bibilia na roto i to ratou reo

Te operehia ra ma te tamoni ore i te Huriraa o te ao apî o te mau Papai mo‘a na te feia atoa e hinaaro ra e taio i te reira.