Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Aita ratou i haapohe ia ratou

Aita ratou i haapohe ia ratou

A PORO ai i tera e tera fare, ua pate e piti Ite no Iehova i te ôe o te hoê fare. E tane mata peapea mau tei iriti mai. E i muri ia ’na, te hoê taura e tarere noa ra.

A parau ai te tane i na Ite ia tomo mai, ua ani atu raua no te aha teie taura. Faaite a‘era te tane e te tarî ra o ’na ia ’na a pate ai te ôe e ua faaoti a‘era e iriti i te opani no te taime hopea. Ua haaferuri na Ite no Iehova i tera taata e ua afai ia ’na i te taote o tei tauturu ia ’na.

Ua piahia teie aamu i roto i te hoê vea Beletita. Tera râ, ua tauturu te mau Ite no Iehova e rave rahi taata i roto i teie tupuraa. A hi‘o na i teie mau faatiaraa tei tupu i te tahi atu mau fenua.

Ua papai te hoê vahine i Heleni: Ua mauiui mau vau i ta to ’u apiti i rave e ua hepohepo roa vau. No to ’u mauiui rahi, ua hinaaro vau e haapohe ia ’u. O tera noa mana‘o tei tamahanahana mai. Ua hinaaro vau e faaea i te mauiui.

Tera râ, ua imi teie vahine i te tauturu i te taote. E i muri iti noa ’‘e, ua farerei i te mau Ite no Iehova, ua haamata i te haapii i te Bibilia e i te haere i te mau putuputuraa. “Ua fana‘o vau i rotopu i te fetii taeae te here mau ta ’u i imi noa na.” Ua papai o ’na: “Ua fana‘o vau i te hoa mau ta ’u e nehenehe e tiaturi. Mea mǎrû vau i teie nei e mea oaoa. E aita vau e haapeapea ra i te ananahi.

Te papai ra te hoê Ite no Iehova i Beretane: Ua taniuniu mai te hoê taata ta ’u i matau ma te hepohepo mau. Ua faaite mai o ’na e e haapohe o ’na ia ’na i tera iho â po. Ma te faaohipa i te mau mana‘o faufaa o te tumu parau no nia i te haapoheraa ia ’na iho i roto i te A ara mai na! no Me 2008, ua haaferuri vau ia ’na e ua faaite vau i te mau irava tamahanahana mau. I teie nei, noa ’tu to ’na mau fifi, aita o ’na e hinaaro faahou ra e haapohe ia ’na.

I Ghana, i ta ’na vahi raveraa ohipa, ua paraparau te hoê Ite no Iehova o Michael te i‘oa i te hoê vahine tei hepohepo mau. Ua ani atura Michael no te aha o ’na e hepohepo ai.

Ua faaite o ’na i to ’na hinaaro e haapohe ia ’na no te mea ua faarue ta ’na tane ia ’na no te tahi atu vahine. Ua tamahanahana Michael ia ’na e ua horoa ’tu e piti buka o te faataa ra i te mau Papai. No ta ’na i taio, aita teie vahine i haapohe ia ’na. Ua tamau o ’na i te haapii i te Bibilia e e Ite no Iehova o ’na i teie nei.

Ua faatia te hoê vea i Marite i ta te hoê Ite no Iehova i ite a poro ai.

Ua parau teie tane apî: “Ua ite au i te hoê tuio ua taamuhia te tahi pae i te faarueraa au auahi o te pereoo e te tahi atu, ua tuuhia ïa i roto i te pereoo tei tapiripirihia.

Ua horo vau i te pereoo, ua fâao na roto te maramarama e ua ite au i te hoê vahine e ta‘i ra. Ua î te pereoo i te au auahi. Ua tuô atu vau, ‘Te aha ra oe?’

A haere ai au e tatara i te opani, ua ite au e toru tamarii iti i nia i to muri mai parahiraa. Ua tatara vau i te opani e ua parau mai te mama: ‘E hinaaro vau e haere! E hinaaro vau e haere! E hinaaro vau e rave i ta ’u mau tamarii ia ’u ra.’

Taparuparu a‘era vau, ‘Eiaha e na reira, e ere teie i te ravea!’

Ua pahono mai oia: ‘E hinaaro vau e haere i te ra‘i. E e hinaaro vau e rave i ta ’u mau tamarii ia ’u ra.’

A ta‘i noa ’i o ’na, ua tuturi e ua ta‘i atoa vau. Ua taparuparu faahou vau ia ’na, ‘Eiaha e na reira.’ Ua rave a‘era vau ia ’na e ma te mǎrû ua huti mai ia ’na i rapae i te pereoo.

Tuô a‘era o ’na, ‘A faaora i ta ’u mau tamarii!’

Ua toro mai ratou i to ratou rima. E piti tamahine to reira, maha matahiti e pae matahiti, oia atoa te hoê tamaroa e piti matahiti. Te parahi noa ra ratou i muri ma te ore e hauti. Aita ratou i ite e e pohe ratou i roto tau minuti noa.

Tei rapae ratou paatoa a haere ai au e tupohe i te pereoo. Ua parahi matou paatoa i nia i te hoê patu nainai e ua parau atu vau, ‘A paraparau mai.’”

No te mau Ite no Iehova, e ô faufaa mau te ora no ǒ mai i te Atua poiete. Na te ao atoa, te tutava nei ratou i te tamahanahana i te fetii o te feia tei haapohe ia ratou. Oia atoa i te tauturu i te feia tei tamata i te haapohe ia ratou.

 

 

No te ite atu â

No te aha e faaoromai ai?

No te aha vetahi e hinaaro ai e pohe?