Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te mau video o te faaoaoa i te aau

Te mau video o te faaoaoa i te aau

“Mai te huru ra e te faaroo ra o Iehova i te aau o te mau metua.” Mea na reira to te hoê metua tane i Malaisie i te faataaraa i te anairaa video na te tamarii A riro ei hoa no Iehova.

Mai te matararaa mai te mau video matamua, ua faaineine te mau Ite no Iehova i te tahi atu no nia ia Kaleba e to ’na utuafare. Te haapii ra te mau video e vai ra i teie nei i nia i te jw.org i te tamarii i te mau haapiiraa faufaa i te pae morare e i te pae varua mai teie: No te aha eiaha ’i ratou e eiâ e e nafea ratou e pure ai i te Atua?

Ua huri-a‘ena-hia te video matamua na roto 131 reo. Ua fana‘o ïa te mau tamarii na te ao atoa i te reira.

Oaoa rahi

Te papai ra te hoê mama e pae tamarii ta ’na: “Mai te noaaraa mai te DVD Si tu écoutes et obéis, tu seras béni a hoê hebedoma i teie nei, ua mataitai matou i te reira e 50 taime.”

Te ora nei Millie, 12 matahiti, i Beretane. E huma roro to ’na tuaana 15 matahiti o Thomas te i‘oa. Te papai ra o Millie: “Te vai ra ta Thomas mau video no nia ia Kaleba i nia i ta ’na iPad. E nehenehe ïa o ’na e faaite i te reira i to ’na mau hoa i te fare haapiiraa. Mea au roa na ’na te mau himene e ua ta‘i roa te hoê tuahine a faaroo ai ia Thomas ia himene ma to ’na aau atoa. Mea faahiahia ia hi‘o atu.”

Ua faaite mai Ava e e 8 matahiti, e 9 ava‘e e e 25 mahana to ’na. Ua papai o ’na: “Mea ite roa o Kaleba e to ’na tuahine i te haapii i te tamarii.”

Te papai ra o Mikaylah: “E ono matahiti to ’u. Mauruuru no te DVD Si tu écoutes et obéis, tu seras béni. Te haapii maira te reira ia ’u ia faaroo i to ’u na metua no te mea e faaoaoa te reira ia Iehova.”

Haapiiraa faufaa

Ua mataitai te hoê taata papai hoho‘a e ere i te Ite no Iehova i te video Mea ino ia eiâ. Ua faahiahia roa oia i to ’na iho â râ faarooraa e na te hoê noa pǔpǔ nainai i rave i te reira. Ua parau oia: “Ua matau vau i te taata papai hoho‘a o te ohipa ra no te mau taiete rarahi e nainai, e i te tahi taime, i feruri na vau eaha râ te huru ia ohipa i te vahi mai tera. No te aha râ ta ratou ohipa e tutavaraa atoa? No te faaata rii i te taata tau hora noa, oti atu ai. E faataui ta outou mau video i te oraraa o te mau tamarii, e haapii ia ratou ia faataa ê i te maitai i te ino e e tauturu ia ratou ia rave i te mau faaotiraa maitai. Mea faufaa roa ta outou e rave ra, e tauturu te reira i te taata.”

E farii oioi te mau metua na te ao atoa i te reira. Te papai ra te hoê mama: “Ua mataitai ta ’u tamaiti e toru matahiti o Quinn te i‘oa i te video Ô Jéhovah, qui sera ton ami? I te afaraa o te himene, hi‘o mai nei oia ia ’u, tuu ihora i to ’na rima i nia i to ’na ouma e parau mai nei: ‘Mama, ua oaoa roa to ’u aau i te mataitairaa i teie video.’”