Eaha to roto?

Mau faaho'iraa ê

Ite no Iehova

Tahiti

Te Pare Tiairaa na roto i te reo Groenland i te afata teata

Te Pare Tiairaa na roto i te reo Groenland i te afata teata

I Tenuare 2013, a 40 matahiti te nenei-noa-raahia te vea Te Pare Tiairaa na roto i te reo Groenland. E 57 000 taata ana‘e te paraparau ra i te reo Groenland, hoê o te mau reo paraparauhia e te nunaa Inuit.

Hanere pae ahuru noa Ite no Iehova i Groenland. Te neneihia nei râ e 2 300 vea Te Pare Tiairaa na roto i te reo Groenland. Te auraa ïa e te rahiraa taata e taio nei i te Napasuliaq Alapernaarsuiffik (te i‘oa o te vea na roto i te reo Groenland), e ere ïa i te Ite no Iehova.

I te afata teata, ua uiuihia te tiaau o te piha ohipa huriraa i te oire no Nuuk. Ua faataa o ’na: “Te anaanatae rahi nei te taata e rave rahi no Groenland i te Bibilia e no reira ratou e taio ai i te Napasuliaq Alapernaarsuiffik.”

Ua uiui-atoa-hia te hoê taata huri tei fanauhia i Groenland. A anihia ’i o ’na eaha ta ’na e au ra i roto i te vea, ua parau o ’na: “Ua tauturu rahi mai te taioraa i teie vea ia ’u. Ei hi‘oraa, ua faaite mai te reira e nafea e noaa ’i te hoê huru oraraa viivii ore. Mea puhipuhi roa vau i te avaava i na mua ’‘e noa ’tu e ua ite vau e mea ino te reira no to ’u ea. Te parau nei râ te Bibilia e mai te peu e hinaaro tatou i te hoê huru oraraa viivii ore, e mea tia ia vai viivii ore noa to tatou tino.”

Ua faaite te afata teata e tei Groenland te mau Ite no Iehova mai te afaraa o te mau matahiti 1950 e ua nenei ratou i te mau buka e buka rairai na roto i te reo Groenland. Na te mau rima tauturu no Danemata e no Groenland e huri nei i teie mau papai e ta ratou fa, oia hoi ia hee noa te taioraa o ta ratou huriraa.

Ua parau te hoê taata e ora ra i Groenland e mea maoro to ’na riroraa mai ei Ite no Iehova: “A 25 matahiti i teie nei to ’u pororaa i te mau taata no Groenland e e pinepine vau i te ite i te faufaaraa ia fana‘o i te mau papai na roto i to ratou reo. I te tahi mau tuhaa fenua moemoe, e terehia e te pahi i te tahi noa mau ava‘e i te matahiti, te vai ra te mau taata e au ra i te taio i ta matou mau vea. Noa ’tu e mea varavara matou i te farerei ia ratou, e hapono tamau atu matou i te rata e te papai.”

Mai Tenuare 2013, e piahia te neneiraa no te haapiiraa e no te taatoaraa o te vea Te Pare Tiairaa na roto i te reo Groenland. E nehenehe atoa e taio e e rave mai i teie mau vea i nia te jw.org, te tuhaa “Papai” a maiti atu ai i te reo Groenland e a pata atu ai i nia “Imi.”