Eaha to roto?

Mau faaho'iraa ê

Ite no Iehova

Tahiti

Tauturu i te mau matapo i Afirika

Tauturu i te mau matapo i Afirika

Aita te mau matapo no te tahi mau fenua navai ore e fana‘o hoê â mau ravea e te mau matapo no te tahi atu mau fenua. Aita paha ratou e tâu‘ahia aore ra tauturuhia no te faaruru i te mau fifi a rave ai i te mau ohipa ohie no vetahi ê. Ei hi‘oraa, e ere i te mea ohie no ratou ia haere i te fare toa no te hoo mai i te maa, ia rave i te pereoo mataeinaa aore ra ia aufau i te tahi tao‘a. Mea fifi atoa te taioraa no ratou. Aita ratou pauroa e taio i te papai Braille (papai no te mau matapo). E ia ite ana‘e ratou, aita paha e papai na roto i to ratou iho reo.

Ua hau atu i te 100 matahiti to te mau Ite no Iehova neneiraa i te mau papai Bibilia no te mau matapo. Aita i maoro, ua hapono te mau Ite no Iehova i te mau matini neneiraa e tahoêraa buka i roto i te papai Braille mai te mau Pays-Bas e tae atu i Malawi. E nehenehe ïa te mau matapo e fana‘o i te mau neneiraa i roto i te papai Braille reo Chichewa, hoê reo paraparauhia i Malawi.

E taeae aravihi Leo no te neneiraa i te mau papai i roto i te Braille i te amaa a te mau Ite no Iehova no Beresilia. Ua afaihia oia i Malawi no te tauturu i te hoê pǔpǔ e pae taata ia haapii e nafea ia faaohipa i te mau matini neneiraa buka. Oia atoa te hoê porotarama roro uira faaineinehia na te mau Ite no Iehova no te mau matapo. No te faaohipa i tera porotarama, e mea tia na mua ia tuu atu i roto te mau reta e tapao reo Chichewa e te mau tapao papai Braille. E nehenehe ïa tera porotarama e faariro i te mau reta reo Chichewa ei tapao Braille. E nehenehe atoa te reira e taui i te rahi o te mau tapao ia ohie a‘e te taioraa a te mau matapo. A hi‘o na eaha ta vetahi no Malawi i parau a noaa ’i ta ratou mau papai i roto i te Braille.

Munyaradzi, hoê vahine matapo e 30 matahiti to ’na. Te ohipa nei oia afa mahana i te hoê taiete haapurororaa radio. E haapii atoa oia ia vetahi ê no nia i te Bibilia 70 hora i te ava‘e. Teie ta ’na i parau: “Ua matau vau i te fana‘o i te mau papai i roto i te Braille reo Beretane. Ua putapû roa râ to ’u aau i te noaaraa ia ’u te reira na roto i to ’u iho reo. Ua mauruuru roa vau i te mau tutavaraa e ohipa ta to ’u mau hoa Ite no Iehova i rave ia fana‘o matou i tera mau papai. E au ra e aita matou i haamoehia. Mea faufaa atoa matou.”

Francis, hoê Ite no Iehova no te pae apatoerau o Malawi. No te mea e matapo oia, na vetahi e taio no ’na. A noaa ’i râ ia ’na no te taime matamua te mau papai i roto i te Braille reo Chichewa, ua parau oia: “E moemoeâ anei teie? Mea faahiahia roa te reira!”

Loyce, hoê tavini taime taatoa e matapo atoa. Ua tauturu oia e 52 taata ia haamaitai i to ratou oraraa. Mea nafea? E haapii oia i te mau taata ma te faaohipa i te mau papai i roto i te Braille area ta ’na mau piahi, e papai e ere no te mau matapo ïa. Ua neneihia pauroa tera mau papai na te mau Ite no Iehova.

Te faatere ra Loyce i te hoê haapiiraa Bibilia

Leo, te taeae haapii no Beresilia tei faahitihia na mua ’tu. Ua na ô oia: “E oaoa rahi ia horoa i te mau papai Bibilia i roto i te Braille e ia ite i te huru o te mau taata ia taa ana‘e e e papai te reira na roto i to ratou iho reo. Ua faaite te rahiraa i te mauruuru ia Iehova e oaoa no te mea e nehenehe ratou e faaineine ia ratou iho no te mau putuputuraa Kerisetiano e te ohipa pororaa. E ere faahou na vetahi ê e taio no ratou. I teie nei, e rave te mau matapo i ta ratou iho haapiiraa e e mea ohie a‘e ïa ia tauturu i to ratou utuafare ia haere i mua i te pae varua. E tauturu taua mau papai ra ia ratou ia haafatata ’tu â ia Iehova.”

No te ite atu â

TE PARE TIAIRAA

E nehenehe anei e ite i te Atua hi‘o-ore-hia?

A haapii e nafea ia faaohipa i ‘te mata o to aau.’