I te 7 no Atopa 2013, ua faaoti te mau Ite no Iehova i te hoê ravea apî faaohipahia i nia i te mau matini afaifai no te taio e te haapii i te Bibilia. O JW Library. E ravea Bibilia tamoni ore o te puohu e ono huriraa Bibilia na roto i te reo Beretane, mai te King James Version aore ra te neneiraa faaapîhia o te Huriraa o te ao apî o te mau Papai moˈa (Beretane) tei matara i 2013. a

Eaha te fa?

Te faaohipa ra e mirioni mau taata i te mau matini afaifai parauhia ra smartphones aore ra tablettes no ta ratou ohipa e aparauraa. E nehenehe te mau taata e faaohipa ra i taua mau matini afaifai e imi i te mau papai no te taio e te haapii i te Bibilia i nia jw.org. No te aha ïa te JW Library i faaineinehia ˈi?

A tahi, ia tuuhia teie ravea i nia i te matini afaifai, aita e faufaa te natirara no te faaohipa i te reira. Te piti, ua faaineinehia teie ravea no te tauturu i te feia taio ia imi ohie noa i te mau Papai e ia haapii maite i te Bibilia. E nafea ïa?

E tauturu te JW Library ia haapii i te Bibilia

I te matararaa matamua o te JW Library i nia i ta oe matini afaifai, e ite oe i te iˈoa o te mau buka Bibilia. Ia maiti oe i te buka Bibilia hinaarohia, e matara mai te tahi atu apî o te faaite i te mau pene o taua buka. Tau tetoni noa no te imi i te tahi irava Bibilia. E horoa teie ravea i te tahi atu mau haamaramaramaraa no te haapiiraa Bibilia:

• Te mau nota o te faaite ra i te tahi atu mau huriraa aore ra haamaramaramaraa hau.

• Te mau irava faahororaa taaihia i te tahi atu mau irava Bibilia.

• Hoê tuhaa no te imi ohie i te mau taˈo aore ra pereota hinaarohia.

• Hoê haapotoraa o te mau pene i te omuaraa o te buka Bibilia taitahi.

• Hoê tapura te faaite ra i te iˈoa o te taata papai i te buka Bibilia taitahi, te vahi, te taime e te tau papairaa.

• Hoê tuhaa peni rau te faaite ra i te mau hohoˈa fenua, tapura, hohoˈa tau e hohoˈa faataahia.

Mai te taatoaraa o te mau papai a te mau Ite no Iehova, mea tamoni ore te JW Library. Ua faaineinehia teie ravea maoti te mau ô horoa noa e ua ravehia mai e mirioni taime. (Korinetia 2, 9:7) A tamata atoa oe i te reira e e faufaahia ïa oe i teie haapueraa buka taa ê o te nehenehe e afaifaihia.