Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Rave rahi taata taio no te haruharu i te taioraa Bibilia tamoni ore

Rave rahi taata taio no te haruharu i te taioraa Bibilia tamoni ore

“Mea anaanatae roa, e puta mai te hoho‘a i roto i te feruriraa, mea peepee.”

“Mea oraora te taioraa Bibilia.”

“E ere i te mea haumani! I teie nei au i taa maitai ai i te mau aamu Bibilia ta ’u i faaroo noa na.”

Mai tera te mau parau a te feia i faaroo i te taioraa Bibilia o te buka Mataio i nia i te reni jw.org reo Beretane.

Ua haamata te mau Ite no Iehova i te haruharu i ta ratou taioraa Bibilia i 1978. Mai reira mai, ua haruharu ratou te taatoaraa aore ra te tahi tuhaa o te reira na roto 20 reo.

I te matararaa mai te Bibilia Huriraa a te ao apî i 2013 na roto i te reo Beretane, e titauhia ia faaapî i te haruharuraa o te taioraa Bibilia. Na mua ’‘e, e toru taata taio. I roto râ i te mea apî, e faaohipahia hau atu 1 000 taata taio no te faatano i te rahiraa o te feia i roto i te mau aamu Bibilia.

I te mea ua rau te taata taio, e nehenehe te feia e faaroo e taa maitai i te tupuraa mau o te mau aamu Bibilia. E ere râ te haruharuraa mai to te hoê hautiraa teata, eita hoi e faaroohia te mau ta‘i taa ê e te upaupa. E faatanohia râ te reira ia oraora maitai te taioraa.

E titauhia ia faanaho maite i te tapura ohipa no te rahi o te feia taio. Na mua, e hi‘opoa maitai te mau taeae i te aamu no te ite o vai te paraparau ra, eaha te auraa o te mau irava e eaha te toparaa reo e tano i tera e tera tupuraa. Na ratou e feruri to vai reo te faaohipahia no te tahi aposetolo aita te i‘oa i faaitehia i roto i te aamu Bibilia. Na ratou atoa e faaoti e tano te hoê reo taiâ no Toma e te hoê reo peepee no Petero.

E haapao-atoa-hia te matahiti o te taata o te aamu. E faaohipahia te reo o te tahi taata apî no te aposetolo Ioane i to ’na apîraa. Area i to ’na ruhiruhiaraa, te reo o te tahi taeae matahiti paari.

Hau atu â, e titauhia ia imi i te feia o te taio maitai. Ua maitihia te rahiraa i roto i te mau Kerisetiano e tavini ra i te amaa a te mau Ite no Iehova i Marite. E ravehia te tahi mau hi‘opoaraa na mua. E anihia i te feia taio ia faaineine e ia taio i te tahi paratarafa o te vea A ara mai na! E taio atoa ratou i te hoê tuhaa o te tahi aparauraa Bibilia e itehia ’i te mau huru mai te riri, te oto, te oaoa aore ra te toaruaru. I muri a‘e i tera mau hi‘opoaraa, e taahia mai te aha te aravihi o te feia taio e e tano ratou no teihea huru taioraa.

Ua horoa-ana‘e-hia ta ratou tuhaa, e haere te feia taio i te tahi o te mau piha haruharuraa i Brooklyn, Patterson aore ra Wallkill. E ara te tiaau o te haruharuraa ia tano te toparaa reo o te taata taio. E faaohipa raua toopiti i te tahi papie faaineine-taa-noa-hia o te horoa ra i te mau aratairaa no nia i te mau vahi faataimeraa e te mau mana‘o faufaa o te mau irava. E faaohipa atoa te tiaau i te haruharuraa tahito o te Huriraa a te ao apî no te tauturu ia ’na.

E ravehia te tahi mau faatanoraa i te haruharuraa. I te tahi mau taime, e ravehia e rave rau haruharuraa o te tahi mau parau aore ra pereota ia maitai roa te taioraa.

Aita i itehia ehia taime te titauhia no te haruharu i te taatoaraa o te taioraa Bibilia Huriraa a te ao apî tei matara mai i 2013. Tera râ, ia oti te tahi buka i te haruharuhia, e tuuhia te reira i nia i te reni jw.org. I nia i te tapura o te mau buka Bibilia, e ite-atoa-hia te tahi tapao i pihai iho i te i‘oa o te buka.

No te ite atu â

No te aha te mau Ite no Iehova i nenei ai te Huriraa o te ao api?

No te aha e mea taa ê ai te huriraa o te Huriraa o te ao api?

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?