Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te hoê buka rairai o te haapii atu maoti te hoho‘a

Te hoê buka rairai o te haapii atu maoti te hoho‘a

Te ora nei Odval i Mongolie. Aita o ’na i papu maitai ehia matahiti to ’na. Te mana‘o nei râ o ’na e ua fanauhia oia i 1921. Mea apî roa Odval a haapao ai o ’na i te mau animara a to ’na mau metua e ua haere oia i te haapiiraa hoê noa matahiti. Aita râ i maoro a‘enei, maoti te hoê buka rairai e te û rau, ua tia ia ’na ia ite o vai te Atua. Ua haapii atoa mai o ’na eaha te a muri a‘e oaoa e tiai ra i te feia e faaroo ia ’Na. Ua putapû roa to ’na aau i te reira.

Ua piahia teie buka rairai i 2011 e te mau Ite no Iehova. E piti huru buka rairai. E hoho‘a nehenehe mau to roto i na buka rairai e piti, hoê noa râ taa-ê-raa: mea iti a‘e te tatararaa i roto hoê.

Fatata roa te buka rairai mea rahi a‘e te tatararaa, oia hoi Faaroo i te Atua no te ora e a muri noa ’tu, i te hurihia na roto e 583 reo. Area te tahi atu, Faaroo i te Atua, ua hurihia ïa na roto e 483 reo. A faaau na i te reira i te “Déclaration universelle des droits de l’homme” a te mau Nunaa Amui tei hurihia na roto e 413 reo i Atopa 2013. Hau atu â, ia taio-amui-hia na buka rairai e piti, fatata e 80 mirioni tei operehia.

I Beresilia, ua farii te hoê vahine paari ma te oaoa i te buka rairai Faaroo i te Atua e ua parau: “Mea oaoa ia ite e te vai ra te taata o te haapao ra i te feia mai ia ’u. Aita vau i farii a‘enei i ta outou mau vea no te mea aita ta ’u e nehenehe e taio. Te hinaaro nei râ vau i teie buka rairai.”

Ua parau Brigitte, te hoê vahine e ora ra i Farani e o tei ore i ite i te taio e i te papai: “E hi‘o vau i te mau hoho‘a o te buka rairai i te mau mahana atoa.”

Te papai ra te hoê Ite no Iehova no Afirika Apatoa: “Teie te buka rairai maitai a‘e no te faaite i te parau mau i te taata reo Tinito. Ua parahi au e te tahi mau taata tuite tuatoru, e taata maramarama roa ïa, oia atoa e te feia o te fifi ra i te taio. Maoti te buka rairai Faaroo i te Atua no te ora e a muri noa ’tu, ua tia ia ’u ia faaite oioi i te mau haapiiraa tumu Bibilia. I roto noa afa hora, ua haamauhia te niu o te hoê haapiiraa Bibilia.”

Ua haapii e piti Ite no Iehova i Heremani i te Bibilia i na hoa faaipoipo aravihi. Ua maere roa te tane i te buka rairai e ua parau: “No te aha aita ’i orua i horoa a‘ena mai i teie buka rairai? Ua tauturu mai te reira ia ’u ia taa ma te ohie i te mau tupuraa e te mau faahitiraa i roto i te Bibilia.”

Ua parau te hoê vahine tari‘a turi i Auteralia: “E rave rahi matahiti, ua ora vau e te mau paretenia i roto i te hoê fare monahi. Aita ’tu taata tei piri roa ’‘e i te mau tia o te ekalesia i ia ’u. Aita hoê a‘e râ o ratou tei haapii mai eaha te Basileia o te Atua. Ua tauturu mai te mau hoho‘a i roto i teie buka rairai ia taa eaha mau na te auraa o te Mataio 6:10.”

Te papai ra te amaa a te mau Ite no Iehova i Kanada: “I muri iho i te iteraa i te buka rairai Faaroo i te Atua na roto i te reo Krio, ua parau te taata e rave rahi no Sierra Leone mai o te ora ra i ǒ nei e te ohipa puai nei te mau Ite no Iehova no te faaite i te poroi Bibilia. Ua parau vetahi, ‘Te haapao nei outou i te tahi atu, e ere mai te taata e rave rahi.’”

No te ite atu â

Te Pare Tiairaa: Te vea opere-rahi-a‘e-hia na te ao nei

Te pia e te nenei nei matou i te vea Te Pare Tiairaa na te ao nei na roto e hau atu i te 190 reo. Nafea ïa ia faaauhia te reira i te tahi atu mau papai?