Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te mau Bibilia na roto i to ratou reo

Te mau Bibilia na roto i to ratou reo

Te opere ra te mau Ite no Iehova i te Bibilia Huriraa o te ao apî o te mau Papai mo‘a i te taata atoa e hinaaro ra e taio i te reira.

E miria Bibilia e e rave rahi huriraa tei neneihia na te mau totaiete Bibilia rau. Tera râ, mea rahi te taata te ore e fana‘o ra i te Bibilia na roto i to ratou reo no te veve e no te mau mana‘o oti noa i te pae faaroo. No reira te mau Ite no Iehova i pia ’i i te Huriraa o te ao apî na roto hau atu 115 reo.

Teie te tahi mau hi‘oraa:

  • Rwanda: Te faataa ra o Silvestre raua Venantie, e maha tamarii ta raua: “Mea veve roa matou. Eita ta matou e nehenehe e hoo mai i te Bibilia na te melo taitahi o to maua utuafare. I teie nei râ, e Huriraa o te ao apî ta matou taitahi na roto i te reo Kinyarwanda e e taio amui matou i te reira i te mau mahana atoa.”

    I taua fenua ra, ua na ô te hoê tia no te Ekalesia Beretane: “E Bibilia teie ta ’u e taa ra. Mea maitai a‘e teie huriraa i te tahi atu mau Bibilia ta ’u i taio. Te anaanatae mau ra iho â te mau Ite no Iehova i te taata!”

  • République démocratique du Congo: Aita te tahi mau haapaoraa i farii i te hoo atu i te Bibilia na te mau Ite no Iehova na roto i te reo Lingala, hoê o te mau reo paraparau-roa ’‘e-hia i taua vahi ra.

    E ere ïa i te mea maere e, mai te matararaa mai te Huriraa o te ao apî o te mau Papai mo‘a na roto i te reo Lingala, ua faaohipa e ua opere atu â te mau Ite no Iehova no Congo i te reira! A faaitehia ’i e ua mataraa mai te Huriraa o te ao apî o te mau Papai mo‘a na roto i te reo Lingala i te hoê tairururaa rahi a te mau Ite no Iehova o tei tupu i te hoê tahua tuaro, ua oaoa roa te taatoaraa. Ua haere atoa te mau mutoi i reira e tii i ta ratou iho Bibilia.

  • Fiti: I na mua a‘e, mea moni roa te Bibilia na roto i te reo Fiti. Ua faaohipa ïa te Ite no Iehova e rave rahi i te Huriraa o te ao apî na roto i te reo Beretane. I 2009 râ, ua fana‘o te taata no Fiti i te Huriraa o te ao apî o te mau Papai Heleni Kerisetiano (Faufaa apî) na roto i to ratou reo.

    Mea maramarama mau te Huriraa o te ao apî na roto i te reo Fiti. Tera te maereraa rahi o te hoê taata o tei ani i te hoê Bibilia na ’na. Teie râ, ua faataa ’tu te mau Ite no Iehova no ǒ e e mea tia ia tiai hoê ava‘e ia tae faahou mai te mau Bibilia i roto i to ’na oire. Aita o ’na i hinaaro e tiai. Ua farii ïa o ’na i te farerei i te hoê Ite no Iehova e 35 kilometera i te atea o te nehenehe e horoa i te hoê Huriraa o te ao apî na ’na. Ua na ô teie taata: “Mea maitai a‘e teie huriraa i ta matou e faaohipa nei. Mea papu e mea ohie ia taa.”

  • Malawi: A haamata ’i Davide i te haapii i te Bibilia e te mau Ite no Iehova, ua haere atu te tahi mau melo o te faaroo Bapetizo i roto i to ’na fare e ua haru mai i te Bibilia ta ratou i horoa ’tu na ’na. Tera râ, ua tupu roa ta Davide i moemoeâ noa na a mataraa mai ai te Huriraa o te ao apî na roto i te reo Chichewa.

    I te mea e mea moni roa te Bibilia i Malawi, i uiui na Davide e nafea e noaa ’i ia ’na te tahi atu Bibilia. A fana‘o ai oia i te Huriraa o te ao apî, ua parau oia: “Mea maitai a‘e teie Bibilia i ta ’u Bibilia tahito!”

Ua matara mai te tuhaa matamua o te Huriraa o te ao apî na roto i te reo Beretane a hau atu e 60 matahiti i teie nei. I tera tairururaa rahi i te oire no New York, teie tei faaitoitohia i te feia i tae mai: “A taio pauroa. A haapii i te reira . . . A tuu i te reira i roto i te rima o vetahi ê.” Ia naea tera fa, ua nenei te mau Ite no Iehova hau atu 175 mirioni Huriraa o te ao apî. Hau roa ’tu â, e nehenehe outou e taio i te Bibilia i nia i teie reni na roto hau atu i te 50 reo.

 

No te ite atu â

E nafea te mau papai a te Ite no Iehova e faaineinehia ’i, a hurihia ’tu ai?

Te nenei nei matou i te mau papai na roto e 750 tiahapa reo. No te aha?