Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Hoê Bibilia e piti metera i te roa

Hoê Bibilia e piti metera i te roa

Hou a ani ai oe i te mau Ite no Iehova i te hoê Bibilia i roto i te papai parauhia braille, a haapao maitai e vahi anei to oe no te tuu i te reira. Ua piahia te taatoa o te Huriraa o te ao apî na roto i te papai braille reo Beretane, Paniora e Italia. E tahoêraa te reira o e 18 e tae atu i te 28 buka. E titauhia ïa te hoê pa‘epa‘e e piti metera i te roa!

Te vai ra te tahi atu mau ravea faaohipahia no te faaiti i te rahi o te Bibilia na roto i te papai braille. E nehenehe te feia matapo e fana‘o i te tahi matini afaifai o te tauturu ia ratou ia rave i te mau tapaopaoraa na roto i te papai braille. E ravea te reira o te faaohipa i e rave rahi mau pine te nehenehe e faateitei aore ra e tuu i raro no te faatupu i te mau tapao braille. E ravea atoa tera o te tauturu i te feia matapo ia noaa i te mau haamaramaramaraa tei tapeahia i roto i te roro uira. E nehenehe ïa ratou e imi e e faaroo i te mau papai maoti te hoê porotarama roro uira o te taio i te papai ma te reo puai.

Hau atu â, ua haamau te mau Ite i te hoê porotarama roro uira o te huri i te mau papai na roto i e rave rahi reo braille. E tia na mua roa ia maiti i te reo o te papai e o te mau tapao braille no te faaohipa i tera porotarama. E nehenehe atoa te reira e taui i te rahi o te mau tapao papai braille no te faaohie i ta ratou taioraa. Maoti tera ravea, e neneihia te mau papai mai te Bibilia na roto i te papai braille i te mau reo atoa te vai ra te piapa braille, e reta Roma anei aore ra aita.

E hanere tiahapa matahiti ta te mau Ite neneiraa i te mau papai Bibilia no te feia matapo. E itehia te reira na roto e 19 reo i teie nei. Noa ’tu e e fana‘o te feia matapo i taua mau papai ra ma te tamoni ore, e rave rahi o te pûpû i te tahi ô.

Na mua ’‘e, ia faaarahia te feia e faaroo ra i te neneiraa o te hoê papai apî i te mau tairururaa a te mau Ite, e parau-atoa-hia ia tiai rii no te fana‘o i te reira na roto i te papai braille. I te matahiti i mairi a‘enei, ua ani te amaa no Marite i te mau amuiraa teihea tairururaa te feia matapo e haere e eaha te ravea ta ratou e matau i te faaohipa no te taio: te ravea papie, te hoê matini afaifai no te mau tapaopaoraa braille aore ra te hoê porotarama roro uira o te taio i te mau papai ma te reo puai.

Ua haponohia te tahi mau neneiraa na roto i te papai braille i te mau tairururaa e vai ra te feia matapo. Ua nehenehe ïa ratou e fana‘o i te mau papai apî hoê â taime e te taatoaraa. Ua hapono-atoa-hia te reira i te feia matapo na roto i te hoê e-mail hoê hebedoma i muri a‘e i te tairururaa.

Ua parau hoê Ite matapo e: “Mea faahiahia roa ia fana‘o i te papai hoê â taime e te taatoaraa. Te na ô ra te Salamo 37:4 e na Iehova e horoa mai i ta to aau e hinaaro ra. Tera iho â ta ’na i rave i teie tairururaa!” Ua ta‘i te tahi atu ma te parau e: “Ua tâu‘a ratou ia ’u. Mauruuru ia Iehova no te aupuru maitai ia matou.