Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te pâmuraa toto: Eaha ta te mau taote e parau ra i teie nei?

Te pâmuraa toto: Eaha ta te mau taote e parau ra i teie nei?

E ahuru matahiti i teie nei, ua faaino-noa-hia te mau Ite no Iehova no te oreraa e farii i te pâmuraa toto. Aita hoi ratou e na reira no te mea te faaue ra te Bibilia ia haapae i te toto. I te tahi mau taime, ua patoi atu te mau taote o tei mana‘o e haa no te maitai o to ratou feia ma‘i.—Ohipa 15:29.

Te rahi noa ’tura râ te taote aravihi te faataa nei i te mau maitai i te pae rapaauraa ia faaohipa i te mau ravea te ore e titau i te pâmuraa toto.

I 2013, i roto i te hoê o ta ’na mau vea, ua pia te fare haapiiraa tuatoru i te pae rapaauraa no Stanford i te hoê parau faataa taa ê i nia i te toto. (Stanford Medicine Magazine) Teie te upoo parau o te tahi tumu parau ta Sarah Williams i papai i roto: “Te oreraa e rave mai tei matauhia: No te aha e faaiti ai i te pâmuraa toto?” Te parau ra o ’na e i teie na ahuru matahiti i mairi, mea rahi te hi‘opoaraa tei faaite e te faaohipa nei te mau fare ma‘i na te ao e rave rahi roa toto i tei titauhia ia maitai mai te hoê taata ma‘i. E na reira ratou i roto i te piha tâpûraa e te piha o te fare ma‘i.

Ua faahiti tera taata papai ia Patricia Ford, na ’na i haamau i te pu no te rapaauraa e te tâpûraa ma te ore e faaohipa i te toto i te fare ma‘i no Pennsylvanie. O ’na atoa te faatere ra i tera pu. No ’na, te mana‘o papu ra te taote e e pohe te taata aita ana‘e e naea ia ratou te tahi faito toto. Oia atoa e o te toto te ravea maitai a‘e no te faaora mai i te taata. Ua na ô â oia e ua tano iho â te reira i roto i te tahi mau tupuraa taa maitai, * i roto râ i te rahiraa, e ere ïa i te mea tano.

Te rapaau ra te taote Ford e 700 a‘e Ite no Iehova i te matahiti taitahi. Ua parau o ’na e mea rahi te taote ta ’na i paraparau atu o tei mana‘o na ma te hape e mea rahi te taata ma‘i te pohe ia ore ratou e pâmuhia i te toto. Tera atoa ta ’na i mana‘o na i nia i te tahi faito. Ua ite oioi râ o ’na e e nehenehe e rapaau i tera mau taata ma‘i ma te faaohipa i te tahi mau ravea ohie ia rave.

I Atete 2012, ua faaite te hoê vea (Archives of Internal Medicine) i te hoê hi‘opoaraa o tei ravehia e 28 matahiti i te maoro i roto i te hoê pu i nia i te feia ua tâpûhia to ratou mafatu. Ua ora maitai a‘e te mau Ite no Iehova i te feia i roto i te hoê â tupuraa o tei pâmuhia i te toto. Mea iti a‘e te mau haafifiraa a te mau Ite no Iehova a faaea ’i ratou i te fare ma‘i, mea rahi a‘e tei ora mai i te tâpûraa e hoê â huru e 20 matahiti i muri a‘e.

Teie ta te hoê tumu parau i roto i te hoê vea (The Wall Street Journal) tei piahia i te 8 no Eperera 2013 i parau: “E rave rahi matahiti i teie nei te raveraahia te mau tâpûraa ma te ore e faaohipa i te toto i nia i te feia ma‘i o tei ore i hinaaro i te pâmuraa toto no to ratou faaroo. Te rahi noa ’tura te na reira nei i roto i te mau fare ma‘i. . . . Te na ô ra te mau taote tâpû o te turu nei i tera huru tâpûraa e e iti mai te haamâu‘araa taaihia i te hooraa mai i te toto, te faaherehereraa, te faataa-ê-raa i te mau tuhaa o te toto, te hi‘opoaraa e te pâmuraa i te toto. Hau atu â, e iti atoa mai te ma‘i haapê taaihia i te pâmuraa toto e te mau haafifiraa e faaea maoro ai te taata i te fare ma‘i.”

E ere ïa i te mea maere teie parau a Robert Lorenz, faatere e haapao ra i te toto no te fare ma‘i no Cleveland: “E mana‘o oe e te tauturu ra oe i te taata ma‘i ma te pâmu ia ’na i te toto . . . Ia au râ i te itehia ra i nia i te hoê tau maoro, e ere roa ’tu.”

^ par. 5 No te ite i to te mau Ite no Iehova mana‘o no nia i te toto, a hi‘o i te tumu parau “Uiraa a te taata—No te aha outou e ore ai e farii i te pâmuraa toto?