Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te hoho‘a 1 no Warwick (Me tae atu i te Atete 2014)

Te hoho‘a 1 no Warwick (Me tae atu i te Atete 2014)

Te patu ra te mau Ite no Iehova i ta ratou pu rahi apî i Warwick, New York. Mai te ava‘e Me e tae atu i Atete 2014, ua haere te ohipa paturaa i te mau fare tahua tataîraa pereoo, piha ohipa e te piha fare nohoraa C e D i mua. Te faaite ra teie mau hoho‘a i te tahi tuhaa o te ohipa i ravehia i tera roaraa taime mea rahi te ohipa.

Te hoho‘a oti no te paturaa i Warwick (ma te faaohu mai te pae aui i nia i te pae atau):

  1. Fare tahua tataîraa pereoo

  2. Vairaa pereoo no te feia mataitai

  3. Fare tahua i te pae o te atuaturaa/Vairaa pereoo no te feia e noho ra i ǒ

  4. Fare nohoraa B

  5. Fare nohoraa D

  6. Fare nohoraa C

  7. Fare nohoraa A

  8. Piha ohipa

1 no Me 2014—vahi paturaa no Warwick

Ia hi‘ohia mai te poro i te pae apatoerau i te Sterling Forest Lake (parauhia te roto Ninamu). I mua ’tu, te hamanihia ra te hoê tahua i raro i te fenua, o te fare nohoraa D ïa. I pihaiiho i te roto, e itehia te mau patu hamanihia e te tima o tei faaineinehia no te fare nohoraa C.

14 no Me 2014—Hoê vahi i reira e hamanihia ’i te tauihaa o te faaineine-ê-na-hia

Te tamaumau ra te feia rave ohipa i te hoê fare pape parauhia te Pod, oia hoi, te vai ra te pou o te opani, te mau papai parauhia placoplâtre, te tamauraa tuio pape e te uira, e te haapuvaivairaa mata‘i e te hopuraa pape iho. E oti roa te fare pape i te tamaumauhia ia tuuhia te reira i roto i te fare tahua.

22 no Me 2014—Fare tahua no te atuatu i te mau pereoo

Tei te tahua i raro te ohipa a te feia tamaumau auri. I te roaraa o teie ohipa, e faaohipahia teie vahi ei vahi tamaaraa i na 500 taata tauturu, e i te tahi atu vahi o teie fare tahua e farii-faahou-hia 300 taata tauturu no te tamaa. I muri iho, ia oti ana ’‘e teie ohipa e tatarahia te vahi tamaaraa e e faaohipahia teie fare tahua no te atuatu i te mau pereoo.

2 no Tiunu 2014—Fare tahua no te atuatu i te mau pereoo

Te hamani ra te hoê pǔpǔ i te hoê ravea no te haaparare i te repo fenua i nia i te ta fare matie, no te paruru i te fenua. E nehenehe ïa e faaiti mai i te ito hinaarohia ia iti mai te haereraa pape ûa e e ia titia atoa i te pape ino no roto mai i te ûa.

5 no Tiunu 2014—Piha ohipa/Piha no te paturaa

Ia amuihia te taatoaraa o na fare tahua e toru, e 42 000 metera tuea te mau tahua. I ô nei, te haapaari ra te feia ohipa i te mau pou auri.

18 no Tiunu 2014—Fare tahua no te atuatu i te mau pereoo

Te faaohipa ra te feia rave ohipa i teie tao‘a parauhia brûleur à propane no te tapiri i te tapau i nia i te ta fare e na te mau taura taamuhia e paruru i te feia paiuma.

24 no Tiunu 2014—Fare nohoraa C

Te tamaumauhia ra te mau faahaereraa tuio o tei hamani-ê-na-hia e te mau tauihaa no te mau matini haamahanahanaraa, haapuvaivairaa, e faatoetoeraa. E 35 i nia i te hanere o te feia rave ohipa i te vahi paturaa i Warwick, e vahine Ite no Iehova te rahiraa.

11 no Tiurai 2014—Montgomery i New York

Ua faaohipahia teie vahi mai te hoê vairaa tauihaa e e pu no te mau tauihaa o te faaineine-ê-na-hia o tei noaa mai i Fepuare 2014 no te paturaa. E 20 000 metera tuea teie vahi. I nia i teie hoho‘a te vai ra te mau tauihaa uouo i nia ’tu, o te mau fare pape hamani-ê-na-hia o te ineine no te haponoraa.

24 no Tiurai 2014—Fare nohoraa C

Ia hi‘ohia na mua ’tu nei, mai te apatoerau hitia o te râ mai o tera vahi. E nehenehe teie fare nohoraa e farii e 200 feia rave ohipa o te tauturu ra i te pu rahi. Te rahiraa o te mau fare nohoraa, fatata 30 e 55 metera tuea te rahi o te mau tahua, te vai ra ïa te vahi tamaaraa, te fare pape e te hoê taupee nainai.

25 no Tiurai 2014—Fare tahua i te pae o te atuaturaa/Vairaa pereoo no te feia e noho ra i ǒ

Te faaineineraa i te vahi paturaa. I nia ’tu i te pae aui o te hoho‘a, te vai ra te matini o te faahu‘ahu‘a ra i te ofai o te faaohipahia i muri a‘e no te paturaa. Ia oti te ohipa paturaa, 260 000 afata faito repo tei tatarahia mai te vahi paturaa i Warwick. Ia faitohia, 23 pereoo rahi faauta repo i faaohipahia i te mahana hoê i te vahi paturaa.

30 no Tiurai 2014—Fare tahua tataîraa pereoo

Te tanuraa matie i nia i te ta fare.

8 no Atete 2014—Warwick

Ia hi‘ohia na nia ’‘e te fare tahua o te mau piha ohipa mai te hoê matini hivi i te pae apatoa tooa o te râ. I raro i te pae aui, o te fare tahua ïa o te vairaa pereoo no te feia mataitai tei oti. I te mahana taitahi, ua î noa teie vahi i te mau pereoo o te feia e haere mai e tauturu. Na nia i te pereoo, 12 hora no te tahi mau Ite no Iehova no te haere mai no te tauturu e toru aore ra e maha noa mahana i te vahi paturaa.

13 no Atete 2014—Fare tahua tataîraa pereoo

Te vahi tamaaraa no te hoê noa taime poto o te fatata ra i te oti. Te mau afata teata (aita râ i tamaumauhia ’tura) e te mau haaparareraa reo ia nehenehe te feia rave ohipa e faaroo i te haamoriraa poipoi e te tahi mau porotarama pae varua i te Betela i Marite.

14 no Atete 2014—Piha ohipa/Piha no te paturaa

Te titohia ra te tima i raro i te tuhaa matamua o te tahua matamua. I te pae atau, te faaohipa ra te hoê taata rave ohipa i te hoê matini no te haaparahurahu i te tima ia ore te mata‘i e vai i roto i te tima, ia noaa mai te hoê tima o te haaparahurahu-maitai-hia e te etaeta.

14 no Atete 2014—Piha ohipa/Piha no te paturaa

I ropu i te fare tahua, te faahaereraa niuniu uira rarahi o te ineine i te tapoihia i roto i te tima i raro i te fenua.

14 no Atete 2014—Piha ohipa/Piha no te paturaa

Ua fatata te titoraa tima o te tuhaa matamua o te tahua matamua i te oti mai. E 540 afata faito tima, te faito rahi o te tima i titohia i te vahi paturaa i Warwick tae roa i tera taime. I muri iho, i te otiraa te faaineineraa o te tima i te vahi hamaniraa tima, e vau pereoo rarahi anoi tima parauhia camions-toupies e e piti pâmu tima: i roto noa e 5 hora e 30 minuti te titô-raa-hia tera tima i raro i te tuhaa matamua. I ropu i tera hoho‘a, te tia ra te tahi e‘a paiumaraa o te tahua fare.

14 no Atete 2014—Fare nohoraa C

Te hamanihia ra i te hoê paruru i nia i te tafare. I muri noa mai, te patuhia ra te tahua i raro i te fenua no te fare nohoraa A.

15 no Atete 2014—Fare nohoraa C

Te hivi-hia-ra te hoê fare pape parauhia te Pod i te toru o te tahua. No te paturaa i Warwick, ua haafaufaahia te mau tauihaa tei faaineine-ê-na-hia, no te faaiti mai te apǐapǐ o te vahi paturaa e ia vitiviti te ohipa paturaa.

20 no Atete 2014—Fare nohoraa C

Te tamaumau ra te feia rave ohipa no rapae i te hoê papai tima o te faaineine-ê-na-hia no te faaiti mai i te haamâu‘araa o te ito. Ua peni-ê-na-hia te papai tima e aita e titauhia ia peni faahou e e mea iti atoa ïa te atuaturaa. E nehenehe ïa e tamaumau vitiviti i te reira no te haapao i te taime faataahia no te paturaa.

31 Atete 2014—Warwick

Na te poro o te pae apatoa tooa o te râ. I mua ’tu, te faaineinehia ra te tao‘a parauhia coffrages no te tahua i nia ’tu o te fare nohoraa D. I muri mai o te fare nohoraa C ïa te fatata i te oti.