Eaha to roto?

Mau faaho'iraa ê

Ite no Iehova

Tahiti

Ua taui te vahi o te pu rahi a te mau Ite

Ua taui te vahi o te pu rahi a te mau Ite

I Tiurai 2009, ua hoo mai te mau Ite no Iehova i te hoê tâpû fenua i te pae apatoerau o te tuhaa fenua o New York no te afai atu i ta ratou pu rahi. Te hoê tâpû fenua e 102 tâ, fatata e 80 kilometera i te atea i te pae apatoerau tooa o te râ o te mau fare tahua rau e vai ra i Brooklyn, i New York. I reira hoi ta ratou pu rahi e vai ai mai 1909 mai â.

E ora e e ohipa e 800 Ite i taua vahi apî ra. Te vai ra i reira te mau fare tahua rau: hoê no te ohiparaa, hoê no te faanahoraa e e maha no te nohoraa. E opua-atoa-hia te paturaa i te tahi fare haamana‘oraa iti no te faaite i te aamu o te mau Ite no Iehova o teie nei tau.

Ahuru ma vau tâ o te tâpû fenua i hoohia, no te patu ïa i teie mau fare tahua rau. E vaiihohia râ te uru raau e te mau fenua vari e haaati ra i te reira. No te faaneheneheraa i te aua, aita e faaohipahia te mau aua matie rarahi. Tera râ, e faatanohia te reira i te vahi uru raau i vai a‘ena ra.

Ua faaineine te feia papai hoho‘a i tera mau fare tahua rau no te faaiti i te mau haamâu‘araa i te pae o te ito e no te paruru i te natura. E iti ïa te mau faahopearaa i nia i te heipuni e te mau haamâu‘araa i te pae o te moni. Ei hi‘oraa, e tanuhia i te niaraa o te mau fare tahua rau te mau raau tanu mea paari e aita e faufaa ia atuatu rahi. E iti ïa te taheraa o te ua i reira e e faatano atoa i te anuvera i roto i taua mau fare ra. Ua faaohipahia te maramarama o te mahana no te turama i roto i tera mau fare tahua rau. Ua haafaufaa atoa ratou i te haaputuraa i te pape.

No te aha tera tauiraa? I mutaa iho ra, ua rave-noa-hia te ohipa neneiraa i te mau Bibilia e papai Bibilia i Brooklyn. I teie nei râ, e apiti mai te mau amaa a te mau Ite no Iehova na te ao nei i te reira. I 2004, ua afaihia te ohipa neneiraa e haponoraa i Wallkill, i New York, fatata e 145 kilometera i te atea i te pae apatoerau tooa o te râ o Brooklyn.

Ua hi‘o-maitai-hia te mau haamâu‘araa moni. Mea moni te faanahoraa e te atuaturaa i te mau fare tahua rau i Brooklyn. Ma te afai atu i te reira i te hoê noa vahi, e nehenehe te mau Ite e faaohipa maitai i te mau ô no te turu i ta ratou ohipa haapiiraa Bibilia.

E tia ia rave-faahou-hia te hoê hi‘opoaraa i nia i te heipuni hou a horoahia ’i te parau faatia hopea. Mai te peu e e tere maitai te mau ohipa, e haamata te ohipa paturaa i 2013 e e hope te reira i 2017.

I New York, taa ê noa i te ohipa neneiraa i Wallkill, e pu haapiiraa atoa ta te mau Ite no Iehova i Patterson. E haapao te faanahonahoraa i te mau amaa o e rave rahi mau fenua. E ua hau atu i te hitu mirioni e te afa Ite no Iehova na te ao nei.