Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

E ohipa paturaa ta te mau rima tauturu i Tuxedo

E ohipa paturaa ta te mau rima tauturu i Tuxedo

Ahuru ma pae minuti e toe i te hora hitu i te poipoi, i Tuxedo, New York. Mea ninamu te ra‘i. Te tapoi ra hoê vehî pape toetoe i te roto iti i pihai iho i te hoê fare e toru tahua. Te haere ra te mau tane e vahine apî i roto i taua fare ra. I tera noâ poipoi, ua omono ratou i to ratou ahu e tiaa no te ohipa paturaa. Ua tere ratou mai te mau hotera aore ra vahi nohoraa i Tuxedo. Oia atoa mai te tahi atu mau tuhaa o New York, mai Patterson, Walkill e tae noa ’tu Brooklyn, hoê tere e 80 kilometera.

I te mau mahana hou taua poipoi ra, ua tae mai te rahiraa mai te tahi atu mau tuhaa no Marite e mai te fenua ê no te ohipa ei rima tauturu. Vetahi no hoê hebedoma, te tahi atu no ono hebedoma aore ra hau atu. Ua aufau te mau rima tauturu i to ratou tere, eita râ ratou e aufauhia no te ohipa e ravehia. Tera râ, ua oaoa roa ratou i te taeraa mai.

I teie mahana, te vai ra e 120 rima tauturu. E maraa râ tera numera i te mau avae i muri nei. Te haere ra ratou i te vahi tamaaraa, parahi atura ahuru taata i te airaa maa taitahi. E ninii mai te tahi i te taofe no vetahi a hau‘a ’i i te ina‘i puaa farai mai te vahi tunuraa maa. I te hora hitu iho â, ua mataitai ratou i te aparauraa no nia i te hoê irava Bibilia na roto i te afata teata. Ahuru ma pae minuti i muri iho, e pûpû te mau tuati i te maa mai te ina‘i puaa farai, faraoa, huero moa e te tahi atu. Mea rahi te maa.

I muri iho i te pure faaotihia i te hopearaa o te tamaaraa, e nehenehe te ohipa e haamata. Te tauaparau nei te feia e ohipa no te paturaa ma te oaoa a omono ai i to ratou taupoo paari, titia mata paruru, pereue ite-maitai-hia e hatua taa ê no te mau mauhaa.

Teie te ohipa: ia riro te fare ohipa a te hoê taiete tuiroo no te hamani i te papie i Tuxedo ei vahi no te Pu rahi a te mau Ite no Iehova. E itehia te reira i te tahi noa ’‘e kilometera mai te purumu mai, i pihai iho i te oire no Warwick. Aita taua fare ra i tupararihia. Ua faanahohia râ te mau piha ei piha taotoraa, raveraa ohipa aore ra vairaa taihaa. I te 12 no Mati 2013, ua farii te tomite e horoa i te parau faatia i taua opuaraa ra i Tuxedo.

E nafea te mau rima tauturu i fariihia i to ratou taeraa mai i te vahi nohoraa? Teie ta William no New Jersey i parau: “I to oe taeraa mai i te vahi nohoraa, e faaite te mau taeae farii ia oe teihea ta oe piha, e nafea ia haere i ǒ aore ra ia faaohipa i te taviri. E tauturu ratou pauroa ia oe. I to oe taeraa mai i Tuxedo, e farerei oe i te raatira o te pǔpǔ paturaa i te poipoi i muri iho i te tamaaraa. E faataa ’tu oia eaha te ohipa ta oe e rave.”

Eaha te huru ia ohipa i ǒ? Ua tauturu Yajaira e ta ’na tane, no Porto Rico, no te patu i te tino fare. Teie ta te vahine i parau: “E tia maua i te hora maha e te afa i te poipoi. E tamâ maua i te piha, inu i te tahi maa taofe e haere atu ai i te pereoo mataeinaa. I te hopea o te mahana, ua rohirohi roa maua. Tera râ, e au ra e ua ata noa maua i te mahana taatoa. Mea oaoa pauroa te mau rima tauturu.”

Te vai ra hoê ururaau te haaati nei i te aua o Warwick. E tauturu Zach e ta ’na vahine Beth, no Minnesota, no te faaineine i te mau ohipa i taua vahi ra. Ua anihia raua no te aha i tae mai ai i ǒ nei. Teie ta Beth e pahono: “Te tiaturi nei maua e aita e fa maitai a‘e i te taviniraa ia Iehova. Te hinaaro mau nei maua e faaohipa i to maua aravihi no te tavini i te Atua.”