Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te hoê Piha tairururaa apî i te ururaau no Amazonie

Te hoê Piha tairururaa apî i te ururaau no Amazonie

I ropu maitai i te ururaau no Amazonie i faatiahia ’i te hoê Piha tairururaa apî a te mau Ite no Iehova. Ua patuhia te reira i nia e 52 tâ fenua i te pae apatoerau o te oire no Manaus, fenua Beresilia. E ururaau ana‘e hoi to reira, mea rahi te tumu raau parauhia cupuaçu, e ua î te reira i te mau manu e rave rau: mai te perroquet, te toucan e te vai atu â. No te aha te hoê Piha tairururaa i patuhia ’i i reira?

Te tia ra te oire no Manaus 1 450 kilometera i te atea i te muriavai no Amazonie, e e piti mirioni taata te faaea ra na reira. O vai te fana‘o i teie piha apî? E 7 000 Ite ïa o te faaea ra i Manaus e te mau oire tapiri, e tae noa ’tu i te mau oire e mataeinaa na te hiti o te anavai no Amazonie. O São Gabriel da Cachoeira te oire atea roa ’‘e ia Manaus, hau atu hoi e 800 kilometera te faataa ê ra ia raua. E haere roa e toru mahana e tere mai ai te tahi mau Ite no Iehova na nia i te vaa no te apitiraa i te mau rururaa!

E ohipa iti rahi te paturaa te tahi Piha tairururaa na te mau fenua Amazonie. Ua faauta-roa-hia mai 13 vairaa taihaa rahi na nia i te pahi mai te uahu no Santos mai, i São Paulo. Ua tere mai ïa te pahi na te roaraa o te fenua Berisilia, e mai reira mai, mea na te anavai no Amazonie i te tereraa ’tu i te vahi i patuhia ’i te Piha.

O te 27raa ïa Piha tairururaa teie i patuhia i Beresilia e i te avariraahia, ua putuputu mai 1 956 taata i te Sabati 4 no Me 2014. E rave rahi tei hotaratarahia, a tahi ra hoi ratou a putuputu mai ai i roto i te hoê Piha tairururaa.

Mai tei matauhia, ua faaroo te feia i tae mai i te mau parau atoa a te taata orero. Te vahi apî râ, ua ite atoa ratou i te taata orero. Na mua ’‘e ra hoi, i faatupuhia na te mau tairururaa i te mau vahi no te taata atoa, aita te tahua i itehia na e te taata atoa. Eaha ’tu â ïa no te ite-roa-raa ’tu i te taata orero! Te na ô ra te tahi Ite no Iehova: “Tau matahiti i teie nei to ’u haere-noa-raa i te mau tairururaa, e a tahi ra vau i ite mata roa ’tu ai i te hoê hautiraa taata ora, aore ra darama Bibilia. Ua faaroo noa râ vau ia hauti-ana‘e-hia te reira.” I teie nei râ, te taata atoa te nehenehe e ite mata ’tu i te tahua.

No te ite atu â

No te aha te mau Ite no Iehova e haere ai i te mau tairururaa?

I te mau matahiti atoa, te farerei nei tatou i roto e toru haaputuputuraa taa ê. E nafea tatou e faufaahia ’i i teie mau haaputuputuraa?

No te aha e e nafea te mau Piha a te Basileia a te mau Ite no Iehova e hamanihia ’i?

No te aha ta matou mau vahi haamoriraa e parauhia ’i Piha a te Basileia? A hi‘o e nafea te mau Ite no Iehova e faufaahia ’i i te reira.