Eaha to roto?

Mau faaho'iraa ê

Ite no Iehova

Tahiti

Te parururaa i te mau animara e tumu raau i Chelmsford

Te parururaa i te mau animara e tumu raau i Chelmsford

Ua haamata te mau Ite no Iehova i Beretane i te paturaa i ta ratou Betela apî i pihai iho i te oire o Chelmsford, i Essex. I tera vahi paturaa, te vai ra e rave rau animara e tumu raau. I Beretane, ua paruruhia te reira maoti te ture no 1981 no nia i te mau animara e tumu raau. Eaha ta te mau Ite no Iehova e rave ra i te roaraa o te paturaa no te auraro i tera ture e no te paruru i taua mau animara e tumu raau ra?

Paturaa i te vahi haereraa taa ê na te iore nainai

Ua faaohipa te mau Ite no Iehova i te mau raau o te paturaa tei toe no te hamani i te mau afata ofaaraa iti na te mau iore nainai. Ua nehenehe ïa ratou e faaatea ê i taua mau animara ra i te vahi paturaa. Ua hamani atoa ratou i te mau vahi haereraa taa ê na teie mau iore nainai. Ua tamauhia te reira na nia i te vahi tomoraa apî no te taati i te mau vahi nohoraa o teie mau animara i te mau arai raau tupu. Hau atu, te apiti ra te mau Ite no Iehova i te hoê porotarama no te atuatu i te mau arai raau tupu. I te tau taotoraa animara taitahi, e ere hoê â vahi o te mau arai raau tupu te tapûpûhia. Eita ïa te mau iore nainai e faahuehuehia. E paruru-atoa-hia to ratou vahi nohoraa e e haapapuhia e e maa noa ta ratou.

Tamauraa i te mau afata ofaaraa na te mau iore nainai

E paruru atoa te mau Ite no Iehova i te mau ophi parauhia couleuvre, te mau moo matauhia e te mau moo nainai a‘e parauhia orvet. E paimi te feia paruru heipuni i teie mau animara nee tei haere i raro a‘e i te mau niaraa fare no te faahaere ia ratou i te hoê vahi papu i rapaeau i te vahi paturaa. I te vahi nohoraa apî o teie mau animara, te vai ra te mau vahi no te tau taotoraa e te hoê paruru taa ê. Pinepine te mau Ite no Iehova i te hi‘o e mea papu iho â anei te mau paruru patuhia ia ore te mau animara e ho‘i i te vahi paturaa, e vahi atâta hoi no ratou.

Iore nainai

No te ore e haapeapea i te mau iore pererau o te ara i te po, ua faaohipahia te mau mori parauhia DEL i te vahi paturaa no te faaiti i te parareraa o te maramarama. E ama te mori ia tere te mau pereoo noa i mua i te reira. Mea maitai ïa no te mau iore pererau inaha eita te mori e ama noa. I te po, e heru te mau iore pererau i te apoo no te imi i te maa i roto i te mau arai raau tupu e haaati ra i te vahi paturaa. Ua atuatuhia ïa te rahiraa o te mau arai raau tupu e ua tanuhia hau atu â raau tupu i nia e piti kilometera e te afa i te atea. Papu maitai, ua tâpûhia vetahi mau tumu raau e ua iti mai te vahi tauraa o te mau iore pererau. No reira te feia rave ohipa i hamani ai i te mau afata apî na taua mau animara ra.

Tamauraa i te mau afata na te mau iore pererau

Te paruru nei te mau Ite no Iehova e rave rahi tumu raau faufaa mau, mai te mau tumu raau tahito roa. Ua na reira ratou ma te faahaere i te mau purumu i te hoê vahi atea i te mau a‘a o te mau tumu raau. Maoti teie mau tumu raau tahito roa, e nohoraa to e rave rau animara nee, iore pererau e manu. Ma teie mau ravea e rave rau, ua faaoti papu te mau Ite no Iehova ia paruru noa i te mau animara e tumu raau i Chelmsford.

No te ite atu â

O vai te rave nei i to Iehova hinaaro i teie mahana?

Eaha te ravehia ra i te hoê amaa a te mau Ite no Iehova?

E oaoa roa matou i te farii i te taata e haere mai e mataitai i te hoê o ta matou amaa. A haere mai!