Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Te mau haamaitairaa ia ohipa e te mau Ite no Iehova i Warwick

Te mau haamaitairaa ia ohipa e te mau Ite no Iehova i Warwick

E rave rahi taata tei maere i te feruriraa horoa noa o te mau rima tauturu o te paturaa i Warwick. Ua na ô te tahi tia faatere taiete o tei tamau i te mau ravea faautaraa taata no te mau fare tahua: “Te rave ra ta outou mau pûpû rave ohipa i te hoê ohipa faahiahia mau! Eita te rahiraa taata i teie mahana e horoa i to ratou taime ma te tamoni ore.”

Ua faaroo oia, e te tahi atu mau taata, eita te mau rave ohipa e faaaufau i to ratou taime i roto i te paturaa o te pu a te mau Ite no Iehova i Warwick i New York. Ua na ô ïa ratou, e rave te mau Ite no Iehova o tera vahi i te ohipa paturaa i te hopea hebedoma ana‘e. Ua maere ratou i te farereiraa i te taata o te ora ra ati a‘e i te Hau Amui no Marite o tei faarue i ta ratou ohipa no te turu i tera paturaa tau ava‘e aore ra tau matahiti.

I 2015, 23 000 rima tauturu Ite no Iehova tei ohipa e te utuafare o te Betela o te Hau Amui no Marite i roto i te paturaa i Warwick. Hau atu â, 750 rave ohipa, e ere i te Ite no Iehova, tei turu atu ia oti tera opuaraa i roto i te area taime faataahia. E rave rahi o ratou tei maere e tei maitaihia i te ohiparaa e te mau Ite no Iehova.

Te huru maitai o te mau rima tauturu

Teie ta te tahi taata rahi i roto i te hoê taiete hamani haamaramarama e paruru auri i papai: “Ua maere roa te mau rave ohipa o ta matou taiete i to outou huru. Tera te tumu e hinaaro ai e rave rahi o matou e ohipa noa i reira.”

Ua faataa te hoê taiete ê te tahi o ta ratou rave ohipa no te turu i te hamaniraa o te mau tino tafare o te mau fare nohoraa. I te otiraa te tuhaa a ta ratou taiete, e toru rave ohipa tei faaoti papu e faaea noa i nia i te paturaa i Warwick. Ua faarue i ta ratou ohipa e ua faaô i roto i te tahi atu taiete o te ohipa noa ra i ǒ.

Ua maitaihia vetahi feia rave ohipa i te mau huru maitatai o te mau Ite no Iehova. Tera tei tupu no te tahi rave ohipa o te taiete o tei haamau i te mau niu o te mau fare tahua. I muri a‘e tau ava‘e, ua tapao ta ’na vahine ua taui to ’na huru e ta ’na huru paraparau. Ua oaoa roa oia e ua na ô: “Ua taui roa ta ’u tane!”

Te itoito o te mau vahine Ite no Iehova

E rave rahi vahine Ite no Iehova tei ohipa atoa i ǒ. Aita ratou i faahoro noa i te mau pereoo faauta taata, tamâ i te mau piha e tapaopao i nia i te papie. Ua haapao atoa râ i te tereraa o te mau pereoo, ua faaohipa i te mau taihaa teiaha, ua tamau i te mau niuniu, ua oomo i te reira i roto i to ratou vairaa ia ore te uira ia haru, ua tamau e ua faanehenehe i te mau pǎpai, ua tuu i te mau faataheraa pape e ua tima atoa. Mea itoito roa ratou!

Ua tapao te tahi taata o tei ohipa i nia i te mau tino tafare, e tapea vetahi tane e vahine i to ratou rima a pou mai ai na roto i te pereoo mataeinaa. Ua putapû roa oia. Ua ite atoa o ’na i te mau vahine o tei ohipa ma te itoito. Ua na ô oia: “E mana‘o oioi oe, ua apee noa mai ratou i ta ratou mau tane. Ia haamata ana‘e râ matou paatoa, te ite atura oe ia ratou ia rave i te ohipa! Ua apiti au i te mau ohipa paturaa ati a‘e ia New York, a tahi ra vau a ite ai i te reira!”

Aita i faitohia a‘enei te to‘eto‘e mai tei itehia i te tau to‘eto‘e o 2014 e 2015. Mea ohie ia hinaaro e faaea i te fare i te haere e rave i te ohipa i rapae i roto i te to‘eto‘e! Te faatia ra Jeremy, te tahi Ite no Iehova o tei tiaau i te ohipa paturaa: “I te mau mahana to‘eto‘e roa, e ani mai te tiaau ohipa no te mau niu fare o te tahi taiete, ‘E haere mai anei te mau vahine e rave i te ohipa ananahi?’

Pahono atu vau, ‘E.’

Na ô mai, ‘Oia atoa te faaea i rapae no te haapao i te tereraa pereoo?’

Na ô atu vau, ‘E.’

I muri a‘e, ua parau oia i to ’na mau taata ia haere mai i te ohipa no te mea e na reira te mau vahine Ite no Iehova!”

Ua oaoa roa te feia faahoro pereoo mataeinaa

Hau atu 35 pereoo mataeinaa tei tarahuhia no te haere e tii e e faaho‘i i te mau rima tauturu o te paturaa i Warwick.

I te tahi mahana, na mua ’‘e ratou a tere ai, ua tia mai te taata faahoro i mua maitai i te feia i roto i te pereoo mataeinaa. Ua na ô oia: “Mea au roa na ’u e faahoro i te mau Ite no Iehova. A papai na i to ’u paoti ohipa ia tapea ia ’u i nia i teie tere. Mea rahi ta ’u i haapii i nia i te Bibilia na muri ia outou. Na mua ’‘e, aita vau i ite eaha te i‘oa o te Atua aore ra e riro te fenua ei paradaiso. I teie nei, aita vau e riaria faahou ra i te pohe. Ua putapû roa vau. E ite mai outou ia ’u i te Piha a te Basileia i ta ’u mahana faaearaa ohipa i mua nei.”

Te faatia ra Damiana, te tahi rima tauturu Ite no Iehova: “I te tahi mahana, otiraa matou paatoa i te paiuma i nia i te pereoo mataeinaa, ua faaite mai te taata faahoro, e poroi ta ’na na matou. Ua na ô mai oia, e 4 000 Ite no Iehova ta ’na i faahoro i te mau vahi e rave rau i New York. Teie ta ’na i parau, ‘Mea rahi te mau peu au ore a te taata, outou râ, te ohipa ra ïa noa ’tu mea taa ê te tahi e te tahi, mea hoê roa outou. Auê te faahiahia!’ Ua faaite atoa mai oia mea au roa na ’na e paraparau na muri ia matou.

Hoperaa ta ’na parau, ani atura te tahi Ite no Iehova, ‘E farii anei oe ia himene matou?’

Pahono a‘era oia ma te ata, ‘Na reira! E nehenehe anei e haamata na roto i te himene 134?’ ” *

^ par. 22 I roto i te buka Himene ia Iehova, “A feruri ia oe i roto i te ao apî.” Te faaite ra te himene 134 i te oaoa e itehia e te feia o te ora i roto i te ao apî a te Atua.

No te ite atu â

Eaha te Betela?

E vahi otahi te Betela, e mea faufaa roa te ohipa e ravehia ra i reira. A hi‘o na o vai ma te tavini ra i reira.

O vai mau â te mau Ite no Iehova?

Ehia rahiraa Ite no Iehova ta oe i matau? Eaha mau na ta oe i ite no nia ia matou?