Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Hoho‘a no Beretane: tuhaa 1 (mai Tenuare e tae atu i Atete 2015)

Hoho‘a no Beretane: tuhaa 1 (mai Tenuare e tae atu i Atete 2015)

Tei Mill Hill, i Lonedona, te Betela a te mau Ite no Iehova i te fenua Beretane. E faahaerehia râ te reira i te hoê vahi e 70 kilometera te atea mai Mill Hill i te pae Hitia o te râ, i pihai iho i te oire Chelmsford, i Essex. Mai Tenuare e tae atu i Atete 2015, ua faaineine te feia rave ohipa i tera vahi ia nehenehe te paturaa e haamata.

23 no Tenuare 2015: vahi paturaa o te Betela

I muri iho te feia mana o te oire i horoa ’i i te parau faatiaraa, ua tamâ te feia rave ohipa i te vahi paturaa ma te faahu‘ahu‘a i te mau tumu raau tei tâpûhia. Ua haapao ratou ia oti tera ohipa hou te tau ofaaraa a te mau manu e haamata ’i. Ua faaohipa ratou i te mau hu‘ahu‘a raau no te faanaho i te hoê vahi haereraa taata. Ua haaputu atoa ratou i te raau no te ohipa paturaa.

30 no Tenuare 2015: vahi tamaaraa no te feia patu

Te tamau nei te hoê taata rave ohipa i te mau patiaraa uira no te mau afata teata i te vahi faaohipahia ei hotera i na mua ’tu. E vahi tamaaraa i teie nei. Maoti te mau afata teata, e nehenehe te feia rave ohipa e mataitai i te mau porotarama pae varua mai te haamoriraa poipoi e te haapiiraa o Te Pare Tiairaa faataahia no te utuafare o te Betela.

23 no Fepuare 2015: vahi paturaa o te Betela

Te tuu nei te feia rave ohipa i te mau aua paruru o te haaati i te mau tuhaa rarahi o te vahi paturaa. Inaha e tuhaa fenua mataeinaa, ua haapaohia ia ore te paturaa e haafifi i te mau animara. Ei hi‘oraa, i raro i te aua paruru, ua vaiihohia te hoê atea e 20 tenetimetera ia nehenehe te animara parauhia blaireau e tamau i te hahaere e i te rave i ta ’na mau ohipa i te po.

23 no Fepuare 2015: vahi paturaa o te Betela

Te patuhia ra te hoê purumu no te haere mai te vahi nohoraa o te feia rave ohipa e tae atu i te vahi paturaa. E faaohipahia teie purumu i te roaraa noa o te ohipa paturaa o te Betela.

5 no Mati 2015: vahi paturaa o te Betela

E hoho‘a patahia mai te pae Hitia o te râ no te faaite i te taatoaraa o te purumu faataa-noa-hia no te tau paturaa. Mai te itehia ra i te pae atau i nia o te hoho‘a, e haere te purumu i te vahi paturaa o te Betela. I te pae aui i raro o te hoho‘a, te itehia ra te tahi mau fare tahua rau tei riro i teie nei ei vahi nohoraa na te feia rave ohipa. E patuhia te mau fare nohoraa i te mau tuhaa fenua i pihai iho.

20 no Eperera 2015: vahi nohoraa na te feia rave ohipa

Ua haere te hoê mero o te Tino aratai a te mau Ite no Iehova e te tahi atu tia o te pu rahi e farerei i te pǔpǔ paturaa. I tera hebedoma, ua haapurorohia te hoê putuputuraa taa ê i te mau Piha a te Basileia i te fenua Beretane e i Irelane. Ua faaarahia e i te po na mua ’‘e e tupu ai te putuputuraa, ua horoa te apooraa oire o Chelmsford i te parau faatiaraa matamua no te haamata i te paturaa o te Betela apî.

13 no Me 2015: vahi na te feia rave ohipa

Te tuu nei te feia patu i te faanahoraa no te paruru i te a‘a o te mau tumu raau rarahi. Maoti teie purumu taa ê e nehenehe ai te taata e haere mai te vahi na te feia rave ohipa e tae atu i te vahi paturaa o te Betela. E nehenehe atoa te mau pereoo rarahi e tere na nia ’tu ma te ore e haafifi i te a‘a o te mau tumu raau.

21 no Me 2015: vahi nohoraa na te feia rave ohipa

Te heru nei te feia rave ohipa i te apoo hinaarohia no te paturaa i te mau fare nohoraa na te feia rave ohipa. I muri noa mai, te itehia ra te mau fare nohoraa matamua faaohipahia i te roaraa noa o te paturaa i te Betela. E 50 fare nohoraa te patuhia.

16 no Tiunu 2015: vahi nohoraa na te feia rave ohipa

Te tamau nei te hoê taata rave ohipa i te auri no te faahaere i te pape i te mau fare nohoraa.

16 no Tiunu 2015: vahi nohoraa na te feia rave ohipa

E hoho‘a patahia mai te pae Hitia o te râ no te faaite i te mau fare nohoraa apî tei oti. I mua noa mai, ua haamauhia te niu o te tahi atu mau fare nohoraa. I te pae aui, te vai ra te mau fare tahua rau i reira e noho ai e e tamaa ’i te feia rave ohipa. E patuhia te Betela i nia i te tuhaa fenua itehia i ropu o te hoho‘a i muri noa mai.

16 no Tiunu: vahi nohoraa na te feia rave ohipa

Te tamau nei te hoê taata aravihi i te tahi niuniu no te Internet i roto i te piha faataahia no te reira. Mea faufaa ia haamauhia teie faanahoraa na mua ’tu te ohipa paturaa ia ohie te ohipa a te feia patu, te paraparauraa e te tahi atu mau amaa e te faanahoraa i te ohipa ia au i te aratairaa a te pu rahi.

6 no Tiurai 2015: vahi paturaa o te Betela

Maoti te tahi matini parauhia GPS, te faataa ra te hoê ona ohipa ihea e vai ra te mau vahi heruhia no te ite eaha tei raro a‘e i te fenua. E nehenehe ïa te feia ihipǎpǎ e ite i te reira hou a haamata ’i te paturaa. Noa ’tu i mutaa iho ra ua ora te feia no Roma i pihai iho i te oire no Chelmsford, aita i itehia te tahi noa ’‘e tao‘a no mutaa iho ra i roto i nau 107 apoo tei heruhia.

6 no Tiurai 2015: vahi na te feia rave ohipa

Te tâpûhia ra te tahi mau auri no te niaraa o te mau uputa. I te vahi na te feia rave ohipa, ua faarirohia vetahi mau fare tahua rau ei vahi ohiparaa. I reira atoa e haamauhia ’i te mau piha no te faaohie i te ohipa a te feia patu.

6 no Tiurai 2015: vahi na te feia rave ohipa

Te faaîhia ra te muriraa o te tahi pereoo rarahi e te repo fenua.

7 no Tiurai 2015: vahi paturaa o te Betela

Hoho‘a o te tuhaa mataeinaa o te fenua Beretane mai te pae apatoa o te vahi paturaa e 34 tâ te aano. Maoti te hoê purumu i pihai iho (aita e itehia i nia i te hoho‘a) e nehenehe ai te taata e haere i te mau uahu, tauraa manu reva e i te oire no Lonedona.

23 no Tiurai 2015: vahi paturaa o te Betela

Te tamâhia ra te vahi faataahia no te paturaa o te Betela apî ma te tatara i te mau fare tei patu-a‘ena-hia.

20 no Atete 2015: vahi na te feia rave ohipa

Maoti te tahi matini hivi e 60 tane te teiaha, te tuuhia ra te raroraa o te hoê piha tei patu-a‘ena-hia. I mua noa mai, ua haamauhia te niu o te tahi atu mau piha. E faaohipahia teie mau piha ei vahi ohiparaa no te aratai i te paturaa o te Betela.

No te ite atu â

Eaha te ravehia ra i te hoê amaa a te mau Ite no Iehova?

E oaoa roa matou i te farii i te taata e haere mai e mataitai i te hoê o ta matou amaa. A haere mai!