Eaha to roto?

Mau faaho'iraa ê

Ite no Iehova

Tahiti

Te haamâhahia ra te hinaaro o e mirioni taata

Te haamâhahia ra te hinaaro o e mirioni taata

A maha ahuru matahiti a‘enei, i te 2 no Fepuare 1973, ua tamaumauhia te mau matini neneiraa apî i Wallkill, i Marite, no te nenei i na vea Te Pare Tiairaa e te A ara mai na!

Ahuru matahiti na mua ’tu, ua hoo mai te mau Ite no Iehova i tera tâpû fenua no te faaapu, ia navai te maa no te feia e rave ra i te ohipa i ta ratou pu rahi i Brooklyn, New York. I teie nei râ, ua faaohipa-atoa-hia tera vahi no te tahi atu huru maa, te maa pae varua.—Mataio 24:45-47.

Vahi faaapuraa a te taiete Watchtower i Wallkill, New York, i te omuaraa o te mau matahiti 1970

Te haamana‘o maitai ra Philip Wilcox, tei tiaau na i te piha neneiraa i tera tau, i te mahana matamua i tere ai tera mau matini i Wallkill: “I titauhia na hoê ava‘e no te tamaumau i te mau matini neneiraa. E i te ineineraa teie mau matini, ua tamata matou! Aita i maoro, e tausani vea tei matara mai. Ua afai atu matou i tera mau vea i ta matou piha neneiraa i Brooklyn o tei hapono atu i roto i te mau amuiraa tei ani mai te tahi. Ua faaoti papu matou eiaha e haamâu‘a i te hoê noa ’‘e vea.”

Ua patu te mau Ite no Iehova i te tahi atu vahi neneiraa papai ia rahi atu â te reira. E ohipa piaraa rahi mau tei ravehia na i Brooklyn. I te omuaraa o te mau matahiti 1970, e pinepine e mea rahi a‘e te papai Bibilia i anihia i ta te matini e nehenehe e nenei i te mahana hoê. Ua faanaho ïa te piha neneiraa i Brooklyn i te hoê pǔpǔ o te ohipa i te po.

I nia: Tamaumauraa i te matini neneiraa M.A.N. matamua i Wallkill, i Tenuare 1973. I raro: Tuu-faahou-raa i te papie no te matini neneiraa M.A.N.

I te otiraa te paturaa o te fare neneiraa matamua i Wallkill, ua faanahohia i roto e maha matini neneiraa, te tuhaa no te hapono i te mau papai e te hoê Piha a te Basileia. Hou râ a faaohipa-roa-hia ’i teie paturaa, ua hamanihia te tahi atu paturaa rahi a‘e i pihaiiho noa mai. No te rahi o te aniraa no te mau papai Bibilia, e ono matini neneiraa tei tamaumauhia i tera vahi hou a oti ai te paturaa.

A nuu ai te tau, ua haere te mau ravea neneiraa i mua e ua maraa te aniraa no ta tatou mau papai Bibilia. E rave rahi ïa taime te titauraahia ia hoo mai i te matini apî e ia faarahi i te tuhaa neneiraa i Wallkill. Ua monohia te mau matini neneiraa tahito no te mau matahiti 1980 e te mau matini apî mea vitiviti mau te neneiraa.

I 2004, ua tapiri te tuhaa neneiraa i Brooklyn e ua piahia te mau buka i Wallkill no te taime matamua. I 2010, ua afai-faahou-hia te neneiraa o te mau vea i te pae apatoerau. I teie nei, i te amaa a te mau Ite no Iehova i Kanada. E nehenehe te matini neneiraa apî e vai ra i ǒ e nenei e 200 000 vea i te hora.

I nia: Faaineineraa i te mau tuhaa o te tahi papai no te matini tahoêraa papai i Wallkill, i 2005. I raro: Vahi faaapuraa a te taiete Watchtower i Wallkill, New York, i 2013

I teie mahana, na te mau matini apî e rave ra i te rahiraa o te ohipa i te tuhaa neneiraa i Wallkill. E 281 rima tauturu, te tane e te vahine, te ohipa ra i roto i tera tuhaa. I te matahiti i mairi a‘enei, ua hau atu i te 17 mirioni buka e Bibilia tei neneihia i ǒ. Hau atu i ta ratou mau fare neneiraa i Marite Apatoerau (Wallkill, Kanada e Mehiko), 12 atu â fare neneiraa ta te mau Ite no Iehova i Afirika, Asia, Auteralia, Europa e Marite Apatoa. Te fa? E tauturu e mirioni taata ia faaroo e ia haapao i te parau a te Atua.—Luka 11:28.

 

 

No te ite atu â

O vai te rave nei i to Iehova hinaaro i teie mahana?

Eaha te Betela?

E vahi otahi te Betela, e mea faufaa roa te ohipa e ravehia ra i reira. A hi‘o na o vai ma te tavini ra i reira.