Eaha to roto?

Mau faaho'iraa ê

Ite no Iehova

Tahiti

Te tere faufaa roa ’‘e o te oraraa

Te tere faufaa roa ’‘e o te oraraa

I te mau matahiti atoa, e tere e mau ahuru tausani taata no te mataitai i te mau fare tahua rau o te amaa no Marite e te Pu rahi a te mau Ite no Iehova i New York. E parauhia teie mau fare te Betela, hoê ta‘o Hebera o “Fare o te Atua” te auraa. Mai te mau fenua atea aore ra to pihai iho noa mai, e haere te mau taata i reira no te ite e mea nafea te neneiraa o te mau papai e te faanahoraa o ta matou ohipa. E haere atoa ratou no te farerei i ta ratou mau hoa o te ohipa ra i ǒ. Aita i maoro, ua itehia hoê taata tei hinaaro rahi e rave i tera tere.

O Marcellus ïa, hoê Ite no Iehova o te ora ra i Anchorage, Alaska, Marite. A tau matahiti i teie nei, ua roohia oia i te hoê ma‘i atâta, mea iti ïa te mau ta‘o ta ’na e nehenehe e parau. E haere oia na nia i te hoê parahiraa turairai e e titau oia i te tauturu no te mau ohipa o te mau mahana atoa. Noa ’tu râ teie mau fifi, ua hinaaro rahi oia e haere e mataitai i te Betela. E tera ta ’na i rave noa nei.

Ua parau Corey, hoê hoa o tei tauturu ia Marcellus ia faanaho i teie tere: “Aita oia i tuu. E pii noa mai oia ia ’u no te ite eaha te mau faanahoraa hau tei ravehia. I te mea ra e e parau noa o Marcellus ‘E’ aore ra ‘Aita,’ e mea tia ia ’u ia ani e rave rahi uiraa a pii ai oia.” Teie te huru o ta raua mau aparauraa:

“Hinaaro oe ia haere atu vau e hi‘o ia oe?”

“Aita.”

“Hinaaro oe ia pii atu vau i te taote?”

“Aita.”

“Te pii ra oe no te tere i te Betela?”

“E.”

“I muri iho, e faataa atu vau i te mau faanahoraa ta ’u i rave no tera tere. Oaoa roa vau i te iteraa e ua naea oia i ta ’na fa.”

Ua faaruru Marcellus e rave rahi fifi no te rave i tera tere. I te mea ra e mea iti ta ’na moni, a piti matahiti to ’na haaputu-noa-raa no te haere i New York, hoê tere e 5 400 kilometera i te atea. No to ’na mau taotiaraa i te pae tino, e mea tia ia imi oia i te hoê taata apee aravihi no te tauturu ia ’na ia haere atu. I te pae hopea, e mea tia atoa ia ani i te parau faatia a te taote no tera tere. E ua horoahia te reira tau mahana noa hou a haere ai oia na nia i te manureva.

I to Marcellus taeraa i New York, ua arataihia to ’na tere no te mataitai i te mau fare tahua rau i Brooklyn, Patterson e Wallkill. Ua ite oia i te mau matini rarahi no te neneiraa i te mau buka aore ra Bibilia e ua taa atoa ia ’na e mea nafea te faanahoraa o ta matou ohipa. Ua mataitai oia e piti faaiteiteraa: “Te Bibilia e te i‘oa o te Atua” e “Hoê nunaa no to Iehova i‘oa.” I te roaraa o te tere, e rave rahi taata ta ’na i faahoa atu. Tera iho â te tere faufaa roa ’‘e o te oraraa!

Aita e ta‘o no e rave rahi no te faataa i ta ratou i ora a mataitai ai i te Betela. A ani ai râ ia Marcellus mai te peu e ua faufaahia te mau tutavaraa ta ’na i rave no tera tere, e pahono oia mai ta ’na e nehenehe: “E, e, e!”

E nehenehe hoê tere i te Betela e faaitoito ia oe e to oe utuafare, mai ia Marcellus. E farii-popou-hia te feia atoa o te hinaaro e mataitai i ta matou mau amaa na te ao nei. E haere mai atoa oe?