Eaha to roto?

Mau faaho'iraa ê

Ite no Iehova

Tahiti

Tausani taata mataitai i te amaa no Marite no ropu

Tausani taata mataitai i te amaa no Marite no ropu

I 2015, fatata 175 000 taata tei haere e mataitai i te piha ohipa a te mau Ite no Iehova no Marite no ropu. I te hoê faito au noa, e 670 ïa taata mataitai i te mahana ohipa hoê! Ei pǔpǔ rarahi, mea rahi tei na nia mai i te pereoo uta taata tau mahana i te maoro. Ua faanaho vetahi i tera tere e rave rahi ava‘e na mua ’‘e.

“Te tere i te Betela”

No vetahi, ua titauhia te tahi mau haapaeraa no te haere e mataitai i te Betela. Mai te rahiraa o te mau mero o te hoê amuiraa no Veracruz, te hoê tuhaa fenua i Mehiko. Aita i navai ta ratou moni no te aufau i te pereoo uta taata no te hoê tere e 550 kilometera. Ua opua ïa ratou i te hoê ravea: “Te tere i te Betela.” Ua faanaho ratou i te mau pǔpǔ no te faaineine e te hoo atu i te maa. Ua faaapî atoa ratou i te mau mohina urina. E toru ava‘e i muri iho, ua navai ta ratou moni no tera tere.

Ua hoona anei te reira? No ratou, e. A hi‘o na i ta Lucio, te hoê tane apî o te amuiraa, i papai: “Ua turai to matou tere i te Betela ia haamau hau atu â fa pae varua, e te tavini rahi atu â nei au i roto i ta ’u amuiraa i teie nei.” Ua parau Elizabeth, 18 matahiti: “I te Betela, ua ite maitai au i te here haavare ore o te feia e tavini ra ia Iehova. Faaitoito te reira ia ’u ia tavini atu â i te Atua, e tavini taime taatoa ïa vau i teie nei.”

Tausani tei haere mai

Te tahi taime, tausani taata mataitai te tae mai i te hoê â mahana. Ua ohipa maitai te piha ohipa o te haapao i tera tuhaa no te farii maitai i te taatoaraa. Te na ô ra Lizzy: “Mea faaitoito mau ia ite tera rahiraa taata. Puai atu â to ’u faaroo i te ite i to ratou mauruuru e i te mau haapaeraa ta ratou i rave no te haere mai e mataitai i te amaa.”

Ua faaohipa-atoa-hia te feia o te tahi atu tuhaa ohipa o te Betela no te haamataitai i tera rahiraa taata. Noa ’tu e ua rahi atu â te ohipa, ua oaoa ratou i te farii i te feia mataitai. Te parau ra Juan: “I muri iho i te tere mataitai, ite au to ratou mata ataata. Ua hoona iho â ïa te reira.”

“Ua au mau te mau tamarii”

Ua oaoa atoa te mau tamarii i te mataitairaa i te Betela. Te na ô ra Noriko e ohipa ra i te tuhaa roro uira: “Ua ani au i te mau tamarii e e hinaaro anei ratou e tavini i te Betela. Pahono pauroa mai ratou, ‘E!’” Mea au roa na te tamarii e haere i te vahi i reira e nehenehe ai e pata i te hoho‘a e o Kaleba raua Turia, itehia i roto i te video A riro ei hoa no Iehova. Na ô ra Noriko: “Ua au mau te tamarii.”

Mea rahi te tamarii tei faaite i to ratou mauruuru no te ohipa e ravehia ra i te Betela. A hi‘o na ia Henry, te hoê tamaroa iti no Mehiko. Ua haaputu o ’na i ta ’na moni no te horoa ei ô a haere mai ai i te Betela. “A faaohipa na i teie moni ia rahi atu â te papai,” o ta ’na ïa i tapao a horoa ’i i ta ’na ô. E ua na ô â o ’na: “Mauruuru no ta outou ohipa no Iehova.”

A haere mai

Ma te tamoni ore, e haamataitai te mau Ite no Iehova e ati a‘e te ao i ta ratou piha ohipa e vahi neneiraa papai. A haere mai e mataitai i te amaa. E oaoa oe i tera tere. No te ite atu â, a pata i nia NO NIA IA MATOU > PIHA OHIPA E MATAITAIRAA.