Eaha to roto?

Mau faaho'iraa ê

Ite no Iehova

Tahiti

Taime faataahia: e 60 mahana

Taime faataahia: e 60 mahana

I te Mahana pae 5 no Tiurai 2013, ua oaoa te utuafare o te Betela no te Hau amui no Marite a faaroo ai i te taeae Anthony Morris no te Tino aratai ia faaite: “Ua ravehia te hoê faaauraa no te hoo atu e ono paturaa, tei roto atoa te 117 Adams Street e te 90 Sands Street i Brooklyn. * E titauhia ia tatara i roto i te paturaa 1 e tae atu i te 5 i te mau mea atoa e vai ra i roto hou te afaraa o te ava‘e no Atete o teie matahiti.”

Mea papu e e ohipa rahi mau te tiai maira. Ua tuea te rahi o na paturaa e pae i te rahi o 11 vahi tueraa popo faaohipahia no te mau tata‘uraa nunaa rau! E i titauhia na ia vaiihohia teie mau paturaa i roto e 60 mahana!

E rave rahi matahiti, e matini neneiraa e tahoêraa buka to roto i te mau Paturaa 1 tae atu i te 5. I 2004 râ, ua afaihia teie mau matini i Wallkill, New York.

Mai reira mai, ua faaohipahia tera mau vahi no te haaputu i te mau taihaa no te ohipa paturaa, te mau piha ohipa e no te turu i te mau ohipa paturaa na Marite e na pihai iho.

No te tatara pauroa i te mau mea e vai ra i roto i te mau paturaa i te area taime i faataahia, ua titauhia te hoê porotarama naho maitai. A tahi, ua tapurahia te mau taihaa e vai ra i roto no te faaoti eaha te hoo atu, te faarue aore ra te tapea mai. Ia oti, ua ravehia te mau faanahoraa no te rave maite i te ohipa ma te fifi ore.

Ua ohipa puai te utuafare o te Betela no te turu i tera ohipa. Hau atu â, ua anihia e 41 rima tauturu ia haere mai i te Betela no te hoê taime poto. No ǒ mai ratou i te vahi e rave rahi o Marite. E tane taa noa e te puai te rahiraa. Ua farii ratou i te haere mai e tauturu no e ono tae atu ahuru hebedoma i te maoro. Ua vaiiho ratou i to ratou utuafare, te hoa e te ohipa no te haere mai e tauturu i te Betela. Eaha to ratou mana‘o?

Jordan no Washington, e 21 matahiti. Ua parau o ’na: “Ahani au i faaî a‘ena ta ’u parau aniraa no te haere mai!”

Steven no Texas, e 20 matahiti. Ua na ô o ’na: “No ’u, tei roto vau i te hoê utuafare rahi, itoito e te oaoa na te ao.”

Justin, e 23 matahiti. Ua papai o ’na: “I te Betela, e au ra e tei te fare au. Mea faahiahia mau te paari rahi i te pae varua, te here rahi e te auhoaraa rahi e itehia i te Betela.”

Adler no Porto Rico, e 20 matahiti. Ua parau oia: “Mea fifi ia tia oioi i te poipoi. Ua tia râ ia ’u ia faatupu i te mau auhoaraa o te ore roa e mutu.”

William, e 21 matahiti. Ua parau oia: “Mai to ’u nainairaa mai â to ’u hinaaro-noa-raa e haere mai i te Betela. Ua mana‘o vau e e moemoe vau, ua hape mau râ. Tei te Betela te taime maitai roa ’‘e ta ’u i fana‘o a‘enei! Aita ’tu vahi mea au a‘e i teie.”

Ua tia anei ia ratou ia tatara pauroa mai i roto i te taime faataahia? E, ua titau-noa-hia e 55 mahana.

^ par. 2 E vaiihohia ’tu te 90 Sands Street, e paturaa nohoraa teie, i 2017.

No te ite atu â

O VAI TE RAVE NEI I TO IEHOVA HINAARO I TEIE MAHANA?

Eaha te Betela?

E vahi otahi te Betela, e mea faufaa roa te ohipa e ravehia ra i reira. A hi‘o na o vai ma te tavini ra i reira.