Eaha to roto?

Mau faaho'iraa ê

Ite no Iehova

Tahiti

A haere mai e mataitai i te mau paturaa o te Betela no te Hau Amui no Marite

A haere mai e mataitai i te mau paturaa o te Betela no te Hau Amui no Marite

“Ua oaoa roa mâua i te mataitairaa i te Betela, eita roa ’tu e moe ia mâua.” O te mau parau teie a na hoa faaipoipo no Vanuatu i muri a‘e i te mataitairaa i te mau paturaa o te Betela no te Hau Amui no Marite. Tera atoa te mana‘o o na hau atu i te 10 tausani taata mataitai te haere mai nei i te matahiti hoê.

Ua haere a‘ena anei oe e mataitai i te mau paturaa o te Betela no te Hau Amui no Marite? Aita â? A haere ïa.

Eaha ta oe e ite i na paturaa faufaa roa e toru?

Te pu rahi, Warwick, New York. E toru faaiteiteraa ta oe e nehenehe e mataitai o oe ana‘e. I te faaiteiteraa matamua, “Te Bibilia e te i‘oa o te Atua,” e ite oe i te mau huriraa Bibilia varavara e e nafea te i‘oa o te Atua i vai-noa-hia i roto i te Bibilia. I te piti o te faaiteiteraa, “Te hoê nunaa no to Iehova ra i‘oa,” e ite oe i te aamu o te mau Ite no Iehova. E i te faaiteiteraa toru, “Pu rahi: te ohipa ra te faaroo,” e faataahia e nafea te mau putuputuraa a te mau Ite no Iehova, te mau haapiiraa Bibilia e te pororaa i te poroi Bibilia ia vetahi ê e faanahohia. Oia atoa e nafea ratou e faaite ai i te here te tahi i te tahi. Hau atu, te vai ra te hoê mataitairaa arataihia e 20 minuti i te maoro o te faataa ra i te mau tuhaa o te mau piha ohipa e te tahua o te pu rahi i Warwick.

Te pu haapiiraa a te mau Ite no Iehova, Patterson, New York. E ite oe i te mau piha haapiiraa mai te Haapiiraa Bibilia no Gileada aore ra te Haapiiraa no te mau melo o te tomite amaa e ta ratou vahine, e te vai ra ’tu â. E ite atoa oe i te tahi mau hoho‘a e hoho‘a tavirihia e faataa ra i te ohipa e ravehia i roto i te mau tuhaa ohipa, mai te tuhaa hamaniraa hoho‘a e haruharuraa.

Te pu o te neneiraa e te haponoraa, Wallkill, New York. E ite oe e nafea te mau Bibilia e te mau papai Bibilia e neneihia ’i, e amuihia ’i ei buka aore ra ei vea e e haponohia ’i na tera e tera amuiraa i Marite, i te mau motu i Antilles e i te tahi atu mau vahi na te ao nei.

E nafea ia faanaho i to ’u mataitairaa?

Hou a faanaho ai i to oe tere, a faaî na i te aniraa i nia i te apî Piha ohipa e mataitairaa. I nia i tera apî, e haamaramaramaraa hau atoa no nia i te mau paturaa o te Betela i Marite, mai te mau vahi i reira tera mau paturaa e te maororaa o te mataitairaa taitahi.

O vai te mau aratai pǔpǔ?

O te feia iho â e rave ra i te ohipa i te Betela te aratai ia outou. A na reira ’i, mai te huru ra e te turu ra ratou i te ohipa haapiiraa e ravehia na te ao. E arataihia te mau pǔpǔ na roto ahuru a‘e reo.

Ehia moni te mataitairaa?

Mea tamoni ore.

O te mau Ite no Iehova noa anei te nehenehe e haere e mataitai atu?

E ere roa ’tu. Mea rahi te taata e ere i te Ite no Iehova te haere atoa mai e mataitai. Ua ite atu â ratou, oia atoa te mau Ite no Iehova iho, i te mau tutavaraa e ravehia ra no te turu i te ohipa a te mau Ite no Iehova na te ao.

Ua haere atoa mai te hoê vahine no Initia mai, e haapaoraa Mahometa ta ’na, e mataitai i te pu i Patterson. I muri iho, ua parau oia: “Hinaaro vau e faaea mai i ǒ nei. Mauruuru maitai i te farii-maitai-raa ia ’u.”

E farii-atoa-hia anei te mau tamarii?

E! E faufaa-atoa-hia te mau tamarii i te reira. Ua papai John, no Marite, i teie mau parau: “Ia matou i ho‘i atu i te fare, aita te mau tamarii o ta matou pǔpǔ i fiu i te faatia-noa-raa i ta ratou i ite. Hou te mataitairaa, aita ratou i taa maitai eaha mau te Betela. I teie nei râ, te hinaaro ra ratou e tavini i ǒ.”

E nehenehe anei e mataitai i te mau Betela a te mau Ite no Iehova i te tahi atu mau fenua?

E. E nehenehe te reira e ravehia i roto hau atu 10 fenua. No te ite ihea roa, a hi‘o i te tuhaa Piha ohipa e mataitairaa. E farii-popou-hia oe. A haere mai e mataitai i te tahi o te mau amaa a te mau Ite no Iehova.

No te ite atu â

O VAI TE RAVE NEI I TO IEHOVA HINAARO I TEIE MAHANA?

Eaha te ravehia ra i te hoê amaa a te mau Ite no Iehova?

E oaoa roa matou i te farii i te taata e haere mai e mataitai i te hoê o ta matou amaa. A haere mai!