Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

Ua tae te taime e faarue ai i te hotera Bossert

Ua tae te taime e faarue ai i te hotera Bossert

I Novema 2012, ua hoo atu te mau Ite no Iehova i te hotera Bossert. Ua horoa ratou i te taviri i te fatu apî e mai te manihini e rave rahi tei taoto i ǒ, ua rave te mau Ite i ta ratou mau taihaa e ua haere. E faaohipahia te moni i noaa mai no te haaparare i te ohipa haapiiraa Bibilia a te mau Ite no Iehova na te ao nei.

Ua hoo atu te mau Ite no Iehova i teie fare 13 tahua hamanihia mai te huru paturaa no Italia no te mea e haere ta ratou mau rima tauturu o ta ratou pu rahi no Brooklyn i roto i te mau fare tahua apî i Warwick, New York. E titauhia paha tau matahiti no te tie i te mau taihaa.

Hoê hanere matahiti aamu

Na Louis Bossert, te hoê taata hoo raau no New York, i hamani i te Bossert i 1909. E fare hotera teie no te feia eita e faaea maoro e te feia e tarahu maoro i te piha. I te mea hoi e aita te mau piha i vata hanoa, ua faararahihia teie hotera i 1914. Ua tataipitihia te rahi o te fare tahua matamua. I 1916, matara mai nei te hoê fare tamaaraa i nia ’‘e i te fare tahua: te Marine Roof.

I te mau matahiti 1980, ua hoo mai e ua tataî te mau Ite no Iehova i tera fare tahua no te noho maitai i ta ratou mau rima tauturu o ta ratou pu rahi. Ua tauihia te mau piha oriraa ei piha tamaaraa e te fare tamaaraa i nia ’‘e i te fare tahua ei piha faafaaearaa no te feia e noho ra i reira e ta ratou mau manihini.

Mai 2010 mai â, ua farii teie fare tahua i te mau Ite no Iehova no te ao atoa tei haere mai e mataitai i te pu rahi.

Te hinaaro ra te fatu apî e tataî i te fare tahua ia riro faahou te reira ei hotera. E riro mai ïa te mau piha haihai o te Bossert ei piha moni rahi. E ohie te ohipa tataîraa no te mea te maitai noa ra te fare tahua.

Ua ite-faahou-hia to ’na nehenehe

Hou a fana‘o ai te mau Ite no Iehova i te Bossert, mea maoro aita teie fare i atuatuhia. E ere te rapaeauraa i te mea uouo faahou. Fatata te faaneheneheraa o te niaraa o te fare hamanihia e te repo tunuhia i te topa mai. Ua pê te mau haamaramarama e e ô noa mai te mata‘i na roto. Area te Marine Roof, o te mau uuairao ana‘e ïa tei faaea i reira. Ua haamata ïa te hoê ohipa tataîraa rahi. E ua horoa te mau Ite no Iehova no Marite atoa i to ratou taime e aravihi i nia i teie ohipa paturaa o tei oti i 1991.

Ua tamâ e ua tataî te mau Ite no Iehova i te rapaeauraa o te fare tahua tei hamanihia e te ofai pu‘a e te ofai ereere. Ua monohia te faaneheneheraa i nia ’‘e i te fare tahua e te fibre de verre ma te tapea i te hoê â hoho‘a. Mea mâmâ a‘e hoi te reira. Ua tamaumau atoa ratou i te mau haamaramarama apî hamanihia e te raau parauhia acajou.

Ua faaapî-atoa-hia i roto i tera fare tahua. Ua haapao taa ê ratou i te piha tomoraa, mea nehenehe roa hoi i na mua ’‘e. No te tataî i te mau patu maremora o tei ino, ua haere te mau Ite no Iehova e tii i te mau ofai i te hoê vahi parauhia carrière Italienne. I reira hoi te raveraahia te mau maremora matamua. Ua tataî-atoa-hia te mau hoho‘a pu‘a uouo i nia i te aroaro ia ore te pape ia ô mai.

Te tahi atu fifi, o te mau pou rarahi auri ïa i roto i te piha tomoraa. No te faaoti maitai i te reira, ua faaohipahia te huru raveraa Italia parauhia te scagliola. E au ra ïa e ua hamanihia te mau pou e te maremora, e ere râ hoi. Ua penihia râ teie mau pou e rave rahi taime na te mau fatu na mua ’tu. E aita hoê a‘e o teie mau rima tauturu i ite i te scagliola. Ua itehia râ i roto i te vairaa buka a te hoê fare haapiiraa tuatoru tapiri i te hoê buka e faataa ra i te titauhia ia rave ia noaa mai teie huru hamaniraa e au i te maremora. Maoti teie mau haamaramaramaraa, ua ohipa te mau rima tauturu e rave rahi hebedoma i nia i teie mau pou ia tuea te reira i to ratou hoho‘a i te omuaraa.

I te otiraa te tataîraa i 1991, e ere teie fare tahua i te mea ohipa rahi e mea haviti mau te reira. Ua fana‘o te Bossert i te hoê re, oia hoi te Lucy G. Moses Preservation Award, no te ohipa i ravehia ia tuea te reira i te hotera i patuhia i te omuaraa.