Eaha to roto?

UA TAUI TE BIBILIA I TO ’U ORARAA

“E rahi a‘e ta ’u mau uiraa i te pahonoraa”

“E rahi a‘e ta ’u mau uiraa i te pahonoraa”
  • Matahiti fanauraa: 1976

  • Fenua: Honduras

  • Aamu: Orometua a te ekalesia

NA MUA ’‘E

Ua fanauhia vau i La Ceiba, i Honduras. O vau te tamarii hopea o na tamarii e pae, hoê ana‘e tamaroa, o vau ïa. O vau atoa ana‘e te tamarii tari‘a turi o te utuafare. Ua ora vau e to ’u utuafare i roto i te hoê aroâ fifi mau e ua veve roa matou. Ua rahi atu â te fifi a pohe ai to ’u metua tane i roto i te hoê ati i te vahi ohipa. E maha ïa matahiti to ’u.

Ua rave to ’u mama i ta ’na i nehenehe no te aupuru ia ’u e i to ’u mau tuahine. I te rahiraa râ o te taime, aita i navai i te moni no te hoo mai i te ahu no ’u. I te taime ûa, ua toetoe roa vau no te mea aita e ahu mahanahana to ’u.

A paari ai au, ua haapii mai au i te reo apǎraa rima Honduras (LESHO). Maoti tera ravea, ua nehenehe au e aparau e te tahi atu mau taata tari‘a turi. Aita râ to ’u mama e to ’u mau tuahine i ite i te reo LESHO. I te mea e ua ite ratou i te tahi noa ’‘e mau aparaa rima, ua haamau ïa ratou i ta ratou iho mau aparaa rima no te paraparau ia ’u. Ua here râ to ’u mama ia ’u e ua paruru atoa oia ia ’u i te mea atâta. Maoti te tahi noa mau apǎraa rima ta ’na i ite, ua faaara oia ia ’u i te mea ino, mai te pupuhiraa i te avaava e te inu-hua-raa i te ava. I te pae hopea, ua mauruuru roa vau ia ’na no te mea aita vau i rave i te mau peu ino i to ’u paariraa mai.

I to ’u apîraa mai, ua matau to ’u mama i te afai ia ’u i te ekalesia Katolika. Aita râ vau i taa i tei haapiihia no te mea aita hoê a‘e taata tei huri i te reira na roto i te reo apǎraa rima no ’u. Ua fiu roa vau, ua faaea vau i te haere i te fare pureraa. Ahuru matahiti ïa to ’u i taua taime ra. Ua hinaaro râ vau e ite atu â no nia i te Atua.

I 1999, 23 ïa matahiti to ’u, ua farerei au i te hoê vahine no te Hau Amui no Marite, e mero oia o te Ekalesia Evanelia. Ua horoa mai oia i te mau haapiiraa Bibilia e ua haapii atoa oia i te reo apǎraa rima Marite (ASL) ia ’u. Mea au roa na ’u e haapii mai i te Bibilia, ua riro ïa vau ei orometua. Ua haere au i Porto Rico no te fana‘o i te faaineineraa i te hoê pû faaineineraa Kerisetiano no te mau taata tari‘a turi. I to ’u ho‘iraa i La Ceiba i 2002, ua haamau vau i te hoê ekalesia no te feia tari‘a turi maoti te tauturu a te tahi mau hoa. O Patricia hoê o tera mau hoa, e ua riro oia ei vahine faaipoipo na ’u.

Ei orometua o te ekalesia, ua vauvau vau i te mau oreroraa parau na roto i te reo LESHO, ua faaite atoa vau i te tahi mau hoho‘a o te mau aamu Bibilia. Oia atoa, ua hauti vau i te mau aamu no te tauturu i te mau taata tari‘a turi ia taa. Ua haere atoa vau e farerei i te mau taata tari‘a turi i te mau oire piri no te faaitoito atu ia ratou e no te tauturu atu ia faaruru i to ratou mau fifi. Ua rave atoa vau i te hoê tere mitionare i te Hau Amui no Marite e i Zambie. Aita râ vau i ite maitai i te Bibilia. Ua faaite noa vau i ta ’u i haapii mai e i ta ’u i taa, maoti te mau hoho‘a. Mea rahi a‘e ta ’u mau uiraa i ta ’u mau pahonoraa.

I te hoê mahana, ua haamata te tahi mau mero o te ekalesia i te haaparare i te mau parau haavare no nia ia ’u. Ua parau ratou e e taata taero ava vau e ua taiva vau i ta ’u vahine faaipoipo. Ua inoino roa vau a riri atu ai. Tau taime noa i muri a‘e, ua faarue mâua Patricia i tera fare pureraa.

UA TAUI TE BIBILIA I TO ’U ORARAA

Mea pinepine te mau Ite no Iehova i te haere mai e farerei ia mâua Patricia, aita râ mâua i farii ia ratou. I muri a‘e râ i to mâua faarueraa i te fare pureraa, ua farii Patricia i te haapii mai i te Bibilia e na hoa faaipoipo Ite no Iehova, o Thomas e o Liccy. Ua maere roa vau i to ’u iteraa e ua ite raua i te reo apǎraa rima, noa ’tu e e ere raua i te taata tari‘a turi. Aita i maoro, ua apiti vau ia Patricia i ta ’na haapiiraa Bibilia.

Ua haapii mai mâua i te Bibilia tau ava‘e i te maoro ma te faaohipa i te mau video na roto i te reo ASL. Ua pari haavare râ te tahi o to mâua mau hoa i te mau Ite no Iehova ma te parau e ua pee noa ratou i te taata. Ua faaea ïa mâua i ta mâua haapiiraa Bibilia. Noa ’tu e ua horoa mai Thomas i te mau haapapuraa no te faaite e aita te mau Ite no Iehova e pee i te mau aratai taata, aita vau i tiaturi ia ’na.

Tau ava‘e i muri a‘e, ua hepohepo rahi o Patricia. Ua pure oia i te Atua ma te ani atu ia faaho‘i mai i te mau Ite no Iehova i te fare. I muri iho, ua haere mai te hoê taata tapiri Ite no Iehova e farerei ia Patricia. Ua parau oia e e ani atu oia ia Liccy ia ho‘i mai e paraparau ia ’na. Ua haa o Liccy mai te hoê hoa mau. Ua ho‘i mai oia e farerei ia Patricia i te mau hebedoma atoa no te faaitoito atu e no te haapii i te Bibilia e o o ’na. Aita râ vau i tiaturi roa i te mau Ite no Iehova.

I 2012, ua apiti te mau Ite no Iehova i te hoê opereraa taa ê no te pûpû i te video na roto i te reo LESHO, E hinaaro anei oe e ite i te parau mau? Ua afai mai Liccy i te video. A mataitai ai au i te reira, ua huru ê roa vau i te iteraa e aita i faahitihia i roto i te Bibilia, ta ’u i matau i te haapii atu, mai te haapiiraa o te po auahi aore ra te haapiiraa e e ora ’tu te tahi mea i roto i te taata ia pohe o ’na.

Te hebedoma i muri iho, ua haere au i te Piha a te Basileia a te mau Ite no Iehova no te paraparau atu ia Thomas. Ua faaite atu vau i to ’u hinaaro e haapii atu i te mau pue parau mau Bibilia i te taata tari‘a turi, eiaha râ ei Ite no Iehova. Ua hinaaro vau e haamau i to ’u iho fare pureraa no te feia tari‘a turi. Ua haapopou Thomas ia ’u no to ’u itoito rahi. Ua faaite mai râ oia i te Ephesia 4:5 o te haapapu ra i te faufaaraa ia vai tahoê i roto i te amuiraa Kerisetiano mau.

Ua afai atoa mai Thomas i te video Les Témoins de Jéhovah—La foi en action, 1re partie : La sortie des ténèbres na roto i te reo ASL. Ua faaite te video nafea te hoê pǔpǔ taata i hi‘opoa maite ai i te Bibilia no te taa maitai i te parau mau no nia i te mau haapiiraa tumu. A mataitai ai au i te video, ua taa maitai au i to ratou mau huru aau. Mai ia ratou, ua hinaaro vau e ite i te parau mau. Ua haapapu taua video ra ia ’u e te haapii ra te mau Ite no Iehova i te parau mau no te mea ua niuhia ta ratou mau tiaturiraa i nia i te Bibilia ana‘e. Ua rave faahou mai au i ta ’u haapiiraa Bibilia e i 2014, ua bapetizohia mâua Patricia ei Ite no Iehova.

TO ’U FAUFAARAAHIA

Mea au na ’u te amuiraa a te mau Ite no Iehova no te mea, mai te Atua, mea viivii ore ratou i te pae morare. Mea viivii ore atoa te mau Ite no Iehova na roto i te parau e a haa ’i ratou e te mau taata. E faatupu ratou i te hau a faaitoito atu ai te tahi i te tahi. Mea tahoê roa te mau Ite no Iehova e te haapii ra ratou i te hoê â mau pue parau mau Bibilia, noa ’tu te fenua aore ra te reo.

Ua oaoa roa vau i te haapii mai ra i ta te Bibilia e haapii mau ra. Ei hi‘oraa, ua haapii mai au e o Iehova te Atua Mana hope, te Arii hau ê i nia i te fenua nei. Te here ra oia i te taata tari‘a turi e te feia e ere i te tari‘a turi. Te poihere nei au i to te Atua here no ’u. Ua haapii atoa vau e e riro te fenua ei paradaiso nehenehe mau e e nehenehe atoa tatou e fana‘o i te ora mure ore e te hoê ea tia. Te tiai ru nei au ia tae mai taua mahana ra!

Mea au na mâua Patricia ia paraparau i te tahi atu mau taata tari‘a turi no nia i te Bibilia. I teie nei, te haapii atu nei mâua i te Bibilia i te tahi mau mero o te fare pureraa ta mâua i faarue. Aita faahou e uiraa ta ’u no nia i ta ’u e haapii atu ra. E ere mai tera i te taime i tavini ai au ei orometua. I te pae hopea, ua pahonohia ta ’u mau uiraa maoti ta ’u haapiiraa Bibilia e te mau Ite no Iehova.