Eaha to roto?

UA TAUI TE BIBILIA I TO ’U ORARAA

“Aita vau e haama faahou ia ’u iho”

“Aita vau e haama faahou ia ’u iho”
  • Matahiti fanauraa: 1963

  • Fenua: Mehiko

  • Aamu: veve, aita e vahi nohoraa e haafaufaa ore ia ’u iho

NA MUA ’‘E

Ua fanauhia vau i Ciudad Obregón, i te pae apatoerau o Mehiko. O vau te paeraa o na iva tamarii. Ua ora matou i rapaeau i te oire, i te hoê vahi faaapuraa iti o to ’u metua tane. Mea au roa te oraraa i ǒ. E utuafare tahoê e te oaoa to ’u. Ma te peapea râ, i te paeraa o to ’u matahiti, ua vavahi te hoê mata‘i rorofai i to matou vahi faaapuraa e e titauhia ia matou ia haere e ora i te tahi atu vahi.

Ua monihia ’tura to ’u metua tane. Haamata atoa ’tura o ’na i te inu hua i te ava. Ua haafifi te reira i to ’na faaipoiporaa e ta ’na mau tamarii. Ua haamata matou i te puhipuhi i te avaava ta matou i eiâ i to ’u metua tane. I te onoraa o to ’u matahiti, ua taero vau no te taime matamua. I muri iho, ua faataa ê to ’u na metua e ua rahi roa mai to ’u huru ino.

Ua ora to ’u metua vahine i te tahi atu tane e ua rave o ’na ia matou. Aita taua tane ra i horoa ia ’na i te moni e aita matou i nehenehe e ora i ta ’na i fana‘o a rave ai i te ohipa. Ua imi au e to ’u mau taeae e tuahine i te ohipa i vai na. Aita râ te moni i navai no te hoo mai i te mea hinaaro-mau-hia. Ua tamâ vau i te mau tiaa e ua hoo atu i te faraoa, te vea, te monamona e te tahi atu mau tao‘a. Ua overe haere atoa vau na te oire a imi ai i te maa i roto i te faarueraa pehu a te feia moni.

I te ahururaa o to ’u matahiti, ua titau manihini mai te hoê taata ia ohipa e o ’na i te hoê vahi haapueraa pehu. Ua farii au i te reira, ua faarue au i te haapiiraa e i te fare. Ua aufau mai o ’na e iti a‘e i te hanere farane i te mahana e ua horoa mai i te maa itehia i te faarueraa pehu. I ora na vau i te hoê fare nainai ta ’u i patu ma te faaohipa i tei itehia i te faarueraa pehu. Ua haaatihia vau e te taata o te parau faufau e o te rave i te mau peu taotoraa tia ore. E rave rahi o te rave i te raau taero e o te inu hua i te ava. E taime fifi roa’ ‘e o to ’u oraraa e i ta‘i noa na vau i te mau po atoa ma te mǎta‘u. No to ’u veve e inaha ua faarue au i te haapiiraa, ua haama noa vau ia ’u iho. Ua ora vau i te vahi faarueraa pehu e toru matahiti i te maoro, tae roa ’tu i te taime i haere ai au i te tahi atu oire no Mehiko. I reira vau i ohipa ’i i roto i te faaapu, a pofai ai i te mau tiare e te vavai, a haaputuputu ai i te tô e a ohi ai i te mau umara.

I ora na vau i te hoê vahi haapueraa pehu mai teie e toru matahiti i te maoro

E maha matahiti i muri iho, ua ho‘i au i Ciudad Obregón. Ua ora vau i roto i te hoê piha ta te tuahine o to ’u metua tane i horoa mai. E vahine rapaau taata o ’na. E moemoeâ riaria mau ta ’u i rave e no to ’u hepohepo rahi i hinaaro roa ’i au e haapohe ia ’u iho. I te hoê po, ua pure au i te Atua: “E te Fatu e, mai te peu te vai nei oe, te hinaaro nei au e ite o vai oe e e tavini ia oe e a muri noa ’tu. Mai te peu te vai ra te haapaoraa mau, te hinaaro nei au e ite i te reira.”

UA TAUI TE BIBILIA I TO ’U ORARAA

I au noa na vau i te haapii no nia i te Atua. I to ’u tamariiraa, ua haere au i te fare pureraa o e rave rahi haapaoraa. Aita râ vau i au i tera mau haapaoraa atoa. Aita hoê a‘e o ratou i faaohipa mai i te Bibilia aore ra i tauturu mai ia haamâha i to ’u hinaaro ia ite o vai te Atua. Te vai ra o tei haafaufaa rahi i te moni, area te tahi atu, ua farii ïa i te mau peu taotoraa tia ore.

I te 19raa o to ’u matahiti, ua parau mai te tane a to ’u tuahine e ua faaite te mau Ite no Iehova ia ’na eaha ta te Bibilia e parau ra no nia i te faaohiparaa i te mau hoho‘a haamoriraa. Ua taio mai oia i te Exodo 20:4, 5. Te na ô ra eiaha roa ’tu e faaohipa i te mau hoho‘a haamoriraa. Te parau ra te irava 5: “Eiaha roa oe e pi‘o i raro ia ratou, eiaha hoi e tavini ia ratou; e Atua tahoo hoi au o te Atua no oe nei o Iehova.” Ani atura mai oia: “Mai te peu e te faaohipa ra te Atua i te mau hoho‘a haamoriraa no te faatupu i te mau ohipa mana aore ra mai te peu e te hinaaro nei oia ia faaohipa tatou i te reira no te haamori ia ’na, no te aha ïa oia e opani ai i te reira?” Ua anaanatae roa vau i te ite i te pahonoraa. I muri iho, ua aparau mâua no nia e rave rau tumu parau Bibilia. Mea au roa na ’u taua mau aparauraa ra e aita vau i fiu.

I muri a‘e, ua titau manihini oia ia ’u i te hoê putuputuraa a te mau Ite no Iehova. Ua maere roa vau i ta ’u i ite e i faaroo i ǒ. Ua apiti atoa te feia apî i te putuputuraa, ua paraparau ratou ma te ohie roa mai te tahu‘a mai! Ua mana‘o vau: “Mea maitai roa te haapiiraa ta teie mau taata e fana‘o ra i ǒ nei!” Noa ’tu to ’u rouru roroa e ta ’u huru faaahuraa haapaoraa ore, ua farii mai te mau Ite no Iehova ia ’u ma te mahanahana. Ua titau manihini atoa te tahi utuafare ia ’u i to ratou fare no te tamaa e o ratou ia oti te putuputuraa!

Maoti ta ’u haapiiraa Bibilia e te mau Ite no Iehova, ua taa ia ’u e e Metua î i te here te Atua ra o Iehova e te tâu‘a ra oia ia tatou noa ’tu nohea mai tatou, ehia moni ta tatou, eaha to tatou tiaraa aore ra faito haapiiraa. E ore te Atua e maitiiti i te taata. (Ohipa 10:34, 35) I te pae hopea, ua haamâhahia to ’u hinaaro e ite no nia i te Atua. Ua oaoa vau e aita vau i mana‘o faahou e ua ere au i te tahi mea faufaa i roto i to ’u oraraa.

TO ’U FAUFAARAAHIA

Ua maitai atura to ’u oraraa! Ua faaea vau i te puhipuhi i te avaava, i te inu hua i te ava e i te parau faufau. Ua mo‘e atoa te inoino i vai na mai to ’u tamariiraa e te mau moemoeâ riaria roa. No te mau tupuraa fifi mau ta ’u i faaruru i to ’u tamariiraa e te itiraa o to ’u ite, ua mana‘o vau e mea faufaa ore au. Ua haapaiuma râ vau i te reira.

E vahine faahiahia roa ta ’u o te here ra ia Iehova e o te turu maitai ra ia ’u. Te tavini ra vau i teie nei ei tiaau haaati a te mau Ite no Iehova, a tere ai na te mau amuiraa no te faaitoito e no te haapii atu i to ’u mau hoa Kerisetiano e au ra i te taeae e tuahine no ’u. Maoti te tamahanahanaraa Bibilia e te haapiiraa faahiahia ta te Atua e horoa mai, aita vau e haama faahou ia ’u iho.

Te oaoa ra vau e ta ’u vahine i te tauturu ia vetahi ê mai tei ravehia i nia ia ’u