Te pahonoraa a te Bibilia

 E taipe te roto auahi e te Gehena no te haamouraa mure ore. Mea taa ê te reira i te po auahi aore ra Apoo, te menema o te huitaata.

E ere i te hoê roto mau

 E itehia te parau o “te roto auahi” i roto i na pae irava Bibilia o te faaite ra e e taipe te reira e ere râ i te hoê roto mau. (Apokalupo 19:20; 20:10, 14, 15; 21:8) E hurihia i roto i te roto auahi:

•   Te Diabolo. (Apokalupo 20:10) Ei varua, eita te auahi e nehenehe e haamauiui i te Diabolo.—Exodo 3:2; Te mau tavana 13:20.

•   Te pohe. (Apokalupo 20:14) E ere te pohe i te hoê taoˈa materia, eita e nehenehe e fafa ia ˈna. E ore te hoê taata pohe e ohipa faahou aore ra e ora. (Koheleta 9:10) Aita e nehenehe e tanina i te pohe.

•   “Te puaa taehae” e “te peropheta haavare.” (Apokalupo 19:20) Mai te mea ra e e mau taipe te reira, mea tano atoa ia parau e taipe te roto auahi i reira ratou i hurihia ˈi.—Apokalupo 13:11, 12; 16:13.

E taipe no te haamouraa mure ore

 Te parau ra te bibilia no te roto auahi, “o te piti o te pohe” ïa. (Apokalupo 20:14; 21:8) Te pohe faahiti-matamua-hia i roto i te Bibilia, o te pohe ïa no roto mai ia Adamu i muri aˈe i te hara. Teie te pohe e nehenehe te taata e faatia-faahou-hia mai. I te pae hopea, e haamou roa te Atua i taua huru pohe ra.—Korinetia 1, 15:21, 22, 26.

 Te faahohoˈa ra te roto auahi i te hoê huru pohe ê atu, te piti ïa o te pohe. Te auraa ïa, aita e ohipa i reira. Mea taa ê ra te reira no te mea aita te Bibilia e parau ra e nehenehe tatou e faatia-faahou-hia mai aore ra e faaorahia. Te faataa ra te Bibilia “tei ia [Iesu] nei te taviri o te pohe e te apoo.” Te haapapu te reira e mana to ˈna no te faatia i te taata mai roto mai i te pohe no ǒ mai ia Adamu. (Apokalupo 1:18; 20:13) Aita ta Iesu aore ra ta te tahi atu taata te taviri no te roto auahi. Te faahohoˈa ra teie taipe i te hoê faautuaraa mure ore, oia hoi te haamouraa mure ore.—Tesalonia 2, 1:9.

Hoê â huru te Gehena, te peho o Hinoma

 I roto i te Bibilia, ua faahiti 12 taime te taˈo Gehena (géénna na roto te reo Heleni). E taipe te roto auahi no te haamouraa mure ore. I roto i te tahi huriraa, e tuuhia te taˈo “po auahi” no Gehena. Tera râ, mea taa ê te Gehena e te po auahi (sheʼôl na roto te reo Hebera e haïdes na roto te reo Heleni).

 Te auraa o te taˈo “Gehena” o “te peho o Hinoma” ïa, te peho i rapaeau noa ia Ierusalema. I tahito ra, i matau na te taata i te faariro i taua peho ra ei faarueraa pehu. E faaama-noa-hia te auahi i reira, e na te tuˈa e amu i te mau mea ta te auahi i ore e tutui roa.

 Ua faaohipa Iesu i te Gehena ei taipe no te haamouraa mure ore. (Mataio 23:33) Ua parau oia: “I Gehena, e ore te mau tuˈa e te auahi e pohe i reira.” (Mareko 9:47, 48) Te haamanaˈo ra paha Iesu i te ohipa i ravehia i te peho o Hinoma e te mau parau atoa i roto i te Isaia 66:24 o te na ô ra: “E haere ratou e hiˈo i te tino pohe o te feia tei orure hau ia ˈu. Eita hoi te mau tuˈa i nia iho ia ratou e pohe, eita to ratou auahi e pohe.” Aita Iesu i hinaaro e parau e haamauiuihia ratou, e haamou-roa-hia râ ratou. E amu te tuˈa e e ama te auahi i te mau tino pohe eiaha râ i te taata ora.

 Aita te Bibilia e parau ra e nehenehe te hoê taata e haere mai i rapae i Gehena. Te faahohoˈa ra te “roto auahi” e te “auahi o Gehena” i te haamouraa mure ore.—Apokalupo 20:14, 15; 21:8; Mataio 18:9.

Eaha te auraa “e haamauiuihia ratou i te po e te ao e a muri noa ˈtu”?

 Ahani e taipe te roto auahi no te haamouraa, no te aha te Bibilia e parau ra “e haamauiuihia i te po e te ao e a muri noa ˈtu” te Diabolo, te puaa taehae e te peropheta haavare? (Apokalupo 20:10) Hiˈopoa anaˈe e maha tumu:

1.   Ia haamauiuihia te Diabolo e a muri noa ˈtu e titauhia ia ora atoa oia e a muri noa ˈtu. Tera râ, te parau ra te Bibilia e haamouhia te Diabolo.—Hebera 2:14.

2.   E ô te ora mure no ô mai i te Atua ra, e ere râ i te hoê faautuaraa.—Roma 6:23.

3.   Mai te mea ra e e taipe te puaa taehae e te peropheta haavare aita ïa raua e haamauiui-mau-hia.

4.   Ia au i te Bibilia, e tapeahia te Diabolo e e haamouhia o ˈna e a muri noa ˈtu.

 Te auraa o te taˈo “haamauiui” i roto i te Bibilia o te “tapearaa” ïa. Ei hiˈoraa, te parau Heleni “feia haamauiui” faaohipahia i roto i te Mataio 18:34, ua hurihia ïa ei “mau tiai” i roto e rave rahi mau huriraa Bibilia. E faaite te reira te tuatiraa i na taˈo e piti “haamauiui” e “tapearaa.” Oia atoa, te faatano ra te Mataio 8:29 e te Luka 8:30, 31 i te taˈo “haamauiui” e te taˈo “abuso” no te faataa i te ohipa-ore-raa aore ra te pohe. (Roma 10:7; Apokalupo 20:1, 3) Te faaohipa pinepine ra te buka Apokalupo i te taˈo “haamauiui” no te hoê auraa taipe noa.—Apokalupo 9:5; 11:10; 18:7, 10.