Eaha to roto?

Te tauturu mai ra anei te mau haapaoraa atoa ia faafatata ˈtu i te Atua?

Te tauturu mai ra anei te mau haapaoraa atoa ia faafatata ˈtu i te Atua?

Ta te Bibilia e parau mai ra

Eita te mau haapaoraa atoa e tauturu mai ia faafatata ˈtu i te Atua. Te faahiti ra te Bibilia te vai ra e rave rau haapaoraa ta te Atua e ore e au. Eaha ta teie mau haapaoraa e rave nei?

1.Te haamoriraa i te mau atua hape

Te faahiti ra te Bibilia “e mea faufaa ore” te haamoriraa i te mau atu hape. (Ieremia 10:3-5; 16:19, 20) Teie ta te Atua ra o Iehova * i faaue atu i te nunaa Iseraela i tahito ra: “Eiaha roa to oe ei Atua ê atu, ia ˈu nei.” (Exodo 20:3, 23; 23:24) I to te mau Iseraela haamoriraa i te tahi atu mau atua, “tupu aˈera te riri o Iehova” ia ratou.—Numera 25:3; Levitiko 20:2; Te mau tavana 2:13, 14.

Aita te Atua i taui i to ˈna manaˈo no nia i tei “parauhia e e atua.” (Korinetia 1, 8:5, 6; Galatia 4:8) Te faaue nei te Atua i te feia e hinaaro e haamori ia ˈna ia faaea i te amuimui e te taata o te pee ra i te haamoriraa hape. Te na ǒ ra oia: “A haere ê mai i rapae mai rotopu mai ia ratou, e a faataa ê mai ia outou.” (Korinetia 2, 6:14-17) Mai te peu e te tauturu mau ra te mau haapaoraa atoa ia faafatata ˈtu i te Atua, no te aha ïa te Atua i horoa mai ai i tera faaueraa?

2.Te haamoriraa i te Atua mau ma te rave i te mau mea ta ˈna e ore e au

I te tahi mau taime, ua haamori te ati Iseraela i te Atua ma te pee i te mau tiaturiraa e te mau peu a te haamoriraa hape. Ua patoi râ Iehova i ta ratou tamataraa ia anoi i te haapaoraa mau e te hape. (Exodo 32:8; Deuteronomi 12:2-4) Ua faahapa Iesu i te mau tia faaroo o to ˈna tau no ta ratou huru haamoriraa i te Atua. Ia hiˈohia ˈtu na rapae, e feia faaroo roa ratou. I roto râ i to ratou aau, ‘ua haapae i te mau mea faufaa aˈe o te ture a Mose, oia hoi te parau-tia, te aroha hamani maitai e te taiva ore.’—Mataio 23:23.

I teie atoa mahana, hoê noa haapaoraa o te tauturu mai ia faafatata ˈtu i te Atua. O te haapaoraa niuhia i nia i te parau mau o te Bibilia. (Ioane 4:24; 17:17; Timoteo 2, 3:16, 17) Te vai ra te mau haapaoraa o te ore e pee i ta te Bibilia e parau. Te faaatea ê ra ratou i te taata i te Atua. Te manaˈo nei te mau taata e no roto mai te Bibilia te mau haapiiraa mai te haapiiraa o te Toru tahi, te haapiiraa e e ora ˈtu te tahi mea i roto i te taata ia pohe o ˈna, aore ra te haapiiraa o te haamauiuiraa mure ore. No ǒ mai râ taua mau haapiiraa ra i te haamoriraa hape. Mea “faufaa ore” tera haamoriraa no te mea te tuuhia ra te mau faaueraa a te Atua i te hiti e te haafaufaahia ra te mau peu tumu a te taata.—Mareko 7:7, 8.

Mea hae na te Atua ia haamori te taata ia ˈna ma te aau haavare. (Tito 1:16) No te faafatata ˈtu â i te Atua, e titauhia ia faaohipa i ta ˈna mau faaueraa i roto i to tatou oraraa i te mau mahana atoa. Eiaha râ e pee noa i te taata ma te rave i tei matauhia aore ra ma te pee noa i ta ratou mau peu tumu. Ei hiˈoraa, te parau ra te Bibilia: “Ia manaˈo noa ˈtu te hoê taata e e taata haamori oia i te Atua, aita râ oia e tapea ra i to ˈna vaha, te haavare ra ïa oia i to ˈna iho aau, e mea faufaa ore ta ˈna haamoriraa.  Te huru haamoriraa mâ e te viivii ore i te aro o to tatou Atua e Metua, teie ïa: ia aupuru i te mau otare e te mau vahine ivi i roto i to ratou ati, e ia ore ia viivii i teie nei ao.” (Iakobo 1:26, 27; te mau nota) I roto i te King James Version, ua faaohipahia te parau “paieti mau” no te faahiti i te haamoriraa viivii ore e te haavare ore.

^ par. 2 O Iehova te iˈoa o te Atua mau, mai tei papaihia i roto i te Bibilia.