Eaha to roto?

E nafea e itehia ˈi te haapaoraa mau?

E nafea e itehia ˈi te haapaoraa mau?

Te pahonoraa a te Bibilia

No te ite te taa-ê-raa i roto i te haapaoraa mau e te haapaoraa hape, te na ô ra te Bibilia: “I ta ratou mau hotu e ite maitai ai outou ia ratou. E pofaihia anei te vine aore ra te suke i nia i te raau taratara?” (Mataio 7:16) E nehenehe e itehia te taa-ê-raa rotopu te vine e te raau taratara na nia i ta raua mau hotu. E nehenehe atoa ïa e itehia te taa-ê-raa i roto i te haapaoraa mau e te haapaoraa hape ia au i te hotu aore ra ia au i to ratou huru.

  1. Te haapii ra te haapaoraa mau i te parau mau niuhia i nia i te Bibilia, eiaha i nia i te manaˈo taata. (Ioane 4:24; 17:17) Mai te parau mau no nia i te varua e te tiaturiraa i te hoê oraraa mure ore i nia i te fenua, faarirohia ei paradaiso. (Salamo 37:29; Isaia 35:5, 6; Ezekiela 18:4) E faaara atoa o ˈna i te taata te haavare a te mau haapaoraa hape.—Mataio 15:9; 23:27, 28.

  2. Te tauturu ra te haapaoraa mau i te taata ia ite o vai te Atua, to na atoa iˈoa, Iehova. (Salamo 83:18; Isaia 42:8; Ioane 17:3, 6) Aita te haapaoraa mau e haapii ra e, mea atea te Atua aore ra aita o ˈna e tâuˈa nei ia tatou. Te hinaaro ra râ o ˈna ia faatupu tatou i te hoê auhoaraa piri roa e o ˈna.—Iakobo 4:8.

  3. Te haafaufaa ra te haapaoraa mau e, o Iesu Mesia ta Iehova i maiti ei faaora. (Ohipa 4:10, 12) E auraro o ˈna i ta Iesu mau faaueraa e e pee i to ˈna hiˈoraa.—Ioane 13:15; 15:14.

  4. Te haafaufaa ra te haapaoraa mau e, te tiaturiraa hoê roa o te huitaata, te Faatereraa arii a te Atua. Te poro-haere ra te feia e pee ra i te haapaoraa mau i tera Faatereraa arii.—Mataio 10:7; 24:14.

  5. Te faaitoito nei te haapaoraa mau ia faatupu i te here mau. (Ioane 13:35) Te haapii atoa ra ia faatura e ia farii popou i te mau taata atoa noa ˈtu te nunaa, taere, reo e huru tupuraa. (Ohipa 10:34, 35) Maoti te here mau, aita te feia e pee ra i te haapaoraa mau e faaô i roto i te tamaˈi.—Mika 4:3; Ioane 1, 3:11, 12.

  6. Aita e pǔpǔ ekalesiatiko aufauhia i roto i te haapaoraa mau. E aita atoa e tiaraa faahua e itehia nei.—Mataio 23:8-12; Petero 1, 5:2, 3.

  7. Aita te haapaoraa mau e faaô i roto i te ohipa poritita. (Ioane 17:16; 18:36) Tera râ, e faatura e e auraro te feia e pee i te haapaoraa mau i te faatereraa i te vahi ta ratou e ora ra ia au i te faaueraa Bibilia: “A faahoˈi i ta Kaisara ia Kaisara ra [tia faatere], ta te Atua râ i te Atua ïa.”—Mareko 12:17; Roma 13:1, 2.

  8. E ere te haapaoraa mau e ohipa taa noa, e huru oraraa râ. E faaohipa te feia e pee ra ia ˈna i te mau ture aveia Bibilia teitei i roto i to ratou oraraa. (Ephesia 5:3-5; Ioane 1, 3:18) E ere râ ratou i te feia etaeta, e oaoa ratou i te haamori i te “Atua oaoa.”—Timoteo 1, 1:11.

  9. Mea iti roa te taata e haamori nei i roto i te haapaoraa mau. (Mataio 7:13, 14) Te haafaufaa-ore-hia nei ratou, faaooohia e hamani-ino-hia no te haapaoraa i te hinaaro o te Atua.—Mataio 5:10-12.

E ere te haapaoraa mau i te haapaoraa e tano i to ˈu hinaaro

Mea atâta ia faaô i roto i te hoê haapaoraa ia au i to tatou hinaaro. Ua tohu te Bibilia e imi te taata “i te tahi mau orometua na ratou no te faanavenave i to ratou tariˈa.” (Timoteo 2, 4:3) Te faaitoito ra râ te Bibilia ia pee “te huru haamoriraa mâ e te viivii ore i te aro o to tatou Atua e Metua,” noa ˈtu e e haapaoraa e ririhia e te taata.—Iakobo 1:27, nota; Ioane 15:18,19.