Aita te Bibilia e faahiti ra i te mau hohoˈa faufau, te mau poroi faufau i nia i te natirara aore ra te tahi atu mau ravea mai teie te huru. Tera râ, te haapapu ra te Bibilia eaha te manaˈo o te Atua no nia i te mau ohipa o te paturu i te taatiraa pae tino i rapaeau i te faaipoiporaa aore ra i te manaˈo hape no nia i te taatiraa pae tino. A hiˈo i teie mau irava Bibilia:

•   “No reira, a haapohe i te mau mero o to outou tino no te fenua nei, to roto hoi te mau peu taotoraa tia ore.” (Kolosa 3:5) E faaara te mataitairaa i te hohoˈa faufau i te mau hinaaro tia ore. Mea viivii ïa te taata o te na reira i mua i te aro o te Atua.

•   “Te taata atoa o te hiˈo noa i te hoê vahine a faahinaaro atu ai ia ˈna, ua faaturi aˈena oia ia ˈna i roto i to ˈna aau.” (Mataio 5:28) E faatupu te mau hohoˈa faufau i te mau hinaaro tia ore o te turai i te hoê taata ia rave i te ohipa ino.

•   “Eiaha roa ˈtu te mau peu taotoraa tia ore, te peu viivii e rave rau e te nounou ia faahitihia i rotopu ia outou.” (Ephesia 5:3) Eiaha roa ˈtu tatou e oaoa i te faahiti i te mau peu viivii, eiaha roa ˈtu e mataitai aore ra e taio i tera mau mea.

•   “E ite-maitai-hia ta te tino hara e faatupu, oia ïa te mau peu taotoraa tia ore, te peu viivii . . . Mai ta ˈu i faaara noa na ia outou, te faaara faahou atu nei au e e ore roa te feia o te rave noa i teie mau peu e fatu i te Faatereraa arii a te Atua.” (Galatia 5:19-21) No te Atua, mea viivii te mau taata e mataitai nei i te mau hohoˈa faufau aore ra e apiti nei i te mau aparauraa faufau na roto i te roro uira e na roto i te vini. Ia na reira tatou, eita tatou e fanaˈo faahou i te farii maitai a te Atua.