Eita e opanihia ia taati i te pae tino. Te haapapu nei râ te Bibilia e ô te reira no ǒ mai i te Atua no te feia faaipoipo. Ua poiete o ˈna i na taata matamua ei “tane e vahine” e parau ihora e “mea maitai roa.” (Genese 1:27, 31) Ia ˈna i faaipoipo i te tane e te vahine matamua, ua parau oia “e riro raua ei hoê.” (Genese 2:24) E oaoa raua toopiti i te taatiraa pae tino e i te faaite i to raua here te tahi i te tahi.

 Te faataa ra te Bibilia i te oaoa ta te mau tane e fanaˈo i roto i te faaipoiporaa: “Ia oaoa oe i te vahine o to apîraa . . . Ia oaoa oe i to ˈna tîtî i te mau taime atoa. Ia tamau noa oe i te au roa i to ˈna here.” (Maseli 5:18, 19) Te hinaaro atoa ra te Atua ia oaoa te mau vahine faaipoipo i te pae taatiraa. Te na ô ra te Bibilia: “Ia haamâha te tane faaipoipo i te mau hinaaro o ta ˈna iho vahine e ia na reira atoa ˈtu te vahine faaipoipo i ta ˈna iho tane.”—Korinetia 1, 7:3.

Te mau otia i te pae taatiraa

 Ua faataa te Atua e no te feia faaipoipo anaˈe te taatiraa i te pae tino, mai tei papaihia i roto i te Hebera 13:4: “Ia tura te faaipoiporaa no te taata atoa, e ia vai viivii ore te roˈi o te feia faaipoipo, e faautua hoi te Atua i te feia e rave ra i te mau peu taotoraa tia ore e te feia faaturi.” Ia vai taiva ore na hoa faaipoipo e ia tapea noa raua i ta raua euhe. E oaoa raua ia faaohipa i te mau faaueraa tumu eiaha râ ia haamâha i to raua hinaaro miimii: “E rahi aˈe te oaoa ia horoa ˈtu ia horoahia mai.”—Ohipa 20:35.