Eaha to roto?

Eaha te auraa e riro ei “taata Samaria”?

Eaha te auraa e riro ei “taata Samaria”?

Te pahonoraa a te Bibilia

Ua matauhia i te faaohipa i te parau “taata Samaria” no te faaau i te tahi taata tei tauturu i te tahi atu taata i roto i te ati. No roto mai teie parau i te tahi aamu aore ra faahohoˈaraa ta Iesu i faahiti no te faaite e e tauturu te tahi taata aau maitai i te tahi atu noa ˈtu e ere hoê â nunaa aore ra tupuraa to teie taata.

I roto i teie tumu parau

 Eaha te faahohoˈaraa o te “taata Samaria”?

Teie te tahi haapotoraa o te aamu ta Iesu i faahiti: Ua ratere te hoê taata ati Iuda mai Ierusalema mai i Ieriko. A haere noa ˈi oia ua eiâhia, ua taparahihia e ua vaiihohia oia ma te manaˈo e ua pohe oia.

Ua na pihaiiho noa te hoê tahuˈa ati Iuda e i muri iho te tahi atu tia faaroo ati Iuda i teie taata ratere tei pepe. Noa ˈtu hoê â nunaa to raua e teie ratere, aita raua i tapea no te tauturu i teie taata.

I muri iho, tae mai ra te tahi taata no te tahi atu nunaa. E taata no Samaria oia. (Luka 10:33; 17:16-18) Ua turai te aroha i teie taata no Samaria ia rapaau i te mau pepe o te taata. I muri iho, afai atura oia i teie taata i te tahi fare no te mau ratere. I ǒ, ua haapao oia i teie taata i te roaraa o te po. I te mahana i muri iho, ua aufau oia i te fatu fare no te haapao i teie taata e ua horoa oia i te moni no te aufau i te tahi atu mau haamâuˈaraa.—Luka 10:30-35.

 No te aha Iesu i faahiti ai i teie faahohoˈaraa?

Ua faatia Iesu i teie aamu i te tahi taata tei manaˈo o to ˈna noa mau taata hoê â nunaa, haapaoraa e o ˈna tei riro ei taata tupu no ˈna. Ua hinaaro Iesu e haapii i te taata i te tahi haapiiraa faufaa. Titauhia ia ˈna ia taa e ua riro atoa te feia e ere i te ati Iuda ei “taata tupu” no ˈna. (Luka 10:36, 37) Ua papaihia teie aamu i roto i te Bibilia no te haapii i te tahi mea faufaa i te mau taata atoa o te hinaaro ra e faaoaoa i te Atua.—Timoteo 2, 3:16, 17.

 Eaha te haapiiraa o teie faahohoˈaraa?

Te haapii mai ra teie aamu e ia faaite te tahi taata tupu i te aroha na roto i te ohipa. E rave oia i te tahi mea no te tauturu i te tahi taata te mauiui ra noa ˈtu e ere hoê â to raua tupuraa aore ra nunaa. E rave te tahi taata tupu i nia ia vetahi ê mai ta ˈna e hinaaro e ravehia no ˈna iho.—Mataio 7:12.

 O vai na te feia no Samaria?

Ua ora te feia no Samaria i te fenua apatoerau no Iudea. No roto mai teie huaai i te faaipoiporaa o te mau ati Iuda e te feia e ere i te ati Iuda.

I te senekele matamua muri aˈe te tau o Iesu, ua haamau te feia no Samaria i ta ratou iho haapaoraa. Ua farii ratou na buka e pae o te mau Papai Hebera, ua patoi râ ratou i te toea o te mau Papai.

E rave rahi ati Iuda i te tau o Iesu tei vahavaha i te feia no Samaria, e ua patoi ratou e amuimui i te feia no Samaria. (Ioane 4:9) Ua faaohipa vetahi mau ati Iuda, i te parau “Samaria” ei parau ino.—Ioane 8:48.

 Ua tupu mau anei te aamu o te “taata Samaria”?

Aita te Bibilia e faaite ra ua niuhia anei te faahohoˈaraa o te taata Samaria i nia i te hoê tupuraa mau. Ua faaohipa pinepine râ Iesu, i roto i ta ˈna haapiiraa i te mau peu e vahi matauhia, ia ohie i te feia e faaroo ra ia taa i te haapiiraa ta ˈna e horoa ra.

E rave rahi tuhaa o teie aamu mea tano i te pae tuatapaparaa. Ei hiˈoraa:

  • Ua hau atu 20 kilometera te atea o te purumu mai Ierusalema mai i Ieriko. E hoê kilometera te haapouraa. Te haapapu ra te aamu, te feia e ratere ra i Ieriko e “pou mai na Ierusalema mai.”—Luka 10:30.

  • Ua ratere pinepine te mau tahuˈa e te mau tia faaroo ati Iuda tei ora i Ieriko i Ierusalema na nia i teie purumu.

  • Mea pinepine te feia eiâ i te tapuni i te roaraa o teie purumu, a tiai ai i te feia ratere, te feia iho â ra e ratere ra o ratou anaˈe.