“Eiaha ïa e haapeapea noa ˈˈe, na roto râ i te pure e te taparuparuraa e te haamaitairaa, a faaite i ta outou mau aniraa i te Atua. E na te hau o te Atua, tei hau ê i te mau manaˈo atoa, e tiai i to outou aau e feruriraa na roto i te Mesia ra o Iesu.”—Philipi 4:6, 7, Huriraa o te ao apî.

 “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau o te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.”—Philipi 4:6, 7, Te Bibilia Moˈa ra.

Auraa o te Philipi 4:6, 7

 Ia haapeapea rahi aore ra ia ahoaho te mau tavini a te Atua, e nehenehe ratou e pure ia ˈna no te imi i te tamahanahanaraa. Te fafau ra te Atua e horoa oia i te hau o roto no te tauturu ia ratou e ia paruru i to ratou feruriraa e aau. Te faataa ra te irava 6 te mau huru pure tei tauturu ia ratou ia noaa i tera hau.

 Te mau taparuparuraa, o te mau pure ïa ta te hoê taata e rave no te ani ma te haehaa i ta te Atua tauturu. E taparuparu te hoê taata i te Atua ia ahoaho oia aore ra tei roto oia i te mau tupuraa atâta, mai ta Iesu i rave. (Hebera 5:7) E faahiti-pinepine-hia teie mau pure.

 Te mau aniraa, o te mau pure ïa no te ani i te Atua te tahi mea taa maitai. E nehenehe ta ˈna mau tavini e na reira no “te mau mea atoa,” ia au râ i to te Atua hinaaro faahitihia i roto i te Bibilia.—Ioane 1, 5:14.

 Te mau haamaitairaa, o te mau pure ïa no te haamauruuru i te Atua no te mau mea atoa ta ˈna i rave e e rave no tatou. Ia haamanaˈo tatou te tumu e haamauruuru ai tatou i te Atua, e oaoa noa ïa tatou.—Tesalonia 1, 5:16-18.

 E pahono te Atua i taua mau pure ma te horoa i ta ˈna mau tavini i te hau. E noaa ia tatou “te hau o te Atua” maoti te hoê auhoaraa piri e o ˈna. (Roma 15:13; Philipi 4:9) No te aha teie hau e “hau ê i te mau manaˈo atoa”? No te mea no ǒ mai i te Atua ra e e tauturu te reira hau atu i ta tatou e nehenehe e manaˈo.

 Te parau ra teie irava Bibilia e tiai te hau o te Atua i to tatou aau. Te taˈo Heleni hurihia “tiai” no te faahiti ïa i te hoê pǔpǔ faehau tei paruru aore ra tiai i te hoê oire auahia i te patu. Oia atoa, e nehenehe te hau o te Atua e paruru i te aau e te feruriraa o te hoê taata. E tauturu te reira ia ore o ˈna e haapeapea rahi roa no te ahoaho.

 E paruru te hau o te Atua ia tatou “na roto i te Mesia ra o Iesu,” a nehenehe atu ai tatou e fanaˈo i te auhoaraa piri e te Atua. Ua horoa Iesu i to ˈna ora ei hoo no ta tatou mau hara. Ia faatupu tatou i te faaroo ia ˈna, e haamaitai mai te Atua. (Hebera 11:6) O Iesu anaˈe te arai ia faafatata tatou i te Atua na roto i te pure. Ua parau Iesu: “Aita roa e taata e tae i te Metua ra, na roto noa râ ia ˈu.”—Ioane 14:6; 16:23.

Irava tapiri o te Philipi 4:6, 7

 Te buka Philipi, o te hoê ïa rata papaihia e te aposetolo Paulo no te mau Kerisetiano tei ora i te oire no Philipi. a I roto i te pene 4 o teie buka, te faaitoito ra Paulo i te mau mero o te amuiraa ia oaoa e ua haamauruuru ia ratou no to ratou aau horoa noa. (Philipi 4:4, 10, 18) Ua faaite oia e maoti noa te pure e nehenehe ratou e fanaˈo i te hau o te Atua. Ua faaite atoa eaha te mau manaˈo e ohipa e titauhia ia fanaˈo i te tauturu no ǒ mai i “te Atua o te hau.”—Philipi 4:8, 9.