“Eiaha roa ïa e haapeapea no ananahi, no te mea e haapeapearaa ê to ananahi. Tera mahana to ˈna fifi.”—Mataio 6:34, Huriraa o te ao apî.

 “Eiaha e tapitapi i to ananahi ra, na ananahi hoi e tapitapi i ta ˈna iho. O te mahana o to ˈna iho ino atire ïa.”—Mataio 6:34, Te Bibilia Moˈa ra.

Auraa o te Mataio 6:34

 Na roto i teie mau parau, ua haapapu Iesu aita e faufaa ia haapeapea rahi roa no te mau fifi e nehenehe e tupu mai. Mea maitai aˈe râ ia vaiiho tera mahana to ˈna fifi.

 Aita o Iesu i parau eiaha tatou e manaˈo no ananahi aore ra e haamau i te opuaraa no a muri aˈe. (Maseli 21:5) Ua tauturu mai râ oia ia tatou ia ore e haapeapea rahi roa no nia i te mau mea e nehenehe e tupu ananahi. E erehia hoi tatou i to tatou oaoa e aita e tiatonu faahou i nia i te ohipa e tia ia rave. Aita tatou e nehenehe e faatitiaifaro i te mau fifi aita â i tupu ma te haapeapea i teie nei â. Pinepine te mau mea ta tatou e haapeapea ra e ore e tupu aore e ere i te mea ino mai ta tatou i manaˈo.

Irava tapiri o te Mataio 6:34

 E itehia teie mau parau ta Iesu i roto i ta ˈna Aˈoraa i nia i te mouˈa i roto i te Mataio pene 5 tae atu i te 7. I roto i ta ˈna Aˈoraa, ua faataa o Iesu eita te haapeapea-rahi-raa e faaoaoa aore ra e faaroa ˈtu â i to tatou oraraa. (Mataio 6:27) Ua parau atoa o ˈna e ia tuu anaˈe tatou i te Atua na mua roa i roto i to tatou oraraa aita ïa tatou e haapeapea rahi roa no ananahi. Te aupuru ra te Atua i te mau mea e hotu ra e te mau animara e e aupuru atoa ïa o ˈna i te feia e tavini ra ia ˈna.—Mataio 6:25, 26, 28-33.