“Eiaha e mǎtaˈu, tei pihai iho hoi au ia oe. Eiaha e haapeapea, o vau hoi to oe Atua. E haapuai au ia oe, oia mau, e tauturu vau ia oe, e mau iho â oe ia ˈu i to ˈu rima atau parau-tia.”—Isaia 41:10, Huriraa o te ao apî.

 “Eiaha e mǎtaˈu, tei pihai-atoa-iho vau ia oe; eiaha e taiâ, o vau hoi to Atua. E faaetaeta vau ia oe, e tauturu vau ia oe: oia ïa, e mau vau ia oe i tau rima atau parau-tia ra.”—Isaia 41:10, Te Bibilia Moˈa ra.

Auraa o te Isaia 41:10

 Te haapapu ra te Atua ra o Iehova a i ta ˈna mau tavini taiva ore e e tauturu oia ia ratou noa ˈtu eaha te mau fifi ta ratou e faaruru.

 “Tei pihai iho hoi au ia oe.” Te faaite ra Iehova i ta ˈna mau tavini e tei pihai iho o ˈna ia ratou, aita ïa e tumu e mǎtaˈu ai ratou. Te ite ra oia eaha tei tupu i nia ia ratou e te faaroo ra i ta ratou mau pure, mai te huru ra ïa to reira atoa o ˈna.—Salamo 34:15; Petero 1, 3:12.

 “O vau hoi to oe Atua.” Te haamanaˈo ra Iehova i ta ˈna mau tavini e o ˈna to ratou Atua e e farii o ˈna ia ratou. Te haapapu atoa ra o ˈna e noa ˈtu te mau tupuraa ta ratou e faaruru ra e haa noa oia no te tauturu atu.—Salamo 118:6; Roma 8:32; Hebera 13:6.

 “E haapuai au ia oe, oia mau, e tauturu vau ia oe, e mau iho â oe ia ˈu i to ˈu rima atau parau-tia.” I ǒ nei, e toru taime to Iehova haapapuraa e ua ineine roa o ˈna i te tauturu i ta ˈna mau tavini. Ei hiˈoraa, e faaohipa Iehova i to ˈna rima atau no te faaite e e nafea o ˈna e haa ˈi ia hinaaro ta ˈna mau tavini i te tauturu. Ia paruparu anaˈe hoê, e ineine noa Iehova i te toro i to ˈna rima atau.—Isaia 41:13.

 Te hoê ravea faufaa roa ta te Atua e faaohipa no te faaitoito i ta ˈna mau tavini o ta ˈna ïa Parau, te Bibilia. (Iosua 1:8; Hebera 4:12) Ei hiˈoraa, te horoa ra te Bibilia i te mau aˈoraa paari i te feia e faaruru ra i te mau fifi mai te veve, te maˈi aore ra ia pohe tei herehia e ratou. (Maseli 2:6, 7) E faaohipa atoa te Atua i to ˈna varua moˈa aore ra puai ohipa, no te tauturu i ta ˈna mau tavini ia rave i te mau faaotiraa paari ia rahi roa anaˈe te fifi.—Isaia 40:29; Luka 11:13.

Irava tapiri o te Isaia 41:10

 Ua tamahanahana teie mau parau i te mau ati Iuda i te taime a hopoi-ê-hia ˈi ratou i Babulonia. Ua tohu Iehova e ia hope te tau o to ratou hopoi-ê-raa, e faaorahia ratou e e haamouhia te mau nunaa tapiri a mǎtaˈu roa ˈi to Babulonia. (Isaia 41:2-4; 44:1-4) Noa ˈtu ua mǎtaˈu Babulonia e te mau nunaa tapiri a faaroo ai i teie mau parau, aita te mau ati Iuda i mǎtaˈu noa ˈˈe no te mea e paruru Iehova ia ratou. A toru taime, ua haapapu o ˈna ia ratou ma te parau “eiaha e mǎtaˈu.”—Isaia 41:5, 6, 10, 13, 14.

 Noa ˈtu ua papaihia na mua roa te Isaia 41:10 no te mau ati Iuda tei hopoi-ê-hia i Babulonia, ua faaherehere Iehova i teie mau parau no te tamahanahana i ta ˈna mau tavini atoa. (Isaia 40:8; Roma 15:4) E tauturu o ˈna i ta ˈna mau tavini i teie nei mahana mai ta ˈna i rave i na mua aˈe.