Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Yehowa Adansefo

Twi

Ɛyɛ Ampa sɛ Obi Gyae Mo Som no a, Mo ne no Mmɔ Bio?

Ɛyɛ Ampa sɛ Obi Gyae Mo Som no a, Mo ne no Mmɔ Bio?

Ɛtɔ da a, Yehowa Danseni bi a wabɔ asu gyae asɛnka kɔ, na ebi wɔ hɔ mpo a, ɔde nkakrankakra twe ne ho fi ne nuanom Kristofo ho. Sɛ obi te saa a yɛmpo no. Yɛyɛ nhyehyɛe mpo boa no ma ɔsan gyina ne nan so wɔ ɔsom no mu bio.

Sɛ obi yɛ bɔne kɛse bi a, ɛnyɛ sɛ yɛtee ara na yɛatu no afi asafo no mu. Nanso ɛtɔ da a, Ɔdansefo bi a wabɔ asu hyɛ da sɛ ɔremfa Bible mmara mmɔ ne bra, na mmom bɔne ara na ɔde asi n’ani so sɛ ɔbɛyɛ, na onnu ne ho nso. Ɛba saa a, ɛnde wobetu no afi asafo no mu na obiara ne no remmɔ. Bible ka no pefee sɛ: “Munyi ɔbɔnefo no mfi mo mu.1 Korintofo 5:13.

Sɛ wotu ɔbarima bi fi asafo no mu na ne yere ne ne mma da so ara yɛ Yehowa Adansefo nso ɛ? Ɛba saa a, abusua no ne no nni hwee yɛ wɔ ɔsom mu bio, nanso wɔne no ntwa abusua mu. Aware no rengu, na ɔne n’abusua bɛkɔ so atena ayɛ biribiara pɛpɛɛpɛ.

Sɛ wotu obi fi asafo no mu a, obetumi akɔ adesua a yɛyɛ no bi. Sɛ ɔpɛ nso a, asafo mu mpanyimfo no betumi de Bible atu no fo. Nea enti a wɔyɛ saa ne sɛ ɛbɛboa no ama wasiesie n’akwan asan abɛyɛ Yehowa Danseni bio. Sɛ wotu obi fi asafo no mu na ɔsesa n’akwan de kyerɛ sɛ afei de, n’ani abere paa sɛ ɔde Bible bɛbɔ ne bra a, yɛsan gye no ba asafo no mu bio.