Kɔ emu nsɛm afã hɔ

Dɛn Ne Bible Adesua?

Dɛn Ne Bible Adesua?

Yehowa Adansefo ne nkurɔfo sua Bible, na ɛma wonya nsɛmmisa bebree ho mmuae. Ebi ne nea edidi so yi:

  • Hena Ne Onyankopɔn?

  • Ɛyɛ ampa sɛ Onyankopɔn dwen me ho?

  • Dɛn na mɛyɛ ama m’aware asɔ?

  • Mɛyɛ dɛn na m’ani agye?

Bible a yɛne nkurɔfo sua no, wohwɛ ase ha a, wubehu nsɛm a nkurɔfo taa bisa fa ho, ne ɛho mmuae.

Mo ne obi resua Bible a, moyɛ no sɛn? Yɛfa asɛm bi te sɛ “Onyankopɔn” anaa “aware” a, na yɛahwɛ Bible nsɛm ahorow a ɛfa ho. Afei, yɛhwɛ nea ebiara ka wɔ ho. Ɛno ma yehu nea Bible no nyinaa ka fa asɛm no ho. Yɛyɛ no saa a, na Bible no ara na ɛrekasa ma ne ho.

Yɛde nhoma a ne din de Dɛn na Yebetumi Asua Afi Bible Mu? na esua Bible no. Nhoma no ma yehu nea Bible ka pɔtee fa nsɛm pii ho. Ebi ne Onyankopɔn, Yesu, ne yɛn daakye.

Mo ne obi sua Bible a, mugye no sɛn? Yɛne wo sua Bible a, yɛrennye wo sika biara. Nhoma a yɛde bɛyɛ adesua no nso, yentwaa bo biara ntoo so.

Bere tenten sɛn na mode yɛ adesua no? Nnipa pii yi bɛyɛ dɔnhwerew baako si hɔ nnawɔtwe biara ne yɛn sua Bible. Nanso yenni bere tenten a yɛde yɛ adesua no. Nea wobɛka na yɛbɛyɛ.

Sɛ meka sɛ mo ne me mmesua Bible a, mobɛyɛ no sɛn? Woka sɛ yɛne wo mmesua Bible a, yɛbɛhwɛ bere a woakyerɛ ne baabi a wopɛ sɛ yɛne wo sua ade no na yɛama Yehowa Danseni bi aba wo nkyɛn. Ɔba a, ɔde bere kakra bɛkyerɛ wo sɛnea yɛyɛ Bible adesua no. Sɛ w’ani gye ho a, na moatoa so.

Sɛ me ne mo sua Bible a, ɛsɛ sɛ mebɛyɛ Yehowa Danseni anaa? Daabi. Yehowa Adansefo ani gye ho sɛ wɔne nkurɔfo besua Bible, nanso yɛnhyɛ obiara sɛ ɔmmra yɛn som mu. Mmom yɛtɔ yɛn bo ase ma nkurɔfo hu nea Bible ka. Yenim sɛ, sɛ obi begye biribi adi oo, ɔrennye nni oo, ɛno de, ɛwɔ ɔno ara ne nsam.—1 Petro 3:15.