Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Yehowa Adansefo

Twi

Adɛn Nti na Monkɔ Ɔko?

Adɛn Nti na Monkɔ Ɔko?

Nneɛma a yɛabobɔ din wɔ ase ha yi nti na Yehowa Adansefo nkɔ ɔko:

  1. Yetie Onyankopɔn. Bible ka sɛ Onyankopɔn asomfo de “wɔn nkrante bɛyɛ nsɔw” na “wɔrensua akodi bio.”Yesaia 2:4.

  2. Yetie Yesu. Yesu ka kyerɛɛ ɔsomafo Petro sɛ: “San fa wo nkrante no hyɛ nea ɛhyɛ, na wɔn a wɔtwe nkrante nyinaa bewu nkrante ano.” (Mateo 26:52) Yesu asɛm no kyerɛ sɛ n’akyidifo remfa akode nkɔ ko.

    Asɛm a Yesu kae sɛ n’asuafo nyɛ “wiase no fã” no, yetie, enti yɛmfa yɛn ho nhyehyɛ amanyɔsɛm mu. ( Yohane 17:16) Yɛnsɔre ntia asraafo dwumadi biara, na sɛ obi pɛ sɛ ɔkɔyɛ sraani a, yensi no kwan.

  3. Yɛdɔ yɛn yɔnko. Yesu ka kyerɛɛ n’asuafo no sɛ ‘wɔnnodɔ wɔn ho.’ ( Yohane 13:34, 35) Ɛno kyerɛ sɛ Yesu asuafo a wɔwɔ wiase nyinaa bɛyɛ anuanom, enti obiara nni hɔ a ɔbɛtwe tuo ne ne nua akɔko.1 Yohane 3:10-12.

  4. Nea tete Kristofo no yɛe. Nhoma bi a wɔato din Encyclopedia of Religion and War ka sɛ: “Yesu akyidifo a wodi kan no ankɔ ko, na wɔamfa wɔn ho anhyɛ sraadi mu,” na mmom wobuu no sɛ “ɛne Yesu dɔ ne n’ahyɛde a ɛse a yɛnnɔ yɛn atamfo no nhyia.” Germanni nyamekyerɛfo Peter Meinhold nso kaa Yesu asuafo a wodi kan no ho asɛm sɛ: “Wɔtee nka sɛ obi rentumi nyɛ Kristoni na ɔnsan nyɛ sraani.”

Nea yɛyɛ de boa ɔman nkɔso

Yehowa Adansefo yɛ ɔmamma pa; yentutu ɔman ase, enti yɛn ho nyɛ hu. Bible ahyɛde a edidi so yi nti, yenya obu ma aban mpanyimfo:

  • “Momma ɔkra biara mmrɛ ne ho ase nhyɛ atumfoɔ a wɔkorɔn no ase.”Romafo 13:1.

  • “Ɛnde muntua Kaesare de mma Kaesare, na muntua Onyankopɔn de mma Onyankopɔn.”Mateo 22:21.

Enti, yedi mmara so tua yɛn tow, na sɛ aban ka sɛ yɛmmoa mpuntu nnwuma a, yɛmpopo yɛn ti.