Kɔ emu nsɛm afã hɔ

Kɔ emu nsɛm afã hɔ

Asɛmpa A Ɛwɔ Kasa Ahorow 500 Mu

Asɛmpa A Ɛwɔ Kasa Ahorow 500 Mu

 Asɛmpa A Ɛwɔ Kasa Ahorow 500 Mu

BERE a na ɔmanko rekɔ so wɔ Rwanda no, nnipakuw ketewa bi a wɔyɛ nsɛm asekyerɛfo guan fii wɔn afie mu, na wogyaw wɔn agyapade hɔ. Nanso, wɔbɔɔ mmɔden faa wɔn kɔmputa nketewa a wotumi de si wɔn srɛ so yɛ adwuma no kɔɔ aguanfo atenae. Dɛn nti na wɔyɛɛ saa? Sɛnea ɛbɛyɛ a wobetumi akɔ so akyerɛ Bible nhoma ahorow ase akɔ Kinyarwanda kasa mu.

Ɛmfa ho sɛ ababaa bi a na ɔwɔ Asia Anafo Fam Apuei yɛ adwuma brɛ, ɔhyew de no, na wɔtaa dunum anyinam nkanea wɔ baabi a ɔte no, na ɔkɔ so tena ne kɔmputa akyi kyerɛ nsɛm ase kosi ɔdasum. Dɛn ntia? Ná ɔyɛ saa sɛnea ɛbɛyɛ a obewie adwuma no wɔ bere ano ma wɔakotintim.

Saa nsɛm asekyerɛfo yi ka atuhoamafo a wɔn dodow bɛyɛ 2,300 a wɔyɛ adwuma wɔ aman bɛyɛ 190 so wɔ wiase nyinaa no ho. Nsɛm asekyerɛfo yi adi fi mfe 20 kosi bɛyɛ mfe 90, na wɔyɛ adwuma denneennen sɛnea ɛbɛyɛ a nkurɔfo nsa bɛka Bible mu nsɛm a ɛma awerɛkyekye no wɔ kasa ahorow 500 mu.—Adiyisɛm 7:9.

Wɔkyerɛ Ase Kɔ Kasa Ahorow Pii Mu

Mfe kakra ni, nsɛm asekyerɛ adwuma a Yehowa Adansefo yɛ no anya nkɔso pii ma ɛyɛ nwonwa. Sɛ nhwɛso no, wɔ afe 1985 mu no, wotintim Ɔwɛn-Aban no wɔ kasa ahorow 23 mu wɔ bere koro mu. Ná eyi yɛ biribi a ɛda nsow wɔ saa bere no mu. Ɛnnɛ, wotintim Ɔwɛn-Aban no wɔ kasa ahorow 176 mu, na wontintim ne nyinaa wɔ bere koro mu sɛnea ɛbɛyɛ a akenkanfo a wɔwɔ wiase nyinaa betumi asua asɛm koro no ara wɔ bere koro mu.

Wɔ kasa ahorow bɛyɛ 50 mu de, Ɔwɛn-Aban no nkutoo ne nsɛmma nhoma a wotintim no daa. Dɛn ntia? Esiane sɛ nnwumakuw a wotintim nhoma tɔn no mpɛ sɛ wɔbɔ ka nti, wontintim nhoma ahorow wɔ ɔmanfo kasa mu. Nanso Yehowa Adansefo a wɔwɔ wiase nyinaa fi wɔn pɛ mu yi ntoboa ma wɔde tintim nhoma ahorow sɛnea ɛbɛyɛ a nnipa a wɔwɔ baabiara bɛte Onyankopɔn Asɛm, na wɔn nsa aka Bible ho nhoma ahorow a wohia.—2 Korintofo 8:14.

Sɛ wɔkyerɛ Bible no ase kɔ nkurɔfo kasa mu a, wɔn ani gye ho paa. Sɛ nhwɛso no, nnansa yi wɔakyerɛ Bible ho nhoma ase kɔ Miskito kasa a nnipa bɛyɛ 200,000 na wɔka wɔ Nicaragua no mu. Ɔbea bi kae sɛ wɔmmrɛ no Me Nhoma a Ɛka Bible Mu Nsɛm * wɔ Miskito kasa mu. Bere a wɔde kɔmaa no no, na ɔsɔfo bi wɔ hɔ. Ɔsɔfo no huu nhoma fɛfɛ no, ɔkae sɛ ɔpɛ. Nanso, ɔbea no amfa amma no ɛmfa ho sɛ ɔsɔfo no kae sɛ ɔbɛma no kɔfe kotoku fã no!

 Bɛyɛ mfe du a atwam ni no, wɔakyerɛ Bible ho nhoma ahorow ase kɔ Mexicofo kasa ahorow bɛboro du mu. Emu bi ne Maya, Nahuatl, ne Tzotzil. Na bɛyɛ mfe du ntam no, Yehowa Adansefo asafo dodow a wɔka ɔmanfo kasa ne mum kasa wom no dodow akɔ anim fi 72 kosi bɛboro 1,200 wɔ saa ɔman no mu. Ɛwom sɛ Yehowa Adansefo tumi de Bible mu nokware no dua nkurɔfo komam de, nanso wogyaw ma Onyankopɔn ma ɔhwɛ ma enyin.—1 Korintofo 3:5-7.

Nnɛyi Bible Nkyerɛase a Ɛwɔ Kasa Ahorow 80 Mu

Nnansa yi, Yehowa Adansefo abɔ mmɔden akyerɛ Kyerɛw Kronkron—Wiase Foforo Nkyerɛase Bible mũ no nyinaa, anaa ne fã bi ase kɔ kasa ahorow 80 mu. Dɛn na afi mu aba? Ɔdansefo bi a ɔwɔ South Africa kaa Bible a wɔakyerɛ ase kɔ Tswana kasa mu no ho asɛm sɛ: “Adwinnade soronko bɛn ara ni! Ɛbɛboa ma mate Onyankopɔn Asɛm ase yiye, na m’akyerɛ ho anisɔ kɛse. N’akenkan nyɛ den, na emu nso da hɔ yiye.” Obi a ofi Mozambique a otumi kenkan Tsonga kasa no kyerɛwee sɛ: “Sɛ wowɔ Bible ho nhoma ahorow nyinaa bi, nanso wunni Bible ankasa a, ɛte sɛ nea aprannaa rebobom na anyinam repae nanso osu ntɔ! Nanso, bere a afei woyii Wiase Foforo Nkyerɛase no adi wɔ Tsonga kasa mu no, na ɛte sɛ nea osu atɔ.”

Nea ɛyɛ nwonwa no, wɔn a wɔkyerɛ asɛmpa a ɛwɔ Bible mu ase na wɔkyekyɛ no rema tete nkɔmhyɛ bi aba mu. Yesu Kristo ankasa na ɔkae sɛ: “Na wɔbɛka ahenni ho asɛmpa yi wɔ asase so nyinaa de adi amanaman nyinaa adanse; ɛno ansa na awiei no bɛba.”—Mateo 24:14.—w09-E 11/1.

[Ase hɔ asɛm]

^ nky. 8 Yehowa Adansefo na wotintimii.

 [Akontaabu pon wɔ kratafa 25]

(Wopɛ nsɛm a wɔahyehyɛ awie no a, hwɛ nhoma no mu)

WIASE FOFORO NHOMA

NKYERƐASE AFOFORO

Wɔakyerɛ ne nyinaa

anaa ne fã bi ase

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

KASA AHOROW

[Mfonini wɔ kratafa 31]

Atuhoamafo bɛyɛ 2,300 kyerɛ Bible ho nhoma ase kɔ kasa ahorow 500 mu

BENIN

SLOVENIA

ETHIOPIA

BRITAIN